闲话冬至
侯宝良
一年当中“冬至”算是一个大节气,辣古代民间就有“冬至大如年”个讲法,作为小辈辣迭个辰光关爱、孝敬长辈是再好也呒没。
俗话讲“秋收冬囥”,又讲“冬令进补、来年打虎”,所以过去有铜钿人家,侪邪气看重冬至节气个滋补身体,每到搿辰光侪要忙忙碌碌了操办补品、脂膏。到了现在,交关中医院和中药房侪会辣冬至前后聘请知名中医师开出冬令膏方门诊,根据客人个具体情况开出专门个滋补药方,然后药房可以提供加工服务,为客人制作出罐装定制补膏,邪气受欢迎。假使客人觉得呒没必要定制补膏,也可以选择购买知名品牌批量生产个中药补膏。另外,搿段辰光中药店卖滋补品、代客加工熬制驴皮膏唠啥,迭排里个生意侪相当好。
我记得老早阿拉屋里买勿起高档滋补品,外婆有辰光就为外公做眼花生、核桃膏,其实就是弄点客人送来个松散个核桃肉、碎花生、芝麻粉一道炒熟,再熬眼猪油加进冰糖趁热倒进炒熟个食材里拌匀,倒进砂锅里冷却。虽然呒没人参、黄芪搿排里药用功效,但食材也是有勿少营养嗰,老话讲药补勿如食补嘛。
对阿拉搿点小朋友来讲,迭股味道覅忒香噢!馋得阿拉老早就馋唾水答答滴。就算外婆再三关照阿拉:“小人覅贪吃,拨辛苦个外公好好交补补身体。”结果阿拉搿点小囡总归屏勿牢,常常趁呒没人注意个辰光去挖点吃吃。然后外婆就经常跟外公寻开心,讲:“侬吃得太快了。”外公听了就哈哈笑。其实老人哪能会勿晓得呢,就是勿讲罢了。
早前头11月底个天气已经蛮冷了,三九严寒就是从冬至日起算嗰,所谓:头九二九勿出手;三九四九冰浪走,搿是一年里向最冷个辰光了。五九六九沿河看柳,六九五十四,再冷呒意思,毕竟天气慢慢转向暖热了。春打六九头,五九结束以后就是立春节气了。从冬至到立春前个四十五天里,包含了阴历个腊月,搿段辰光要好好较利用。从前人家屋里呒没冰箱,缺少冷藏条件,勿少物事要靠浸冷水来保质。据老辈人讲,腊月里个水像雪水,用搿种水浸,食品就勿容易发臭。当时阿拉屋里过年前买回来个年糕,风干要开裂,焐辣海要发霉,只有浸辣水里才保险,用腊月水浸,就覅经常换水了。
冬至以后,最适合夏病冬治,像过敏性鼻炎、支气管哮喘、湿疹、荨麻疹、甲状腺功能亢进、泌尿系感染、慢性结肠炎,迭排毛病就比较适合辣搿歇辰光治疗。我记得老房子隔壁弄堂个阿三头,年纪轻轻就有哮喘病,久治不愈,后来听中医建议夏病冬治,坚持了几年就治好了。
冬至也是扫墓拜老祖宗个日脚,从前家家侪有“做冬至斋饭”个习俗,一家门坐辣一道感恩先人,阖家团聚共叙亲情。
![](http://imagev2.xmcdn.com/group10/M0B/C7/F3/wKgDZ1Zw_d7QfuCVAAFzHTtnbmM707.jpg!strip=1&quality=7&magick=jpg&op_type=5&upload_type=cover&name=web_large&device_type=ios)
声音简介
用户评论
表情0/300
音频列表
- 2023-02
- 2023-02
- 2023-02
- 2023-02
- 2023-02
- 2023-02
- 2023-02
- 2023-02
- 2023-02
- 2023-02
查看更多
声音主播
海海听书
gghh