广播专辑 弄堂茄山胡534 想起老早子个“排扇”

想起老早子个“排扇”
文/侯宝良
 现在国内疫情受到控制，各种经济活动纷纷复苏，几个老朋友就约好到饭店里解馋。翻开菜单，看到羊排、牛排、椒盐排条等交关带“排”字个菜名，忽然想起老早子曾经用过个“排扇”来。我就问：“啥人还记得老早辣大环境里用过个‘排扇’？”有后生家问：“阿是排气扇个简称？”


其实搿种“排扇”是一种“土电扇”，辣电风扇还呒没普及个辰光，会场、食堂迭些人多个地方空气往往比较闷，就有人发明了一种“排扇”来扇动空气对流，让在场个人有凉风习习之感。辣当时也算是一大发明，风靡过一段辰光。


“排扇”制作是按照空间范围个比例，裁制出适当数量个长方形纸板或薄木板，充当“扇面”。辣迭些板材顶端打孔，用一根横杆拿伊拉串起来，按一定间距固定，让伊拉可以前后摆动，横杆两端挂到屋顶浪，一端用绳索穿过固定个滑轮便于上下拉动，一组“排扇”就做好了。只要拉动绳索，横杆转动，就可以带动一排“扇面”摆动起来，一阵阵微风就辣房间里刮起来了。


“排扇”起初是靠人力拉动，后来改用电动机和曲轴来带动，比较大个会场里往往要辣屋顶下面装好几排，全部“呼啦、呼啦”转起来相当壮观。


 有小年轻听了侪觉得勿可思议，问：“当时呒没吊扇么？”我讲：“吊扇当然有，但是一台吊扇就要用一台电机，一只大会场往往需要装交关吊扇才够用，当时国家一穷二白，首要讲究是勤俭节约，改用‘排扇’以后只用一台小电机就可以解决一房间人个扇风，既便宜又省电。有种小单位个会场里还有勿装电机，完全靠大家轮流去拉个呢。”讲起老早子出力拉“排扇”个事体，几个老朋友侪有点唏嘘，想想现在到处侪有空调，辣当时是绝对想勿到个。现在覅讲“排扇”老早就消失了，就是蒲扇、折扇也往往只是充当“拗造型”个道具了。