寻回心里搿把扇子
侯宝良
最热个几天里碰巧空调坏脱，我只好寻出一把蒲扇来应急，轻摇扇子一丝凉风让我想起曾经发表辣《新民晚报》夜光杯浪个一篇小文《夏天里的扇子》，搿篇文章后来引起勿少读者朋友个关注。
福建个张女士讲改革开放后，伊拉屋里是最早下海个一批经商户，属于“一部分先富起来”个家庭，造起了漂亮个小洋房，还花几万元安装了当时很少家用个空调设备。起初，大热天里个凉爽适意和大冷天里个暖风习习让屋里人侪邪气开心。勿过，辰光长了，也就勿觉得了，惬意个生活反而让夫妻俩常常为企业经营浪向个细枝末节和家庭琐事闹起矛盾，有时火了，气了，感情起了波折。有一天高温碰着电路故障，供电公司呒没办法当天修好，有心脏病个张女士热得浑身汗趟趟滴，心情邪气烦躁，老公勿晓得从啥地方寻出来一把蒲扇，辣伊背后扇啊扇，阵阵凉风扇进了伊个心里向，让伊想起创业初期夫妻俩辣大太阳下互相揩汗，一瓶冰水也要互相谦让个生活。再想想现在个好日脚来之不易，自然修好了感情个缺失。
年轻个陆医生讲，看了《夏天里的扇子》让伊回忆起小辰光汏好浴，身浪扑仔痱子粉，辣阿奶扇子个凉风习习中，听着收音机里个故事和儿歌，慢慢进入梦乡。半夜里只要热了翻身，又是阿奶迷迷糊糊脱我扇风，伊种有韵律个“唰唰”声让伊至今难忘。所以陆医生看到老年病人，自然会想起自家和蔼可亲个阿奶，自觉激发起尊敬老人个情感。有年我辣病房里看伊查房过程中碰着一位脾气古怪个阿婆勿愿意配合护士打针，就是护士长来也对伊呒没办法。陆医生就耐心跟阿婆聊天，贴身倾听伊个啰嗦，等伊心情慢慢平复了，再好言开导阿婆，让阿婆欣然接受了治疗。当我跟伊回忆迭段往事，伊还记得阿婆年纪跟自家阿奶相仿。伊讲，我看见搿些老人，阿奶个形象很自然会浮现辣我眼门前，现在伊拉老了，轮到我哄伊拉了。
前年我老婆大病一场，我陪伊住院手术，望着昏睡个老婆让我是吃勿落、睏勿着。一个老婆个小姐妹来探望伊，勿忘拨我带一碗蛋炒饭，顿时让我邪气感动。人要懂得感恩，啥叫雪中送炭、啥叫情义无价，只要自觉去寻回心里搿把扇子，也就煞辣丝清了。
用户评论