(白)新鮮炒起,崧脆無比,買包一個仙士,買斤一個毫子。(介)哦,你又買,呢個又買,唔好爭,渣定錢,一一送到。(輕快譜子白欖)若問我貴姓名,好話啦,我姓賴叫做呀蝦。喂你近日來做盛行呀?我今年唔賣豆腐花,轉行賣花生。招牌寫住益食家。鬆就鬆過個舊薩琪馬,脆重脆過脆麻花。唔信不妨幫襯下,包保你都話頂瓜瓜。如過你唔試下就禾叉叉住個大三叉,變左差上差。(雙句)(轉二流)真係送得燒酒又送得茶(合)(轉三字經)細蚊仔共蘇蝦,佢見左我就手扒扒,口水爹爹帝,兼重依起棚牙。我地佛山講家下,但係省城就講而家,(二流)而家,而家,而家你地不妨黎試下(上)(轉喇叭進行曲)脆過脆麻花,唔怕震甩牙,試下快黎啦,零舍鬆和化(學爵士鼓音)沙沙蓬,蓬拆蓬,蓬蓬蓬,蓬拆蓬。(食住轉聯珠連序二流)我撈都撈到化(雙句),生意微毫我無得減價,斷無一時一樣價,就算中左馬票都唔會減價,真價真價,真價真價,情願發毛就罷。(士)一個仙士買一楂,確係相宜唔在話,買楂買楂,買楂買楂,係買就快趣黎,黎啦黎啦,黎啦黎啦(昭君怨)喂一仙咋,拎一楂,若係無錢就去揾呀媽啦,黎啦黎啦。不開價,不講大話,亞媽話個袋無錢揾呀爸。黎啦黎啦。花生最好送酒與共茶,係買就無所謂?不二價(一才)不買?不買就了罷,係買就快啦,包管你話頂呱呱。(收掘白)在下姓賴叫做呀蝦,自小就無左爸爸,自己就伶仃孤寡,同埋呀媽就只得兩仔乸,我排行最大,所以人人叫我做大少蝦,點知人叫下叫下,由大少蝦變左賴尿蝦,大少蝦賴尿蝦都係咁上下,雖然係啫,人地聽見肉都麻,你話幾冤哉枉也。唔怕,花名人人有,越叫得我行我就越聲價,總之呼我為牛者,我就應之為牛,呼我為馬者,我就應之為馬,有乜所謂呀,就算攞我便宜,你叫我做爸爸,我話嚇?我唔怕蝕底架,又叫番一句你做蘇蝦。好啦,休提閒話,我有個女朋友,叫做蔡阿花,係阿花都梗係靚,我雖則唔係同佢青梅竹馬,但係佢同我講左好多情話,今時又話將我嫁,都唔知真定假,咪啦,趁住今日閒暇,即刻走去佢家,揾佢黎問下,睇佢真定假。等我準備啲啲打打,早日同佢宜室宜家,共泛仙槎。看呀,就此登程去也。(介)走呀走,黎到阿花嘅住家,等我叫聲阿花,(介)唔叫得咁大聲,唔係驚動佢阿媽,就鬧死我呀。(細聲)阿花,嘻嘻,咁細聲佢又點聽到呀,叫下我生招牌,佢實出黎。(大聲叫賣花生狀)新鮮炒起,崧脆無比,買包一個仙士,買斤一個毫子。(關目見無反應白)咦點解呢?佢去左邊呢?咁就真係奇。(花下句)廿四小時不見她,教我如何不想她。
用户评论