甲：啥个物事顶重要？
乙：侬多问脱个，啥个物事顶重要，就是粘得开钞票呀。
甲：钞票顶重要？
乙：唉。
甲：好买甜个咸个吃。
乙：对。
甲：畀侬一麻袋钞票。
乙：谢谢，谢谢，我好发财了，一麻袋钞票。
甲：让侬一个人到沙漠里去。
乙：啥体？
甲：生活呀。
乙：到沙漠里去生活？
甲：唉。
乙：我勿要干煞脱个。
甲：人像梅干菜了。
乙：搿哪能吃得消。
甲：对侬讲钞票勿是顶重要了？
乙：搿倒是，对对对，水顶重要，现在世界浪缺水，西部地区也缺水。
甲：南水北调，水顶重要？
乙：水顶重要。
甲：拿侬厾辣长江里，四周围侪是水。
乙：好个我跳下去，我勿会搭游泳个。
甲：撩起来像胖大海。
乙：吃勿消，吃勿消。
甲：对侬讲水也勿重要个了？
乙：侬看啥个物事重要？
甲：我看啥个物事重要，位置。
乙：位置，啊呀，侬讲得对。位置顶重要，阿拉屋里向我就吃迭个苦头。
甲：哪能了？
乙：阿拉爱人买个位置就是椅子了，侪有把手，我掐也掐勿进去。
甲：我讲个勿是坐个位置。
乙：啥位置？
甲：我讲个位置就是一人做人所处个地位，迭个位置。
乙：哦，迭个位置，迭个位置啥重要了？
甲：位置重要个，有了位置可以发挥侬聪明才智，没位置，侬只好神志无主。
乙：侬看我啥位置？
甲：侬到台浪。
乙：滑稽演员。
甲：侬到商店里。
乙：顾客哇。
甲：饭店。
乙：吃客哇。
甲：书场。
乙：听客哇。
甲：游山玩水。
乙：游客哇。
甲：坐出租汽车。
乙：乘客。
甲：借人家房子。
乙：房客。
甲：玉佛寺烧香。
乙：香客。
甲：红茶坊吃茶。
乙：茶客。
甲：肯德基吃肯德基。
乙：陪客。
甲：哪能迭个是陪客了？
乙：我年纪大了，牙齿勿来三，带仔孙子去吃，伊辣辣吃，我陪辣旁边。现在陪客蛮多个，样样侪做陪客个。
甲：侬专门欢喜弄松人家，戳人家壁脚个。
乙：促掐哇。
甲：讲闲话恶语伤人。
乙：恶掐。
甲：自己拿勿着奖金还要撬脱人家。
乙：迭个是撬，啥体我侪是撬客，我没。
甲：侬撬客勿做个。
乙：勿做个。
甲：难般弄松人家促掐做个。
乙：也勿做个。
甲：迭能一讲侬对自己身处个位置蛮清爽个吗。
乙：搿哪好勿清爽呢，勿清爽我变老年痴呆症了。
甲：一个人晓得自己个位置并勿一定能够摆准自己个位置。
乙：哪能？
甲：叫知易行难。
乙：搿有啥难了，便当来兮个。
甲：便当，勿便当啊，要根据勿同个场合，勿同个地点，迭个位置要勿断辣转换个。
乙：侬勿要转换。
甲：勿要转换要错位个。
乙：勿会错位个。
甲：譬方讲我辣单位里是领导，我跑到外头去我去旅游。
乙：仍旧做领导。
甲：我领导啥人，我变导游了。我辣单位，我是领导，我可以指手画脚，我到外头去乘公共汽车。
乙：也是一样个吗，辣单位里向指手画脚，到外头乘公共汽车，侬也好指手画脚个吗？
甲：公共汽车勿要相鼻头啊，那我变交通警了。我辣单位是领导，我说了算，我到银行里去领钞票。
乙：搿么侬也好说了算吗，对�？
甲：银行是我开个，我又勿是银行行长。我辣单位里是领导，厂里向大大小小个生产听我个，我到产科院去望病人去。
乙：两个产姆娘生儿子生女儿听侬个。
甲：我本事介大啊，养男养女我也管得着啊，迭个我也管得忒宽了，迭种辰光就勿能以领导自居，位置就要转换了。
乙：要转换，我懂了，要转换。
甲：比方讲我辣屋里我是家长，我到了外头以后。
乙：就勿是家长。
甲：对啊，比方讲我辣屋里我是家长，我可以指手画脚个，到了外头马路浪向。
乙：就勿可以指手画脚。
甲：唉，对了，到了屋里我是家长，我到学堂里去开家长会个辰光。
乙：就勿是家长。
甲：勿是家长我去开家长会去做啥，侬是混进去，侬是混账了？
乙：侬也没讲闲话一歇进一歇出个呀，一歇辣屋里，一歇到外头来了。
甲：一日到夜到马路浪勿要伤风啊。比方讲我辣屋里向我是家长，我到学堂里去，开家长会个辰光。
乙：是家长。
甲：我辣屋里向我是家长，我辣学生手册浪签名个辰光。
乙：是家长。
甲：我辣屋里向我是家长，我到幼儿园去领小孙子个辰光。
乙：我也是家长。
甲：我是爷爷。
乙：他是孙子。
甲：我辣屋里向我是家长，我到动物园去看猴子个辰光。
乙：也是家长。
甲：它是小猢狲。
乙：我是老猢狲，我变猩猩了。
用户评论