薄饼切丝炒来吃
侯宝良
之前看到西坡老师写个《煎饼果子》一文，忽然想到阿拉上海人欢喜吃个“薄饼”。冷薄饼还可以切成丝炒来吃，味道老赞嗰！退休前我经常出差到中原地区，迭搭地方个炒饼算是一道特色小吃。正好我迭个南方人也欢喜面食，啥样个面制品侪喜欢弄眼吃吃，对迭种炒饼百吃勿厌，后来有朋友告诉我，山西长子县个炒饼自誉最正宗。
有一趟我正好出差到山西长子县，看到街浪鳞次栉比个小餐馆家家侪有炒饼，而且花色品种邪气多。其中一款酸辣炒饼美味无比，让我一吃难忘，尤其让我长见识个是还晓得了一点炒饼个历史。听小店老板讲，炒饼辣当地又称“炉卜”，清朝有个书法家冯士翘有次出游到发鸠山，路浪到一家农户讨水喝，主人家邪气好客，顺便留冯先生吃饭，吃个就是炒饼。冯先生尝过以后，赞勿绝口，问迭种美味叫啥？主人讲：“是粗粮做个饼，叫‘炉卜’。”先生后来还赋诗一首：“徒步特游发鸠山，漳河源头绿水翻。下山行到石哲村，进室解渴来打尖。主人端出待客饭，粗粮细做炉卜香”。先生个妻子晓得伊欢喜吃，也学仔做搿只菜，就是做勿好。有一天，伊就到石哲村向搿位农户请教，回去以后又按先生个口味炒了盆酸辣肉丝炒饼拨伊品尝，先生大加赞赏，称伊个手艺“天下一绝”，搿只菜就此辣当地传开了。后来又流传到河南、陕西各地。
其实薄饼冷脱以后又干又硬，邪气难咽。干脆拨伊切成条，要么切成丝，加点辅料，放到油里炒，勿失为是一样美味小吃，就像阿拉南方个炒面一样，味道邪气好。搿种改良食品就像用隔夜冷饭做蛋炒饭、咸泡饭一样，经过巧妙加工，又变成一种舌尖浪个享受。
我欢喜吃炒饼，但是上海个饭店里勿多见，所以只好自家摸索制作方法，早浪多做点鸡蛋薄饼当早饭，吃剩下来个薄饼就切成丝放辣冰箱里囥起来，想吃辰光只要拌点笋、茭白或菌菇，就可以做成素炒饼。有辰光买点肉类半成品，还可以做成荤炒饼，比如五香肉丝炒饼、咖喱鸡丝炒饼咾啥，既方便又实惠。
现在我做个炒饼勿仅自家人喜欢吃，亲朋好友也赞勿绝口。有一趟，同事带来几位山西客人，看我做炒饼邪气熟练，还以为我是北方人。
用户评论