广播专辑 弄堂茄山胡697 孵日头

孵日头


文/侯宝良


“我辣‘孵日头’，嗨！就是‘孵太阳’呀”！我拿仔手机坐辣大阳台里，暖洋洋个太阳光下头跟老邻居阿根通过手机视频“茄山河”，一道回忆老早住辣老房子里“孵太阳”个事体。


 老早外婆常常辣大冷天里关照我：“今朝日头好，快点到马路对面去孵日头！”搿是我忘记勿脱个乡音。


 老房子是一间朝北个街面房子，到了冬天基本是晒勿到太阳嗰。西北风从窗缝里钻进来，就是困辣被头筒里也冷得“呱呱抖”。葛老到了出太阳个日脚，端把小椅子去南面上街沿“孵太阳”就是小辰光欢喜做个事体。记得南面上街沿有一个“小书摊”，假使手里有几分洋钿，我最欢喜坐到“小书摊”旁边，一边“孵太阳”，一边借几本小人书看，几本看光，外婆差勿多就会来喊我吃中饭了。


 阿根听了我讲个闲话，叹了一口气，讲：“侬是惬意嗰，我就呒没搿种福气了，因为我辣屋里是老大，要帮忙做家务嗰。冬天屋里需要晒太阳个物事覅忒多，大清老早就要拿仔长竹凳、大竹榻去人行道浪抢位置，棉被、棉花胎、垫被侪要拿出去晒。”埃歇辰光家家人家侪辣上街沿拉绳子、搭架子晒物事，远远看过来就像侪辣摆“旧货摊”。搿种景色就是老底子老城厢里见多勿怪个风景线。


 除脱穿个衣裳、盖个被头需要晒，还有勿少食品也是需要晒个，比如：水磨粉、年糕片、山芋干之类，特别是冬至以后，过年之前，大家侪辣忙年货，做圆子个水磨粉是少勿脱嗰，而要让水磨粉勿容易发霉，就必须晒干水分。晒水磨粉蛮麻烦嗰，先要拿粉块掰开，捏散成粉，铺开辣竹编簸箕里，再辣上面罩一块透明塑料布，搿块塑料布既能防灰尘，又能防止刮大风吹散水磨粉。搿能晒脱一歇以后，还要有人动手上下翻搅，让水磨粉受热均匀，彻底晒干。最后用饼干箱或者陶瓷瓮拿水磨粉装起来，假使再放几包石灰防潮就更好了。有了干燥个水磨粉就可以随时随地做圆子吃了。讲到吃，阿根也开心起来，讲：“对嗰呀，埃歇辰光爆炒米花个辰光加点年糕片，吃起来就像现在个‘旺旺雪饼’，刮辣松脆。”


埃歇辰光冷天“孵太阳”个人多，地方紧张，就难免要看南面人家个面色，想想蛮齁势（憋屈）。有一趟冲突起来，旁边邻居阿婆就老客气招呼我：“来，弟弟到阿拉门口来晒晒。”还趁势开导人家：“朝北房子阴湿，多体谅一点人家个苦恼，做人乐开一眼，好人有好报，长寿！”


现在到马路边浪“孵太阳”个场面已经看勿到了，勿过趴辣屋头顶浪“孵太阳”个物事到是多起来了。阿根拎勿清，问我：“啥人吃饱呒没事体做，跑到房顶浪去？”我开导伊：“太阳能光伏板呀！”