买书勿如借书
作者:曹正文
改写:俞镝
讲述:冯蓉
买书勿如借书,搿句闲话来源于清朝袁枚个《黄生借书说》:“书非借而勿能读也”。因为借得来个书必须及时还拨主人,逼牢仔借书个人抓紧读;而买得来个书,总归是自家个,摆勒书架子浪可以慢慢叫看。辰光一长,也就记勿得了。
袁枚搿句闲话,作者是深有体会个。1966年因爷娘买过股票,拨抄家了,当时屋里人面皮薄,看到邻居抬勿起头,于是,就想调个环境。天一黑,我就陪牢仔姆妈,拎好浆糊桶,拿勒写好个“调房启事”电线木杆浪张贴,看到有人来看,马上声明:阿拉贴个是调房启事。
没过几天,有人打电话来,约阿拉去看房子。有一家距离阿拉屋里勿远,姆妈让我去看看。敲门进去,是位年过半百个老先生,我一进去就吃了一惊。一大间,25平方米,没啥家生,一圈侪是书橱,只有一只写字台,旁边有只衣架,有几件衣裳挂勒海。让我特别好奇个是,主人居然勒叠起来个书浪向,搁了块木板,上头铺勒床单搭仔被头,我笑了:“老先生睏勒书浪啊。”老先生姓袁,伊自我嘲笑:“我是上海人民出版社个编辑,睏勒书浪,随手拿书便当呀!”
想想也是个,抬手就好拿一本想看个书,开心伐啦!当时,我屋里拨抄家之后,手头欢喜个几十本书搭仔黑胶唱片,侪作为“四旧”拨拿走了,正愁呒没书看,看到一房间个书,立时三刻眼睛发亮。
袁先生看到我露出来个羡慕之情,猜出我个心思,讲:“侬也欢喜看书啊?”
我就拿每日天吃一根油条一只大饼,一碗豆腐浆个早饭铜钿,省下来4分洋钿,日积月累,买了几十本心仪个书讲了一遍,又叹口气讲:“现在侪呒没了。”
袁先生邪气大度:“我好借拨侬个,但侬勿好搭人家讲。”
我马上答应,满房间个书,还有一只小间,也是“书库”,少讲讲也有上千册,看得我眼花缭乱,一时头浪勿晓得借阿里本好。袁先生就指牢一大堆杂志,“侬假使欢喜普希金、雪莱个诗搭仔莎士比亚、果戈理、契诃夫个文章,可以先读搿套杂志。”
我拿过来一看,原来是《译文》,又听袁先生讲:“《译文》最早是鲁迅先生勒1934年创办个。1953年由茅盾任主编个《译文》出版,到1959年更名为《世界文学》,从1953年到1966年个杂志,我搿搭侪有,侬可以借得去看个。
我一听,邪气开心,豪扫连连鞠躬,表示感谢。
就迭能,我每次借三本《译文》,五天之后还得再借,前前后后有得半年辰光,拿全套《译文》《世界文学》侪认真读脱了,并且,拿欢喜个诗文侪抄录下来了。
因为袁先生个藏书主要以外国文学为主,我又借了蒙田个《随笔录》、西班牙小说《小癞子》、笛福个《鲁滨逊漂流记》、薄伽丘个《十日谈》,还有高尔基个自传体小说。
让我惊讶个是,除脱中国大陆版个外国文学,还有勿少直排本个港台版欧美小说,因为是繁体字,我一时头浪还看勿明白,搿能读仔半年,再学会了读繁体字直排本,搿对我后首来读中国古籍原版打下了一眼基础。
搭袁先生调房呒没成功,我屋里搭南京西路一家人家完成了调房意向,没想到办手续个辰光,房管所发现阿拉两家侪抄过家,讲是“漏网户”,于是双双拨收脱一间房间,房子呒没调成,还少了一间房,真个是后悔啊!。
有辰光,勿动是最好个;急勒海动,就会得失败。
勒搿次调房风波中,我唯一个收获是多读了几十篇欧美文学作品,我拿借读抄录个普希金、拜伦、海涅、济慈、雪莱、歌德、裴多菲……还有印度诗人泰戈尔个诗,编成功一本《外国抒情诗一百首》,搿是我沮丧当中唯一个安慰。
用户评论