广播专辑 弄堂茄山胡130 老屋里 老邻舍

广播220 弄堂茄山胡 老屋里 老邻舍

来源：新民晚报   作者：程多多   新民网编辑：王玲


　　 【新民晚报·推荐】延庆路是上海西南角浪向一条带眼弧形个小马路。伊个方向大至是偏西朝北个走势，总长勿会得超过500公尺。因为迭个地方老早地属于法租界。所以整条马路边浪个房子侪是法式洋房，楼梯做垃拉房子外面个。尤其是靠近华亭路埃段，从135号到147号迭个七幢房子，里外格局是一式一样。

　　 从上世纪50年代中开始，我就跟爸爸姆妈，阿拉一家门垃拉延庆路141号生活了交关辰光，一直住到80年代中。我除脱记牢141号是唯一一幢用红砖砌出来个外墙之外。还有一个自家认牢个巧开，就是随便从阿里一头算起.伊总归垃拉当中一幢。乃末到了上个世纪60年代中期，每到夏天介个夜到头，我爸爸垃拉一天劳累个绘画之余，经常会得喜欢放大喉咙来上一段大面个唱段，边浪向我帮伊嘘滤嘘滤吹笛伴奏，有常时顺风可以飘得老老远，讲伲两家头制造了嘈音，从来也呒没人来投诉，想想一定是阿拉唱得还算可以，不过有常时会唱错或走调，乃末引得左邻右舍哄堂大笑。

　　 印象当中，周围住了交交关关有名人物。比如讲135号是上海市肺结核防治所。里向边朱晔医师是我阿妈娘面浪个远方亲眷。137号住个是位解放军首长。有一日伊拉一家们突然垃拉三楼阳台浪穷放炮仗。我就辣海奇怪，又勿是过年为啥要放炮仗？摆垃拉今朝，就晓得是有人结婚哉。勿过挨个辰光是60年代初啊，后来再晓得是首长荣升少将了。139号是留美归国个大名鼎鼎个肺科专家钱慕韩医师。我小辰光搭伊个小儿子一直白相个，关系倒是蛮要好个。乃末马路对面是电影界明星沙莉个屋里，后花园窗对窗是丁是娥个屋里向，依拉两夫妻侪是唱申曲个大明星，“文革”当中是吃煞苦头啦。141号原本是上海人民美术出版社个宿舍。一共有三层楼面，三层楼住了三位画家。一位是罗盘老师。隔壁是画家王仲青搭吴性清夫妇。不过王先生可是道地个成都人，伊只要起只油锅爆起辣椒来是真正吃勿晓，乃末楼上楼下人家房门统统一道关门，啥人家关得慢一眼，就会辣的侬是眼里水鼻涕水溚溚滴。二楼大房间是我伲程家。边浪是连环画家韩和平老师屋里。韩老师勿但教我画连环画个绝巧，还是我喜欢听西洋古典音乐格启蒙老师，为啥呢。因为伊有一只老爷唱机，囥了交关多七十八转个胶木老唱片，我常常做个事体就是帮伊放唱片、换唱片、翻面、调唱针搭摇法条，记得RCA个老唱片浪外文我看勿懂，只是因为画有一只狗跟一只大喇叭，我就叫依“狗听牌”。记得当时放得最多个是德伏夏克个《自新大陆》搭仔柴可夫斯基个《天鹅湖》。伊还创作个连环画《铁道游击队》，画得邪气赞。

　　 再后来我也去了美国，我爷娘一家门也搬忑了。有一趟我特特为去老屋里看看，发现141号沿马路楼梯依旧，但人去楼空。