所以我习惯咗一个人，亦都冇倾得埋嘅朋友，直到六年前，我嘅飞机被迫降落喺撒哈拉沙漠。飞机嘅发动机坏咗。我嘅身边冇机械师，亦都冇乘客，我唯有一个人试住去整翻好架飞机。
嗰时我真系到咗生死关头，剩低嘅水最多只系够饮八日。
第一日，我训喺沙上面，周围上千英里，都冇一个人。我简直比喺海上面遇到海难嘅人更加无助。所以，喺黎明嗰时，当有一把细细声，但系好奇怪嘅声音叫醒我嗰时，你哋可以想象到我系几咁嘅出奇！呢把声话：“唔该你帮我画只绵羊啊！”
“啊？”
“唔该帮我画只绵羊啊！”
我成个人扎起身，好似俾雷劈中咁样。我用力咁捽对眼，认真咁睇。我睇到一个奇怪嘅细路仔企喺隔离，认真咁望住我。
呢幅系我后来尽力帮佢画嘅画。
当然，我画得肯定冇佢本人咁得意啦！
呢个唔可以怪我。
六岁嗰年，大人就令我放弃咗做画家嘅梦想，除咗嗰两条蟒蛇，我乜都冇画过，我mak1大对眼，出奇咁睇住佢。
咪唔记得，我离任何有人住嘅地方都有几千英里咁远。
而面前呢个细路仔，佢既唔似荡失路，亦都冇饿到死，颈渴到飞起，或者惊嘅样。
佢嘅表情，一啲都唔似一个喺沙漠荡失路嘅细路仔。
等我镇定落嚟之后，我话：
“但系，你喺度做乜嘢啊？”
佢只系慢慢咁重复咗啱先嗰句话，好似嗰件事好重要咁。
“唔该帮我画只绵羊啊！”
当你俾神秘嘅事物镇住嗰时，你系唔咁唔听话嘅。
虽然我知道周围上千英里都冇人。
我亦都有死亡嘅危险，咁样做真系好荒唐，但系，我谂起，我只系学过地理、历史同语文，所以我好唔耐烦咁同呢个细路仔讲，“我唔识画画”。
佢话“冇问题啊，帮我画一只绵羊啦。”
我从来冇画过绵羊，所以我就画咗之前嘅两幅画里面嘅其中一幅，嗰条肚皮合埋嘅蟒蛇。
我好出奇咁听到佢讲：
“唔系啊，我唔想要一条吞咗一只大笨象嘅大蟒蛇，蟒蛇太危险啦，大象又太大啦。我屋企好细，我想要一只绵羊。帮我画一只绵羊啦。”
于是我又帮佢画咗一只。
佢好认真咁睇，跟住话：
“唔要呢只，呢只羊病咗，画过只啦。”
我又画咗一只。
我呢个朋友笑咗，佢话：“你睇吓，呢只唔系绵羊，系山羊，佢有两只角。”
于是乎，我又画咗一只。
同前面嗰两幅画一样，呢幅画亦都俾佢拒绝咗。
“呢只羊太老啦，我想要一只可以生活到好耐嘅绵羊。”
我冇晒耐性，因为急住要将发动机拆出嚟，于是乎我求其画咗一幅，我随口话：“呢个系一只箱，你只绵羊喺里面。”
但系我惊讶嘅系，呢个小评委好开心：
“呢只就系我想要嘅羊！你话，呢只绵羊会唔会食好多草呢？”
“点解咁问嘅？”
“因为我住嘅地方非常细。”
“应该够大㗎啦，我俾你嘅呢只绵羊都好细。”
佢耷低头睇嗰幅画：
“佢都唔系好细啫...哎！佢训着咗喔...”
就咁样，我识咗小王子
小十月__
声音很美