广播专辑 弄堂茄山胡90 马路浪向“看野眼”

广播专辑 弄堂茄山胡90 马路浪向“看野眼”

2013-07-22 09:53来源：新民晚报          新民网编辑：田诗雍    作者：潘志豪
 
　　本人有个改勿脱个习惯———马路浪向“看野眼”，尤其是看各种店招。
　　我发现，现在老板门槛侪老精个，国际形势跟得特别紧。前几年，美国人辣伊拉克闹得鸡飞狗跳，有家服装店就灵机一动，打出招牌———“衣拉客”，意思是用出挑个衣裳拉牢顾客，搭“伊拉克”音同字不同。还有一爿卖金金鱼个小摊头，虽然一咪咪大，老板倒勿觉得寒酸，自称“钓鱼房”。前段辰光，阿拉国家个钓鱼岛出名了，老板索性改名叫“钓鱼岛”。有人问伊：哪能变“房”为“岛”了？老板面孔一本正经：用实际行动支持政府！
　　店招就是商店个一张名片，要拿这张名片做好也勿大容易。比如，有家大卖场叫“百脑汇”，叫人会想起纽约个“百老汇”，而且一看就晓得是电脑大卖场。
　　现在个商家为了吸引顾客，店招弄得让人眼睛发花。一次，乘公交吃红灯，见路口一块招牌上写仔四个大字：“高等发院”，此“发”非那“法”，原来是家理发厅。来做一次头发，就要进一次“高等发院”，想想真有点汗毛凛凛。
　　讲到美容行业，奇出怪样个店招勿勿少少。有叫“头等大事”个，有叫“顶上功夫”个，侪是用了一番心思。听一位老先生茄山河讲：有家美容院快开张了，店招一直呒没定下来，老板急出乌拉，通过熟人请到一位名画家帮起名字。画家想仔一歇歇，马上拍板：“叫‘要侬好看’！”凭凭良心讲，迭个名字倒蛮新鲜。啥人晓得老板理解有点偏、勿中意，结果到现在“要侬好看美容院”还呒没登场。
　　现在店招特别讲究谐音。比如，卖粥个叫“粥天粥地”、“著名粥家”；卖服装个叫“衣衣不舍”。不过，谐音是把双刃剑，弄勿好就会出洋相。比如，美甲店叫“甲情甲意”，难免让人家想到假情假意；有家烧烤店大概老板是个大辫子姑娘，就叫“大辫烧烤”，大辫搭大便是一样个发音，侬讲恶心?？还有个饭店居然叫“饭醉团伙”、“醉大饿急”，简直是胡说八道了！