广播专辑 弄堂茄山胡179 “㑚上海人真好！”

“?上海人真好！”  
 
钱红春  
 
　　一家果蔬合作社每个礼拜日要到阿拉小区摆摊头卖菜，负责卖菜个是一对来自外地个夫妻，男个负责称分量，女个只管收钞票。小菜勿但新鲜，价钿也比菜场便宜，所以邪气受欢迎。因为每样菜个价钿勿一样，所以规定一只马甲袋只好装一样菜，因为只有一台电子秤，菜选好以后要排队称分量付钞票。

　　张家阿婆屋里吃饭人多，每次总要买交关菜。伊来买菜，欢喜拖一部带布袋袋个小车子，拿选好个菜装进马甲袋，再放到车子浪个布袋袋里，轮着伊称分量，再一袋一袋拎出来，等付好钞票，就通通装到布袋袋里拖回去，搿个要比一直拎辣手里轻松交关。

　　搿天伊拿菜拖回去，呒没多少辰光，只看见伊又朝菜摊头跑过来。正辣辣排队称分量付钞票个人看见伊急急忙忙个样子，有点人就讲：“阿是啥物事忘记脱了。”有人讲：“讲勿定是啥个菜漏买了，再来跑一趟。”正当大家议论纷纷个辰光，张阿婆个身影由远而近，看见伊手浪拿仔两只番茄，大家又是一阵好奇：“阿是回到屋里发觉有两只坏番茄，要来调个。”有人摇摇头：“勿对，今朝番茄蛮新鲜，一只坏个也呒没。”有个人讲：“弄得勿好是买得太多，来退脱个。”又有人连忙讲：“喔唷，两只番茄又呒没几钿，多就多点，有啥啦？”大家正七嘴八舌，张阿婆已经来到摊头边浪。

　　勿晓得啥道理，平常大家排队，顶怕碰着会“搞五搞六”个人，勿但会弄乱秩序，还会耽搁辰光，碰着搿种会搞个人，难免有人发点牢骚。啥人晓得搿天听仔张阿婆个解释，大家非但呒没闲话，还纷纷对伊谦让，搿是啥个道理呢？

　　原来，张阿婆回到屋里，来勿及歇歇脚，就拿菜一样一样拎出来，拎到最后，发觉袋底还有两只番茄。起先伊想阿是装番茄个马甲袋呒没扎紧，一路颠发颠发滑出袋口滚落到袋底，但看看装番茄个马甲袋，袋口扎得邪气牢，随便哪能勿会滑出来。再仔细想想，大家选好菜装进马甲袋后一般勿会扎紧袋口，因为有点菜外头看勿大清，比方黄瓜就有好几种，价钿侪勿一样，要打开袋口看清爽再好称分量，否则就要搞错脱。假使选菜辰光就拿袋口扎紧，再一样样解开来看清爽称分量，乃末排队个进度就会变慢。搿能一想伊就明白了，迭两只番茄一定是选菜辰光颠落到袋底，称分量只称仔马甲袋里个番茄，呒没发觉袋底还有两只番茄，迭两只番茄既呒没称过，也呒没付过铜钿。伊心里想，人家起早摸黑到阿拉小区摆摊头卖菜，赚一眼钞票勿容易，迭两只番茄虽然勿值几钿，但也要算算清爽，勿好让人家出仔力气还要吃亏。想到此地，伊拿仔两只番茄就往门外跑。

　　张阿婆拿仔两只称好分量、付好铜钿个番茄，同排队个人打声招呼就朝自家屋里走去，脚步比刚刚要轻松交关。

　　男摊主讲：“阿拉到上海卖菜已经好几年，搿种事体还是头一趟碰着，?上海人真好！”排队个人听仔搿句闲话，侪邪气捂心。