广播专辑 弄堂茄山胡188 好白相个“糖纸头”

好白相个“糖纸头”  
 
侯宝良  
 
　　讲起白相“糖纸头”辰光有眼远了，相信现在六七十岁个老人侪会打开尘封个记忆，回顾这段充满童趣又难忘个经历。

　　“糖纸头”就是糖果防潮、防污个包装纸，基本材质是蜡纸或透明薄膜纸（又叫“玻璃纸”），包装方式勿外乎手工两头旋转，要么机器折叠包装两种。埃个辰光，“糖纸头”浪向往往会印刷各种图案，有花卉、动物、戏剧脸谱咾啥，相当漂亮，讨人欢喜，而且属于废物利用，不需要爷娘再花钞票，白相“糖纸头”就成了风靡一时个童年乐趣。

　　每逢过年就是“糖纸头”个丰收季，小朋友勿管去哪个亲戚家，侪有糖果奉送，自然就能收获交关“糖纸头”。平常辰光则只好到废纸篓里捡拾，或与其他小朋友交换。不过，只有品相好且图案稀缺个“糖纸”才有交换价值。勿要看懵懂小屁孩，门槛侪蛮精个。讲品相就像鉴定文物，平整、无污、勿破都只是基本要求。可是，从糖果上剥下来个糖纸头怎么可能平平整整，一点龌龊都没有？所以就要掌握一套办法，把糖纸整旧如新。

　　如果“糖纸头”是蜡纸材质，只要把纸上蜡加热，让蜡稍稍融化抚平整就可以了，一般可用熨斗，也可在玻璃杯里倒入开水，用杯底慢慢烫平纸上皱褶。

　　如果是玻璃纸，加热熨烫就不行了，否则会变形，只能先浸水，再揩干水渍，贴在餐桌或写字台的玻璃板下慢慢晾干和压平，几天后取下，保证张张平整如新。

　　如果糖纸上有黏附糖果残渣或龌龊，一般可以用肥皂水轻轻擦拭，绝对不能用橡皮或刀片刮，否则“糖纸头”就被糟蹋了。

　　对阿拉这一代来说，白相“糖纸头”是很有趣个课余生活。当时每天有小小班活动，大家先把功课做完，然后各自拿出收集个“糖纸头”来扎台型，有人把一张张糖纸夹在书里，也有人专门准备了收集册，就像集邮簿。如果看到别人拿出没见过或稀缺个“糖纸头”，想要，那么只能用自己个收藏却换。记得有位同学经常能拿出新糖纸，不仅图案新颖，有些甚至是没有使用过的，特别受到周围小朋友欢迎。原来伊有亲眷辣辣糖果厂工作，常常带些新糖纸拨伊白相。

　　白相“糖纸头”还培养了不少人爱好美术绘画个兴趣。糖纸上个花朵、风景、人物、脸谱、卡通形象都是临摹目标，起初只是一张张幼稚涂鸦，慢慢地就成了一幅幅作品。事实上，我对绘画个兴趣就是从画“糖纸头”开始个。当时还有一位戴同学与我一样爱好画“糖纸头”，但比我有出息，伊画着画着就成了画家。

　　如今，我经常对一些朋友讲，勿要惊叹现在个小囡会白相变形金刚、电子玩具就多聪明。阿拉白相“糖纸头”个辰光，上辈人看到乱七八糟个糖纸头辣辣阿拉手里变得“赤刮拉新”，看到不用花钞票请老师也能画出有模有样个图画，同样会挑起大拇指，称赞一句：“小家伙勿简单”。