广播专辑 弄堂茄山胡182 老积木搭起来更扎劲

老积木搭起来更扎劲
任向阳
　　文 / 任向阳

　　走到老王拉小区进门口，搿只三角尖顶横辣两根柱头浪个大门头，看看好像蛮眼熟——迭个设计师小辰光肯定搭过积木个,搿种式样每套积木侪变得出来。

　　积木是小人侪欢喜个白相干【玩具】。携开（揭开）装积木个硬板纸盒子盖头，五颜六色个积木拍拍满满排了一盒子，有得短方、中方、长方，小三角、大三角，半圆、长圆，短薄条、长薄条，还有月洞门、罗马柱咾啥，搿眼大大小小个积木轧辣一道，组成了一大幅花花绿绿、弹眼落睛个图画。交关小人侪是“哗啦啦”个拿积木一记头（一下子）倒辣台子浪，先搭地脚，再砌墙头，撑好柱头，再搭正梁。一块一块个从乱七八糟个积木堆里向拣出勿同形状个“建筑材料”，搭出自家心里向想个房子来。搭好了，倒勿是一块块拆下来个，好像呒没一趟勿是乒令乓冷推倒脱个。为了重新再搭，呒没人肉麻【心疼】费心费力刚刚搭好个漂亮来死个房子。推倒个辰光反而有种莫名其妙个兴奋感。

　　搭积木讲究对称，两横头要一式一样个，当中间里侪是门厅咾啥大件头。横里稳扎了还要看竖里高勿高，积木竖搭个层次越多，就越容易晃里晃荡勿平衡，葛末就越加难，搭到四、五层高了还想加只尖顶或者半圆顶做装饰，搿个辰光假使勿当心，就会得头重脚轻坍下来。拿全部积木侪用辣一道，搭成功一幢高低错落个大洋房，搭一趟换一种式样，告咾百搭勿厌。白相出花样来个，还有得用薄板搭个有两面斜坡个木桥、跷跷板、有得踏步个滑滑梯、长鼻头个汽车、伸出大炮个坦克、两头翘起来个元宝船，还有宝塔、小亭子咾啥。真是拿到手里侪是宝，变来变去老灵巧。

　　现在想想，搭积木除脱好白相，对小人个成长有得蛮大个好处。辣搭积木个过程当中，小人个手要用到抓、提、拈、撸、翻、转、按、捏、扶、推咾啥交关动作，搿个就有利于增加告手指活动相对应个大脑皮质感觉活动区个脑血流量，会得让思维更加敏捷。搭积木还可以提高动手能力，促进手告眼睛之间个协调，让小人个视觉、触觉、想象能力告创造能力侪有得长进。告咾名气老响个大教育家陶行知先生要写歌谣劝大家注重小人手脑并重：“ 人生两个宝，双手与大脑，用脑不用手，快要被打倒。用手不用脑，饭也吃不饱。手脑都会用，才算开天辟地的大好佬。”

　　现在呢，搿种介个单面搨【涂】漆个木头做个积木已经比较少见了，玩具店里卖个主要是各式各样个塑料积木。塑料积木是立体个、颜色比较和顺、手感也相当适意、搭起来更加牢靠，整体造型也蛮厚实个。有个塑料积木还上下开好仔榫头，块块相扣，小人只要拿积木“对号入座”，搭起来交关便当。另外还可以辣电子游戏当中白相搭积木。不过我也听到有位家长讲：假使塑料积木勿要一套只能够搭一种固定个式样，让小人自家辣白相当中去变出花头来，葛末就更加灵哉。