漂洋过海一唢呐（附文字）

该一段音乐大家应该侪听得出来是啥个乐器吧！

       对个，是唢呐。

       该个几年，民族乐器因为《百鸟朝凤》《闪光少女》等电影，还有《国家宝藏》《国乐大典》之类个综艺节目，亦慢慢叫个回转到大家个视线里哉。

        而唢呐，因为声音嘹亮高亢，穿透力强，能以一己之力抗衡整个乐队，而得名“流m乐器”，拨网民津津乐道。

       而大家弗晓得个是，伲听见个该个一段音乐，倒是一只道地个古巴西班牙语歌曲，而弗是民乐。

       我勒海古巴留学个辰光发现，拉美人民个日脚真真叫快活，一言弗合就跳舞。平常辰光拍手唱歌就能跳起来，碰着重大节日就更加哉。锣鼓家生侪掇出来，吹拉弹唱，扭腰摆腿个。

而走勒游行队伍里向，最弹眼落睛个就是吹喇叭个人哉：音量大，吹得起劲，一面吹还一面跳。

       我头一埭看见个辰光还有点疑惑疑注，边浪个小朋友也拉牢仔我个臂膊嘭嘭嘭个拍：“倷看，倷看，搿个阿是唢呐啊！”

       但不过伲人勒海古巴，吹喇叭个也弗是国人，网络浪向寻寻亦无不资料，总归弗大敢认。

       一直到着着后来，看见仔一则新闻，讲个是古巴狂欢节，我再晓得，原来伲看见个，真个是唢呐。

       其实骨仔，唢呐也弗能算是土生土长个中国乐器，俚是勒海公元三世纪码样，从波斯、阿拉伯一带传进来个。

       勒海漫长个历史里慢慢叫个融合进仔伲中国个文化里，勒古代也进过军乐，民间更加多个是用勒海红白喜事里，拨人戏称是一种“从养出来吹到翘辫子”个乐器。

       近代个影视作品里，也一径用唢呐音乐来表达侠义、英雄、拨云见日等比较大气个场景。

       譬方说老版《水浒》个主题曲《好汉歌》、经典个配曲《王进打高俅》

《太极宗师》主题曲《英雄谁属》、自带音响个黄飞鸿个经典BGM《男儿当自强》（改编自古曲《将军令》）等等，侪有一种非常传统、大气个感觉。

       而就勒海黄飞鸿个年代，有一大批华人为仔生存搭发展，远渡重洋，漂到仔老老远个美洲打工。

有一部分人留勒海仔美国，建设仔横贯北美个太平洋铁路，也有一部分人继续南下，经墨西哥湾、加勒比海进入南美洲。沿途国家侪有华人华工个身影，留下仔深深浅浅个中国记忆。

       作兴是想屋里，作兴是为仔保留传统，也作兴只是一时兴起，留勒海古巴个中国人吹起仔唢呐。

       而该个一只声音高亢响亮个乐器也引起仔当地人个注意搭仔兴趣，慢慢叫个吹喇叭个人多仔起来，有中国人也有古巴人。

       1915年个古巴圣地亚哥狂欢节浪向，有一个叫Juan Martínez（胡安·马丁内斯）个小伙子勒海游行队伍里吹响仔俚个唢呐。爆炸一样个音量，神奇个曲调赛过传染病一样勒海游行队伍里向传播开来。

       从此以后，唢呐就成为仔古巴狂欢节必不可少的元素，特别是每年个圣地亚哥狂欢节。

为仔纪念反殖民个古巴解放军，圣地亚哥人彻夜狂欢，踏仔节奏跳Conga（康茄舞）。游行队伍最前头个一排就是吹唢呐个，俚笃就是整个游行队伍个灵魂哉。所有人跳舞个节奏，游行队伍行进个速度侪是俚笃把控个。搿勒，也有人讲，唢呐就是圣地亚哥狂欢节个灵魂。

2005年个辰光，Ricardo Leyva（里卡多·雷伊瓦）搭仔Sur Caribe（南加勒比）乐队一淘创作仔一只Conga歌曲Añoranza por la conga，引爆仔整个加勒比地区。该只歌一度成为仔古巴个“国歌”，只要有古巴人个地方就有Añoranza por la conga。

歌曲有相当浓郁个加勒比风情，让人一听就想摇起来，而俚个前奏就是伲一开始听见个搿一段唢呐声音，也吹响仔整个游行队伍行进个号角。

一千七百年前，唢呐经陆上丝绸之路，传到仔中国，生根发芽融进血脉。亦勒海一百多年前，跟仔华人漂洋过海到仔加勒比岛国，渗进当地个游行音乐。

假使有机会去古巴，记得要去看看圣地亚哥狂欢节（每年7月24日至26日），也顺带便探探伲个老朋友，唢呐。