到苏州来个人,平江路是板定要孛相一圈个。
我老早问过弗少朋友,为啥要走平江路。答案不一而足,有一点倒是不变个:小桥、流水、人家。该是大家对江南最初个印象,也是最深个眷恋。
但不过绝大多数跑到平江路个人,侪会得迷失勒自拍杆、鸡脚爪搭仔摩肩接踵个喧嚣里。走过、拍过、尝过味道就是来过哉。
平江路,对来过或者朆来过个倷,代表仔啥个?
我从小生养勒平江路旁边,该条路是我个生活、记忆,也是我认识这座城市个开始。平江路个故事行情行事,多到一日一夜也读弗完,伴勒阡陌小巷里,囥勒枕河人家畔。小辰光外婆牵仔我个手一路走一路讲,二十四孝个雪糕桥、宁死守城个周虎将、殿试口误个潘状元、掘地三尺个商周鼎、胭脂巷里走出来个大使夫人、戗仔油纸伞漫步过个丁香姑娘……
悠长个历史勒海新雨过后个青石板浪,四神瓦当个涓流间,深邃神秘个备弄里,静默而伫个石桥边缠绵。
对个,就是石桥,你阿晓得俚笃个故事?
我最欢喜个是寿安桥,干将路走进来第二座,联通钮家巷搭仔平江路,一座再平实不过个石板桥。但不过啊,缓步而行个倷阿晓得,你个三两步跨过个就是一千年。
“绿浪东西南北水,红栏三百九十桥。”平江路浪个桥大多数侪是勒海唐宋之间造起来个。唐朝辰光个朱漆木栏到仔两宋就侪改成功仔石栏杆,一不小心就跨过仔宋元明清到仔今朝。
你问我捺亨晓得个?搿末伲就看看寿安桥吧。
苏州个桥,弗少侪是石梁桥,寿安桥也是。桥面浪向有六条石梁并排并,平稳而安定,好走车行马个。但不过,你曾阿留意过石板个颜色?搿个是一种深邃个紫,带仔岁月个磨痕,粗糙而秀朴。该个是武康石,因为出产于今德清县武康镇而得名,是唐宋辰光顶顶最优秀个造桥石材之一。表面侪是一滴滴大个蜂窝眼眼,踏勒上头有点微微个涩意,落雨天弗会得打滑。因为石质适中,唐宋辰光大肆开采,到仔宋以后就禁采则。倷眼门前个该一抹赭石紫,就是寿安桥千年以前个呢喃啊。
一路走来,一座座古桥,或在桥身,或在石梁,或在栏柱间侪有一隐深紫,该个再是平江个文脉塔仔厚度啊!勒海不经意间细述历史,勒海烟雨缠绵里向历尽繁华。
走过平江路,探过小巷事,赏过石桥紫,拂过杨柳青,再算是到过苏州啊!
苏州闲话家常
非常好听
鹦鹉螺_is
呢喃什么意思呀。
听友107930821 回复 @鹦鹉螺_is:
这个词不是苏州话特有的,就是字面意思。