我乃桃花坞是也,弗错,搿个住仔桃花仙人个桃花庵就勒我该搭。捺亨,我个名字阿是亦美丽亦浪漫。作兴大家晓得我,是因为江南四大才子之一个唐伯虎拨我写个该首《桃花庵歌》:
桃花坞里桃花庵,桃花庵里桃花仙;
桃花仙人种桃树,又摘桃花换酒钱。
酒醒只在花前坐,酒醉还来花下眠;
半醒半醉日复日,花落花开年复年。
不愿鞠躬车马前,但愿老死花酒间;
车尘马足贵者趣,酒盏花枝贫者缘。
若将富贵比贫者,一在平地一在天;
若将贫贱比车马,他得驱驰我得闲。
世人笑我忒疯癫,我笑他人看不穿;
记得五陵豪杰墓,无酒无花锄作田。
唐寅,字伯虎,俚搭仇英、沈周、文徵明历来备受推崇,世称“吴门四家”,开仔一代“吴门画派”之先锋。他吟诗作画、博学多才,亦风流万种、狂放不羁,16岁中秀才,29岁个辰光参加乡试一举得头名“解元”。
但不过就是实梗一个江南第一风流才子,勒海参加会试就要功成名就个辰光,倒是因为科场舞弊案受着无端牵连,从此断仔仕途。换做旁人,作兴就此沉沦哉,不过俚是才华横溢个唐伯虎啊,加之狂放不羁个性格,俚索性放舟南下,回到俚个家乡吴中,勒海苏州城西北,也就是我桃花坞个地盘-----双荷花池西侧买仔一块地造起仔别墅。
院落当中设有桃花庵、学圃堂、梦墨亭、读书阁、蛱蝶斋、检斋、寤歌斋,还遍植花木,特别是桃树,成片个桃林,宛如仙境。搿辰光个唐伯虎老早已经看透仔官 场 炎 凉,退 避 桃花坞,自号“桃花庵主”,还拨新别墅写下仔《桃花庵歌》,自此,桃花仙人勒海我个地盘浪向风流一生。
大家阿晓得,能够吸引到该个江南第一风流才子前来个我是着着弗一般呢。勒最初我无不名字个,自从伍子胥象天法地造姑苏城以来,我该个苏州城西北角一直比较荒凉,遍布湿地,杂草丛生,少有人住。后首来到仔汉代,有个张长史勒海该搭种仔成片个桑树,用来养蚕宝宝。到仔唐宋两代,达官贵人开始勒我该搭购置别业、开辟庄园。唐代有孙园,宋代有五亩园,里向有梅坞、桃林。
到该辰光,我终于名扬四方哉。大批文人墨客过来赏花游乐,还拨我取仔“桃花坞”实梗雅致个名字。我还被推为“姑苏八景”之一,有行情行市个文人赋诗来赞颂我。范石湖有《和章秀才北城新圃》诗云:“方游桃花坞,窈窕入壶天。碧城当岩岫,清湾如涧泉。风月欲无价,聊费四万钱。雪后春事起,红云蜂蝶边。”捺亨?当时辰光个我可谓是风光无限、盛况空前吧。
但不过啊,历史像煞欢喜搭我溜孛相,历经仔实梗繁华个岁月,正值我意气风发个辰光,“靖康之难”爆发哉。金兵入侵,整个姑苏城个老百姓侪勒我该搭安营扎寨,拿我当作最后个防线。但不过我实梗个江南温婉地,哪搭抵得住搿点草原狼个进攻啊,一时间金兵破寨,屠城十万,离开个辰光一把火烧仔五日五夜,整个苏州城片甲不留,数十万个老百姓也勒我个身浪向拨屠戮殆尽,搿是勒海南宋建炎四年,搿个一夜我个身浪向鲜血纵横,史称“建炎之夜”。
该个以后个几百年辰光里,我难以恢复唐宋之盛况。幸运个是,三百年以后,我等来仔唐伯虎,慢慢叫个,百姓亦开始过来置业,俚笃晓得我个过往,搿勒亦勒我身半边植仔桃树,一时辰光,曾经个我,搿个满目芬芳个桃花坞,重现哉。
再后来到仔清代,为仔我搭搿个最是红尘一二等富贵风流地个阊门相连勒,从此以后街巷纵横、坊肆相连,一派繁荣个景象。后首来因为太平天国运动,我亦受着牵连,但不过就算实梗,我还是顽强个生存下来哉。外加原本住勒阊门外头个手工艺人因为战乱纷纷迁入城内,聚集勒我该搭,一时间我从当初搿个世外桃源成为仔市井气息最浓个手工艺聚集区,雕刻、竹木、纸扇、色纸等等姑苏再有个精致工艺品侪勒我该搭诞生。
该个当中亦以木刻年画最为出名。
因为雕刻技法多样、题材丰富多彩个特点,“苏州桃花坞木刻年画”搭天津杨柳青、山东潍坊杨家埠、四川绵竹齐名,并称为全国“四大年画”。
如今,虽然我个身浪拆仔又拆、修仔又修,我还是搿个桃花坞,姑苏城里最标致个桃花坞。
倷看刚刚过脱个一礼拜,苏州国际设计周就勒我个地皮浪办得如火如荼,全世界个设计师侪聚勒该搭。作兴我要跟仔苏作手艺一淘,走向世界哉!
小切哼的咖啡
可爱的桃花坞呀~
郁金香一一平生不晚
嗯呗啥啥个要说的,一句话,结棍
我_站在
震撼
唯你泡腾片
说的好流利啊,像我只能看一行想半天