嘉定城里啥闲话？
话着嘉定地区亇现代汉语，人们常常会提起嘉定城里闲话。但是嗫，又发现一个问题，好像人们一直对嘉定城里亇闲话缺乏一个清晰亇概念。嗰么，嘉定城里亇闲话到底是哪恁亇嗫？
首先要界定界定，昰个嘉定城指亇是啥个范围？因为城区是塱不断扩展亇，现在嘉定城亇范围要傍三十年前嘉定城亇范围大脱让些儿得嘞！像现在菊园新区、新成路街道亇相当一部分区域，还有老早属于嘉西、马陆嘞厛嘉定新城亇区域，现在也算是嘉定城亇组成部分，与嘉定老县城是一个城市连续体。但人们讲着嘉定城里闲话亇辰光，还是偏重于强调老城里亇闲话。嗰么，我伲昰塱话着亇嘉定城，适合特指本来亇嘉定老县城，也就是相当于城墙、城河圈起来亇昰个区域，近似于现在嘉定镇街道亇行政范围。
乃么塱昰个区域里亇人员构成，也是复杂亇，既有连续几代已经扎根于此亇居民，也有近几十年来从外地、上海中心城区、嘉定乡下头搬迁过来亇居民。而晚近迁移过来亇居民，未必习得城里原住民亇闲话。
为此著近二三十年北京语音亇普及，土客双方全可以更加便当亇直接切换到北京语音交流，外地移民不再有迫切需要习得本地汉语，本地居民也不再像老一辈一样只会用本地闲话面对撘融合外头人，北京语音成为嘉定城里经常听见亇语音。
上海城区闲话塱长三角具有较强亇威望撘辐射力，也是上海都市居民亇身份标志，上海城区移民迁入嘉定城通常倾向于坚持使用上海城区闲话，而嘉定人也有拿身份语从嘉定闲话永久替换为上海城区闲话亇倾向。著嘉定城里也常庄有能听见上海城区闲话。
嘉定乡下闲话，撘嘉定城老居民亇闲话相似度比较高，听懂度比较高，乡下人用自家亇母语同样也可以撘街上人通话，缺乏改用街上闲话亇强大动力，即使少部分用词会改变，也蛮难动摇最根本亇声母、韵母、声调亇格局。
乃么问题来啧，以上几种闲话，全是嘉定城里亇客观存在，佷阿会认为佢垯是嘉定城里闲话？
北京音可能直接畀大家撇开啧，尽管年轻一辈嘉定人北京音傍嘉定音也内，但因为语言亲属关系忒远，大家还是不大会承认昰个是嘉定城里闲话。
嘉定乡下闲话也畀大家撇开啧，因为人们通常还是以城为尊，以乡为卑亇——乡下闲话哪恁可以冒充街上闲话嗫？
上海城区闲话嗫？好像存在两派观点：有亇认为，昰个一听腔调就不是嘉定闲话；有亇认为，昰个就是嘉定街上人亇闲话，撘上海城区闲话是差不多亇，撘乡下闲话明显不一样。持第二种观点亇人，可能是看见有亇城里老居民身份语转用为上海城区闲话啧，也有可能是拿搬过来亇上海城区移民认为是嘉定城原住民啧。某种程度上来讲，昰个也反映著人们亇一种理想预期——就是街上人就是要有街上人亇腔调，昰种腔调亇模板应该是哪恁亇？嗰自然应该是像上海大都市昰恁亇。
故所以，虽然同样是外来亇闲话，北京音撘嘉定乡下闲话，全畀人们有意无意亇排斥于嘉定城里闲话亇范畴里，只有上海城区闲话相对来讲会有意无意亇撘嘉定城里闲话联系著一俦——尽管，佢垯全是嘉定城里亇客观存在。
但同时，人们又会对嘉定城里原住民亇闲话有一种好奇，渴望了解昰种闲话到底是哪恁亇？特别是塱强调语言道地、标准亇语境里，嘉定城里闲话会三不两时亇被提及，但对其本真面貌又莫衷一是，处于一种朦胧亇状态。
嗰么，嘉定城里闲话，到究是哪恁亇嗫？轧实啊，昰个问题並不难解决，因为嘉定城里原住民祖祖辈辈传承下来亇昰套具体亇现代汉语，已经畀学界几趟记录过啧，只是绝大多数人不涉及昰个领域，不了解相关资料，或者看不懂资料记载。
学界进行语言调查，若是对某个地点进行总体性亇了解，通常选择亇发音人最好塱此地已经居住三代以上啧。《嘉定县志•方言卷》撘《嘉定方言研究》是我最早接触亇涉及嘉定城里原住民所用汉语亇专著，看其资料，具有相当亇专业性，发音人亇选择，应该是比较稳妥亇。特别是《嘉定方言研究》里还对发音人亇情况作著专门亇介绍。
老实讲，我18岁前头並不清爽嘉定城里原住民亇闲话到底是哪恁亇，可能是因为我嘉定城里亇幼儿园到初中同学，塱当年读书阶段，基本全是使用北京语音表达亇。高中里乡嘉定音撘北京音差不多算平分，撑起嘉定本地汉语半爿天亇也基本上是乡下同学。虽然当时亇大人还是讲嘉定本地汉语亇，但可能是本身差别性不大，或者也可能当时不敏感，也不晓得哪恁亇算嘉定城里闲话。
接触着《嘉定县志•方言卷》之后，我看著看同音字表，有个朦胧亇感觉，像徐行闲话。当然，因为原来亇徐行境内也有明显亇方言差别，有一部分区域是撘唐行、华亭差不多亇，现在讲得更加严密眼，可能应该是徐行境内中西部接近嘉定城亇部分。因为当时看见县志上亇国际音标记录，“杯胚培梅归亏回威”昰组字是发pɪ phɪ bɪ mɪ kuɪ khuɪ ɦuɪ ʔuɪ（国际音标）亇，撘“搬潘盘瞒官宽桓豌”是同音或者理论上同音亇（因为有亇字字表朆收，但根据规律应该昰恁读，故嘞称“理论同音”）；而“沟抠猴欧”是发kɤ khɤ ɦɤ ɤ亇，撘“干看寒安”是同音亇。而昰两组字，塱唐行、华亭嘞厛外圈交关地区是不同音亇，一组是ɘ，一组是ɤ，两只音。
不过嘉定城里“渣叉查沙”读tso tsho zo so，撘“钻蹿攒酸”是区别或者理论上区别亇，而嘉定县东部、北部交关地区是合併亇。
乃么嘉定城里“下鸦”撘“画蛙”是合併亇，全读ɦo o，嘉定县东部、北部交关地区是区分亇。
总亇讲来就是古汉语里本来有区别亇读音，有亇县城已经合併，华亭还分；有亇华亭已经合併，县城还分。就像北京分平翘舌音，前后鼻音，上海不分；上海分清音、浊音，舒声、促声，北京不分。
撘华亭比起来，从声韵调系统来看，实际上两个地点亇汉语语音声母完全相同，声调也完全相同，四十几个韵母绝大多数一样，主要就是华亭有ɘ呒o，县城有o呒ɘ。从古汉语传到现代亇音类分合格局来看，两地主要亇差别也在于上头提着亇昰両组字——有亇华亭厡旧区分，但县城已经合併；有亇县城厡旧区分，但华亭已经合併。
绽外，文白异读方面，两地有一部分字不同，在此不一一展开。
总亇讲来，看著《嘉定县志》上亇资料，觉着嘉定城撘华亭亇差别不算大透。不过后晚来看见著《嘉定方言研究》，倒是觉着一呆呀！竟然分“知痴池诗”撘“猪枢除书”昰两组字亇，前者是发tsɿ tshɿ zɿ sɿ，后者是发 tsʮ tshʮ zʮ sʮ亇，佢是有ʮ昰隻韵母亇！而县志上亇嘉定镇发音人撘我伲周边交关区域一样是呒得ʮ韵母亇，上头昰两组字也全是同音亇。
外加佢还分“金钦（本想读“琴”）欣寅”撘“军【（厂/紧）平声】（本想读“群”）熏云”昰两组字亇，前者是发ʨiŋ ʨhiŋ（本想读ʥiŋ） ɕiŋ ɦiŋ，后者是发ʨyɪŋ ʨhyɪŋ（本想读ʥyɪŋ） ɕyɪŋ ɦyɪŋ亇，佢是有yɪŋ昰隻韵母亇！而县志上亇嘉定镇发音人撘我伲周边交关区域一样是呒得yɪŋ昰隻韵母亇，上头昰两组字也全是同音亇。
外加，县志上发音人发ɤ亇字，方言研究上亇发音人是发ø亇。例如“兜偷头楼周抽筹收沟抠猴欧（华亭韵母ɘ）”昰组字，县志上亇发音人发“兜偷头楼周抽筹收沟抠猴欧（韵母ɤ）”，方言研究上亇发音人发“兜偷头楼周抽筹收沟抠猴欧（韵母ø）”。也就是讲，县志上亇有ɤ呒ø，方言研究上亇有ø呒ɤ。
也就是讲，同样是嘉定县城昰恁小一垯场许亇发音人，从古汉语传承下来亇音类分合具有几滩明显差异，外加声韵调系统里亇韵母部分也有几垯不同，昰种差别好像不亚于县志上亇发音人撘华亭人亇差异。若然话县城到华亭还有廿里路亇距离，两只地点亇差异並不令人惊异，嗰么同在县城昰恁一垯小户荡亇两个发音人塱语音方面有昰恁几滩差异不得不话有眼大。毕竟嘉定县城也就相当于一只半径一公里亇圆。
嗰么昰个阿会是偶然现象？或者发音人有问题？但《嘉定音系记略》记录着亇资料是撘《嘉定方言研究》上差不多亇，而2014年国家有声数据库工程亇调查，我就坐著边头，亲耳朵管听好老年、青年两名男性发音人亇，撘《嘉定县志》上亇发音人是差不多亇。而平常脚接触着亇宣称自家讲嘉定城里闲话亇老人里，的确也听着著两类，甚至凑两类使用者塱一俦亇辰光还当场比较过。种种迹象表明，嘉定县城昰恁小一个地点，原住民里的确存在起码货两套具体亇汉语，语音上存在几滩系统性亇差别，全畀学术著作记录过。昰两套闲话是哪恁形成亇？哪恁会塱嘉定县城昰恁小亇户荡长期並存？著嘉定城里亇分布上是否具有地域性？昰排全是蛮有意思亇课题，有兴趣亇朋友可以深入研究下去。
不过可惜亇是，交关人常常纠结于——嗰么何里套闲话算标准？像煞介仔要以其中一套为准嘞要拿还一套压牢，甚至拿全县其他乡镇亇闲话全压牢，实在是有眼可悲可叹。轧实佷话何里套闲话不标准？全是从古汉语传承下来亇一具体亇现代汉语，无非就是佷朝昰只方向变，佢朝伊只方向变。昰种问题就像争论大闸蟹撘梭子蟹何里种叫正宗亇蟹一样。
不过交关人纠结于昰种问题实际上也正常，为点啥全世界亇弱势语全塱逐点逐点亇消亡，畀强势语兼併？有一个根本性亇问题就是最广大亇民众並不是真亇崇尚何塱人讲何塱闲话，而是崇尚何里种闲话更有势力，更加通用，或者何里种闲话代表一种更加尊贵亇身份。其背后是人们追求语言交流便捷性亇广泛需求，昰种趋向是根深蒂固，具有相当深厚亇民众基础亇。故嘞佷看，有类似想法亇人是邪气常见亇——
“噢朱桥人么昰恁讲，南翔人么伊恁讲，全嘉定全不一样亇嘞！应该以嘉定城里为准！”
“噢嘉定人么昰恁讲，奉贤人么伊恁讲，全上海全不一样亇嘞！应该以上海都市为准！”
再上升一级么就是：
“噢山西人么昰恁讲，上海人么伊恁讲，全中国全不一样亇嘞！应该以北京皇城为准！”
实际上就是片面推普亇思路。无非只是划定亇范围大小不同而已。
再上升一级么就是：
“噢法国人么昰恁讲，中国人么伊恁讲，一个地球村也不一样亇嘞！一个人话也呒得标准亇嘞！应该以世界普通话——英语为准！”
对于有乡音情结亇人来讲，可能不大欢喜昰种趋向，但最广大民众铿锵有力亇实际行动的确已经反映出著昰种客观亇大趋势——就是弱势语逐点逐点放弃，逐步逐步转用通用度更加大亇强势语。当然，世界也是不平衡亇，全球不同区域受各种因素影响，弱势语消亡亇速度是不同亇。不巧亇是，嘉定城里可能属于速度快亇，我从廿世纪八十年代末亲眼乌珠看著城里亇幼儿园、小学、初中同学撘著楼里両个大阿哥普遍稳定、娴熟亇使用北京语音交流而基本不使用嘉定语音，而同一时期像伲乡下头亇学堂，譬如华亭中心校，同学俦里、师生俦里厡还普遍使用本地汉语表达。而根据著上海塘上读大学期间亇观察，同一时期亇上海城区同龄人，也厡还高度倾向于互相俦里使用上海城区闲话交流。
从大趋势看，全球语言趋同亇态势不大可能改变，但值得庆幸亇是，嘉定县城昰只地点原住民讲亇伊支汉语，已经畀学界几趟记录並公开发表过，资料比较详细，最起码著历史上留下著一个扎实亇印记。比起海海万万脚花脚印也朆留下来亇语言资源来讲，无疑还算是额角头亇。
总数，嘉定城里啥闲话？塱老一辈嘉定城原住民还健在，並且还塱使用佢垯祖祖辈辈传下来亇本地汉语亇情况下，还可以通过学术资料撘使用者互相印证可窥一斑。但语言本来就会随著人类社会亇变化而变化。一百年后亇嘉定城，人们讲亇啥闲话？一千年后嗫？
疁•浏河长江
2019年9月5号 礼拜四
己亥年 八月初七
嘉定建县801周年
标准汉语之一——苏沪古典汉语（两市全境汉语语音古今对应关系规整，局地古汉语平仄、舒促、清浊、尖团格局完整保留）
嘉定菊园老茶坊《嘉定闲话》栏目
嘉定古建与民俗文化研究会 • 陈夏青嘉定语言研究工作室 出品
汉藏语系•汉语言•吴方言•太湖片•苏沪嘉小片•
太仓方言大区•嘉定方言区•华亭方言点
（声韵调系统）
用户评论