广播专辑 弄堂茄山胡47 叫化子吃蟹，哪能就“只只好”

茄山河 
叫化子吃蟹，哪能就“只只好” 
 
周钰栋 
 

 
 
 
 
　　文/周钰栋
　　现在正是吃大闸蟹个时节，上海闲话里个一句歇后语：“叫化子吃蟹，只只好”。伊是一句骂人闲话，意思是讲，像叫化子迭种人，只配吃死蟹，拿死蟹拨伊拉吃，伊拉也会觉着是桩开心个事体。

　　大家侪晓得，河蟹死蟹是勿可以吃个，吃了会中毒。所以，蟹一死就只好掼脱，有眼派头个人就连撑脚蟹（快要死个蟹）也是勿吃个。辣拉老里八早个辰光，尽管蟹只有一角几分一斤，但是吃个人也是勿多个，袋袋里有眼铜钿个人才会得去买眼回来尝尝，日脚过得紧绷绷个是勿舍得买来吃个，因为有吃蟹个铜钿还是买点米回来吃，吃饱肚皮才是真生活。如果真是馋得来要命，想吃，也就是买点撑脚蟹回来解解馋，买回来后要是死脱了，也是勿舍得厾脱，味道勿好也会吃进肚皮里。搿种做法，落拉有铜钿人个眼睛里，就是垃圾瘪三、叫化子做个事体了。所以，“叫化子吃蟹，只只好”迭句歇后语刚刚开始行【hhang】个辰光，侪是从有铜钿、派头大人个嘴巴里讲出来个，是骂人家穷个一句闲话。后首来，辰光一长，行到了普通老百姓个嘴巴里，意思搭仔情感也就变了，而且变得多样化了。

　　先看阿拉姆妈是哪能介用迭句闲话个。姆妈是穷人家出身，伊勿光勤劳，过日脚也邪气做人家（节约），要是像阿拉小辈们买了眼物事送拨伊，问伊好勿好，喜欢勿喜欢，伊总归笑嘻嘻个只有一句闲话：“我是叫化子吃蟹，只只好。”意思是买拨我个物事侪好个，闲话里向充满了喜悦搭满足。还有，当看到阿拉用起钞票来大手大脚，只要一发工钿，就会买回来一大堆个物事让伊开心，还寻交关理由脱伊讲，迭样哪能好，伊样哪能赞，伊听了以后也是朝阿拉笑嘻嘻个讲：“那搿几只小鬼，是‘叫化子吃蟹，只只好’个啦！”闲话里向有责备，也有爱。其实，阿拉姆妈个搿种艰苦朴素个思想作风对阿拉小辈个影响也是蛮大个。有一次单位里发放劳防用品，照理讲现在发个劳防用品也与时俱进了，勿管是颜色还是款式侪蛮时髦个，但辣小青年眼睛里还是横勿好来竖勿好。当时伊拉就拿我拉出来问我：“老周师傅侬讲，发个搿些物事实惠，好看？”而我个回答是：“蛮实惠，蛮好看。”“老周师傅，侬一眼拎勿清，侬搿种样子就叫做‘叫化子吃蟹，只只好’啦”年轻人苦笑着挥起棉花拳头朝我肩胛浪向拍过来，嗲声嗲气个闲话里向勿是辣拉责怪我，就是讲我个思想意识忒勿合时代潮流了。

　　还有一次，单位里个老金师傅请阿拉几位老同事到伊屋里去吃夜饭，大家刚落座，老金师傅就讲来：“现在个小菜也真难买，跑到小菜场勿晓得买啥，又勿晓得大家欢喜吃点啥，我就只好来个‘叫化子吃蟹，只只好’啦。请大家包涵，随便吃。”老金师傅讲迭句歇后语个意思是，今朝我买个迭些小菜是随便买买个，勿是专门为大家准备个，大家千万覅客气，随便吃，也体现了老金师傅热情好客个待客之道。

　　最后，我再顺手搭上一句闲话里有“蟹”字个上海闲话：“死蟹了”，“死蟹一只”。迭两句意思是一样个，侪指：失败了，事体做坏脱了。比如讲，有一日，我辣拉厨房间里煎排骨，一大意，拿排骨煎焦脱了，等我一闻到焦味道嘴巴里就直叫“乃末死蟹，乃末死蟹！”老妻听到我个叫声就跑进厨房间里一看，指着我说：“排骨‘死蟹了’，侬也是‘死蟹一只’啦。”讲个算是笑话，但就是迭能介一些带有“蟹”字个上海闲话，拿上海人生活当中个喜、怒、哀、乐侪表达出来哉，也透出了上海人个一种生活情调。