慢速粤语听力：如何变得更有自信？

我好中意一个r，

佢嘅频道叫“我叫查理”（I'm Charlie）,

查理系一个台湾嘅美妆博主，

佢喺分享化妆嘅同时，

都会分享自己平时睇过嘅书，同生活的心得。

佢系一个好积极努力嘅博主。

最近我睇咗佢嘅一个视频，

喺呢个视频查理用自己嘅经历讲咗变得自信嘅方法。

查理觉得变得自信嘅方法系努力做自己真正认可嘅嘢，

而唔系努力去做一啲讨好其他人嘅嘢。

下面我会复述查理得出呢个结论嘅原因。

如果你有兴趣嘅话，

就继续听落去啦。

查理系一个台湾人，

佢嘅父母喺佢好细个嗰时就离咗婚，

佢系佢婆婆带大嘅，

细个嗰时佢嘅经济情况唔好，

而且因为缺少父母嘅爱，

佢细个嗰时好冇自信，好自卑，

高中嗰时佢要参加英文口语嘅考试，

甚至都唔敢对住录音机讲英文，

因为佢真系好冇自信，

但系其实佢冇自己想象之中咁差。

佢嘅朋友都同佢讲，

查理，其实你系一个好好嘅女仔，

你要自信一啲啊。

咁样嘅话，

佢觉得其实一啲都帮唔到佢。

大学嗰时，佢想变得自信啲，

所以佢俾心机学化妆同打扮，

努力变成一个自信嘅女仔，

慢慢咁，会有人同佢讲，

查理，你今日好靓啊，

但系呢啲话并冇令佢觉得更加开心。

佢发现其他人系冇办法俾到佢自信，

如果佢想自信，

必须要从自己肯定自己开始。

佢发现如果自己想获得自信，

就要去做一啲自己肯定嘅嘢，

而唔系嗰啲想令人哋中意自己嘅嘢。

佢一直想出国读书，

但系因为佢屋企嘅经济条件唔好，

出国留学对佢嚟讲系一件冇可能嘅事。

但系佢真系好想出国留学，

后来佢就自己贷款出国留学。

呢件事对佢嚟讲，

系一件佢一直都想做，

但系困难度非常高嘅事。

后来佢真系成功咗，

去咗法国留学。

查理嘅自信心就系喺呢个时候慢慢变高嘅。

自己贷款出国留学呢件事，

对佢嚟讲，就好似一个人生转折点咁样。

如果系人哋叫你做嘅嘢，

就算你自己成功完成咗，

你都唔会肯定自己。

就好似你妈妈想你考前三名，

跟住你真系考到咗，

你真系会开心咩？

其实唔会。

因为嗰个系你妈妈嘅愿望，

但唔系你自己嘅愿望。

你唯有做自己肯定嘅事，

成功咗之后，

你先会肯定自己。

自信心并唔系你完成咗一件事之后就会突然变高，

而系当你自己不断完成一啲自己认为自己做唔到嘅事之后，

慢慢咁不断咁变高嘅。

如果你想提高自己嘅自信心，

首先问吓自己有乜嘢好想做嘅，

然后就开始去做呢件事。

呢件事唔需要非常难，

但系必须系你自己想做嘅嘢，

唔可以系因为你想讨好人哋所以先做呢件事。

我之前写过一篇文章，

内在驱动同外在驱动系唔系一样咁重要啊？

所谓嘅内在驱动，

指嘅系自己内心想做一件事而带嚟嘅驱动力，

而外在驱动，

指嘅系为咗一啲外在嘅嘢而产生嘅驱动力，外在嘅嘢指系其他人嘅认同、社会地位、财富等等外在嘅嘢，

科学研究表明内在驱动比外在驱动更加能够令人达成目标。

我觉得结合查理嘅视频可以得出咁样一个生活建议，

喺生活中我哋应该追随自己嘅内心，

而唔系外在嘅意见，

例如周围人嘅意见、世俗嘅睇法，

咁样先可以令你真正得到自己想要嘅嘢。

唔好想得到其他人嘅认可，

其他人嘅认可并唔会令你自己真正认可自己，

自信来源于自己对自己嘅认可，

想得到自己的认可，

咁就要努力去得到自己内心想要嘅嗰啲嘢。

如果你中意我嘅文章，欢迎订阅我嘅微信公众号“我要学广东话”。