广播专辑 弄堂茄山胡224 当年走“后门”配中药

当年走“后门”配中药 
 
钱红春 
 
　　上世纪六十年代末，丈母娘生毛病,看了几次西医勿见好转，医生就建议看看中医。当时医院里向呒没中药房，每次侪要拿仔处方到外头个中药店自家配。

　　老丈人故世早，老伴又是独苗，配中药个事体就非我莫属。但每次到中药店配药，勿是缺搿样就是少伊样，跑仔交关店侪差勿多。丈母娘同医生商量覅开配勿着个药，医生虽然答应,但毕竟勿清爽店家个情况，开出来个处方还是配勿齐。药店都会垃拉处方缺货个中药浪画只红圈，每次我配好药，丈母娘一看处方浪个红圈圈就勿开心。虽然伊当面呒没埋怨过我，但伊总觉得配勿着个药一定是好药，喫仔配勿齐个中药，还是觉着搿搭痛伊搭痛。事体虽然怪勿着我，但作为伊个“半个儿子”，心里也邪气挖塞。更要命个是,医生关照中药一定要长喫才会见效,我真是有苦讲勿出。丈母娘个毛病呒没看好，我反倒添仔一块心病。迭个辰光就想寻寻“后门”。

　　有一次单位里派我参加区有关部门个学习班，总共有二三十人，每个礼拜活动一次，学员侪是来自本区个基层单位。大家头一趟碰头自我介绍个辰光，听到有位姓周个小青年是中药店工作个，乃末我起劲唻,每次活动我就早点去抢只好位子候牢伊，倒茶个辰光也勿忘记帮伊带一杯。有一趟我无意当中听伊讲起“文革”前出版个外国名著，很想借看。迭种书当时侪是受到批判个“大毒草”，我正好有几本,就暗黜黜借拨伊，并且跟伊咬咬耳朵:“万一被人捉牢,覅讲是我个。”伊讲:“侬放心，我是学徒,勿是叛徒。”迭能一来,两家头就慢慢熟悉起来。后来我向伊讲起配中药个苦恼，伊讲，有个中药确实紧张，但也勿是一眼呒没，只不过勿配拨外头人。接着就拍拍胸脯对我讲:“别个事体勿敢讲，要配点中药，一眼呒没问题。”从此以后，丈母娘个中药处方浪再也呒没出现过缺货个红圈圈，伊个毛病也比过去好仔交关，其中讲勿定也有点心理因素。

　　走“后门”当然是不正之风，但物资稀缺个年代，也是被逼无奈。四十多年后物资丰富、充裕个今朝，想起当初为了配齐丈母娘搿点中药勿得勿走“后门”，实在让我感慨万分，恍如隔世。