广播专辑 弄堂茄山胡60 摇灶

广播154 弄堂茄山胡 摇灶

2012-11-21 16:55来源：新民晚报         新民网编辑：田诗雍    作者：柴焘熊
轻一代个崇明人，大都勿晓得崇明闲话中“摇灶”一词是啥【读“哈”】个意思。即使老辈个崇明人，也老少有人用搿个词。其实，“摇灶”就是普通话中“靠不住”、“不靠谱”个意思。
　　相传还有迭能个故事：赵大是崇明东沙地区个泥水匠，勿要看伊手艺推板，自家倒很自以为是。假使有人对伊做个生活有意见，伊勿但勿听，还要嘲人家，讲有本事唔【n】自己去做好了，做啥来寻我。乃末方圆一带伊个口碑一天世界。
　　有趟隔壁邻舍家要支一副灶。碍于情面，勿去请远处个，就近叫了赵大。搿个赵大一进门就夸口，讲自家个本事勿得了，支个灶烧起来省柴。邻舍为求伊好好做生活，跟着附和仔几声。赵大得意洋洋，就动手做起生活来。大半天下来，一副三眼头灶就完工了。邻舍垃拉厅堂里用好酒好菜招待伊。伊一边吃老酒一边吹起了牛，讲自家支个这副灶主人家起码好用二三十年，保险勿会倒坍。正垃拉赵大吹牛吹得牵脚舞手个辰光，突然听见灶间里传出“轰——”个一声。原来是刚刚砌好个灶头倒了一地。主人家个儿子话：我想拿场心浪个台子搬到灶间里来，拉里晓得一勿小心台角碰到了灶头，只见灶山摇了几摇，就倒了下来。原来灶山是用单块砖侧立向上砌个，蛮有难度。凭赵大个手艺根本达勿到要求。伊信口开河话自家打灶本事大个话也根本靠勿住。
　　后来，崇明人就拿事体靠勿住、勿靠谱比作赵大砌个摇摇晃晃个灶——摇灶。