广播148 弄堂茄山胡 葡萄美酒自家酿
2013-09-30 10:40来源：新民晚报 新民网编辑：田诗雍 作者：丁汀
早就听说自家做葡萄酒比买来个好吃，但因为呒没酒念头，也就作罢。自从去年有了一亩地农庄之后，好生服伺园内两棵葡萄树，搭架子，施肥料、浇水、锄草，待到初夏六月，一串串青颜色个葡萄挂垃棚顶，看垃眼里，喜垃心里。亲朋好友来得多，葡萄酒是普遍酒饮，于是，我想弄点新花头拨大家一个惊喜。
到了七月下旬，葡萄由青变紫，我萌发了自酿葡萄酒个想法，请教了一个老做酒个朋友具体步骤之后，我开始了搿个自种自酿葡萄酒个“纯绿色工程”：先将2只老酒甏汏清爽，晾干；再拿采下个葡萄告从邻近农家生态葡萄园买来个玫瑰葡萄总共约30斤，用自来水汏清爽，再用净水过一潽，铺垃干净个桌面浪任其阴干，勿能晒太阳，等葡萄晾干水渍之后，就可以正式请葡萄入甏哉。
葡萄入甏之前，要以一比七个比例准备好白糖（一斤白糖：七斤葡萄），如要葡萄酒个口感再粘稠一点，就再备点敲碎个冰糖；如要葡萄酒含有玫瑰香气，则要按适当比例放点玫瑰葡萄。
自酿葡萄酒做得好勿好，关键垃拉葡萄告糖入甏个手势，搿个活有点技术含量：我先垃甏底铺一层葡萄，然后垃拉葡萄上均匀洒一层白糖（已掺和冰糖）。再一层葡萄，一层糖，以此类推。糖勿能洒得太多，太多会破坏酒个风味，太过粘稠个酒液勿就像葡萄糖浆了吗？也不利于时下患有糖尿病个人。当葡萄铺到甏肚八分满个辰光，则可停止，留出2成空间，便于葡萄发酵后酒液渗出，勿至于潽出甏口。压末，沿着甏口套上一只干净、勿漏气个食品级塑料袋，再用绳子扎紧甏口。搿能介，酿酒前个工序就算基本做好了。我一下子做了两甏。
酒甏要摆垃气温相对稳定个地方，譬如底楼地面，勿能有太阳光直射，假使有条件挖个酒窖葛就更好了！据说，酒甏摆个楼层越高，酒个质量越差，因为，层楼高个地方，温度越是勿稳定，热气个习性是朝上跑，冷气则相反，由于日夜温差悬殊，忽冷忽热个温度会影响酒个发酵告仔口味，甚至于酒液发酸，只能派烧小菜个用场。
半个月后，甏口个塑料袋会膨胀得像气球一样，适时将甏口松绑，泄去里向个气体，然后再扎紧。一个月以后，就可以用网兜滤酒，自酿葡萄酒最好用软木塞个酒瓶装，临喝之前放到冰箱个冷藏室里，喝葡萄酒个最佳温度垃拉4~5度。至于红酒配海鲜，干白配猪牛羊（红肉），葛就是另一个话题了。
最近，朋友们屏勿牢酒香飘溢个诱惑，每人倒了一小杯解解馋痨，品尝后侪禁不住对纯绿色个自酿葡萄美酒啧啧称好。我闻着酒香，陶醉垃自得其乐之中……
1303668wnif
学习中
1535761fgqz阿美