广播专辑 弄堂茄山胡243 乱穿红灯，捉牢伊！

乱穿红灯，捉牢伊！  
 
阿仁  
 
　　红灯停，绿灯行。交通规则最要紧个一条。老底仔老上海人踏脚踏车勿在意搿条交通规则个人还真勿少。年纪轻个辰光，只要看勿到马路两面有车子过来，管伊红灯绿灯，踏过去再讲。伊个辰光，上海马路浪汽车也少，车子也开得慢，有交通警察站岗个路口勿多。脚踏车窜来窜去就成为了老上海滩一个常常可以看到个情况。只有勒辣设有交通岗亭个地方，大家才遵守交通规则。当时有一大批从崇明农场抽调上来个知青做交通警，人称“崇明警察”。我搭“崇明警察”遭遇过。做工人个辰光，上中班快要迟到了，踏过江宁路、北京路路口，我穿了一点点个红灯。一点点，红灯刚刚亮起来，勿算严重违章吧。想勿到坐勒岗亭里个警察勿过门，推出了脚踏车一路追上来：“穿红灯个，停下来！捉牢伊！”勿情愿束手就擒，我拼命踏车子，能逃就逃嘛。更想勿到搿位警察叔叔穷追勿舍，呒没一点熄火个腔势。越追越近，只好投降，我停下来了。搭气喘嘘嘘追上来个警察一打照面，我笑了。伊也笑了。啥个警察叔叔，是“崇明警察”。伊叫王能康，搭我勒一个农场、一个连队、一个排、一个班里一道插秧种田过个，伊还是正儿八经个崇明人。“乌小蟹头爿嗯得哉！乱穿红灯，拨伲搭牢哉！”后来个故事是拨小王带进岗亭受教育，再后来是茄山河，讲讲大家分手后个搞七搞八事体。第一次落入警察个手心里向，记牢了一辈子。

　　现在上海马路浪早就撤消了所有个警察岗亭，勿用警察叔叔来扳红绿灯了。电子信号、电子警察遍天下。交通规矩实行得足够严格了。上海人也自觉了。红灯停，绿灯过，大家习惯了。前几年有一趟我老毛病重犯，见了红灯还想踏车子穿过去，啥人晓得对面突然间立出来一个老警察，拨伊一把拖牢。“红灯看见？看见红灯？”我只好认错：“看见红灯了。”“看见红灯为啥还穿红灯？”“红灯是看见了，就是呒没看见侬人民警察。要是看到侬，一定勿会踏过来个！搿点礼貌、搿点面子还是要拨侬人民警察个。”老警察后来是笑咪咪了：“算侬讲了老实闲话。今朝就勿处理侬了。要记记牢，遵守交通规则勿是做拨阿拉警察看个。侬安全，大家安全才是最要紧个！”虽然呒没接受罚款，但是算是记牢了、记明白了。现在也难得骑脚踏车了。不过勿会再犯重复错误了。遵守交通规则，人人有责，对？