广播专辑 弄堂茄山胡244 记忆里个外婆

记忆里个外婆  
 
杨荪敏  
 

　　搬来现在个房子前，外婆因为神经性耳聋，已经听勿大见了，所以楼上楼下侪喊伊“聋彭耳外婆”。聋彭耳外婆本来是小学里个老师，1923年从上海务本女子中等学堂毕业个辰光，上海还是江苏省底下一个县，所以外婆个毕业证书是江苏教育厅发个。

　　还好外婆识字，平常要搭伊讲闲话，就写下来拨伊看。难板一家头辣屋里向，有陌生来客，也总归拿出纸笔叫伊留言，外婆谓之“笔谈”。去外头买物事，只要看看商标、价钿，手节头点点，只讲勿听就可以搞得定。有辰光外婆还会填词写诗来解厌气，动笔之前先要“仄仄平平”背一遍格律韵脚。天气转晴、人客上门、时事变化佬啥，侪是伊写诗作赋个由头。

　　“夜饭吃饱，看看夜报”。看书看报是外婆个日常功课。外婆本来就新潮个思想一直呒没落后过，会得搭阿拉讨论交关时尚个话题。通过查看古代中医个食谱、药方，聋彭耳外婆居然医治好了脚浪个“流火”病，还相帮弄堂口个邻居治疗同样个毛病。不过，自家个耳朵外婆呒没本事医好，“聋彭耳外婆”个名头也就只好一直叫下去。外婆心心挂念要弄清爽迭个毛病个原因，曾经多次留言叮嘱身后要捐献遗体，供医学研究。

　　三十年前，外婆写过《呈医学界同志》一诗：

　　惆怅耳聋卅五春，病残身弱耳鸣声。属经针药无疗效，不惑年华失业人。明理听信凭纸笔，晏歌仙乐损精神。移风易俗愿先驶，造福人间舍此身。一朝去世遗体在，献给医师解剖频。

　　最后，聋彭耳外婆魂归大海。勿晓得辣伊搭，外婆是勿是听得到日夜勿息个海浪声。