该两年个台风名字侪蛮有劲个,前有温比亚,后有黑格比。
讲着台风,倷头一个想着个是啥个?阿是狂风乱作,电闪雷鸣,大雨倾盆?
但不过呢,伲苏州城像煞有结界个一样,年年讲有台风,年年侪会擦身。就算是旧年个特大台风“利奇马”呼啦啦而来,最后也是灰溜溜变成功仔沙琪玛跑脱。
今年呢,亦来则,该趟也是像煞有介事个哦!
天末一坨坨黑云压下来,蛮有点“黑云压城城欲摧”个感觉。风力确实大仔弗少,护城河里是白浪滔天。
雨末也落仔几谢,哗啦啦赛过天漏仔摧下来一样,蛮有点台风个腔调,雨落过后天浪还挂仔两条鲎。
然后呢?就无不哉。
雨落完,风停当,太阳出来哉,台风弗见脱哉。
一只实梗,只只实梗,讲讲末台风,结果末一啥也无啥啥。
好婆看看天,两粒大点子,弗紧弗慢上楼收衣裳,一面收一面讲:蛮蛮大个水花,捞起来一只糠虾。
对啊,该个就是苏州个台风天,用普通话来说就是“雷声大,雨点小”。但不过也亏得是人间福地,大家对台风再能嘻嘻哈哈,享受清凉。
其实骨仔每天台风天死人个新闻也是弗少个,特别是浙江福建地区个文保部门,头大个哦。前两年就有弗少百年老桥拨冲坏脱,真真是作孽。
虽然讲苏州个台风是只“糠虾”,笑谈个辰光也弗能掉以轻心啊。
用户评论