广播专辑 弄堂茄山胡282 暖风阵阵石库门

暖风阵阵石库门  
 
　　文 / 陶文进
　　我写过一首打油诗：石库门呀石库门，进出只有一道门，人家再多侪搭界，其实就是一家门。
　　石库门里有人做寿，每家人家烧一只菜，可以摆满一台子。有人生病住院，左邻右舍侪会去探病，还有人主动报名陪夜。有人外出旅游要去火车站飞机场，屋里有车子个邻居还会主动包接包送……
　　当然，生活当中勿会缺少矛盾。小夫妻阿星、阿英经常闹别扭，争争吵吵，因为板壁薄，隔壁三阿嫂听得清清爽爽，马上过来劝相骂。三言两语讲得阿星面孔红彤彤，讲得阿英笑出来。一场风波就此平息。
　　阿星与阿英是夫妻间个小矛盾，三阿嫂出面就轻松解决。但有种事体解决起来就呒没介便当了。三阿哥初涉股市，发现一只股票连跌四个跌停板，觉得差勿多可以建仓了，就搭三阿嫂商量。三阿嫂觉得勿靠谱，只同意稍微买点试试水，结果三阿哥自作主张，一下子买了一万股。啥人晓得，搿只股票又连跌七天，天天跌停，三阿哥一下子亏脱十几万。三阿哥呒没面孔见老婆，一连几天困辣网吧里。三阿嫂经过打听，终于拿躲辣网吧里个三阿哥活捉。三阿嫂提出要离婚，三阿哥自知理亏，辣离婚协议浪签了字。
　　左邻右舍侪晓得伊拉夫妻是有感情嗰，搿能离婚太可惜，就商量要抢救一番。过了几天，三阿哥准备卖房子，分割财产。有人上门来看房，几家邻居侪偷偷吹“阴风”。张阿姨讲搿套房子里死过人，勿吉利。看房人怕晦气，就走脱了。又有人来看房，阿二头就对伊讲，搿套房子长年漏水，查勿出原因，修也呒没办法修。看房人听了，转身就走……房子卖勿脱，离婚个事体也就一直拖辣海。又过了十几天，三阿嫂心里个气一点点消了。两个月后股市触底反弹，三阿哥买个股票连涨几个涨停板，基本挽回损失。三阿哥拿股票卖脱，又寻三阿嫂承认错误，保证以后勿再犯。三阿嫂面孔浪向有了笑容，两家头又手拉手同进同出了。
　　我又写了一首打油诗：石库门呀石库门，各家团结如一人，人人侪是老娘舅，暖风阵阵喜盈门。