广播专辑 弄堂茄山胡314 老早子到外滩拗造型

老早子到外滩拗造型  
 
裴天蓉  
 
 
　　上世纪70年代末，阿拉中学毕业正好恢复了高考，参加完高考，考分还没下来，几个要好女同学辣辣一道总归要讨论考试题目，担心自己能不能考进大学。后来，有一个女同学讲，考也考好了，多讲了也没啥用搿，有人提出阿拉小姑娘还是一道去白相相，拍拍照片散散心。几个人约好辣辣南京东路新华书店碰头，一道去外滩。

　　到了约好个日脚，大家穿得侪蛮花俏个，不过呒没啥人化妆，伊个辰光不流行化妆个，只有一个小姑娘蛮领市面，去烫了头发，就老漂亮了。其他小姑娘老眼热了。有个女同学讲阿拉拿火夹，夹头发也卷的。反正大家侪想办法把自己弄得蛮漂亮个。

　　到了外滩，阿拉几个人就围了一道，有一个小姑娘拿了把彩色丝绸太阳伞，撑开来当背景，另一个小姑娘拿出一条碎花真丝围巾，拍照片辰光披了身浪向真个老灵光了，还有一个小姑娘带了一张电影画报，看看学学明星个动作，拗拗造型。但是，我最欢喜拗个造型是拿画报卷起来放了胸口，感觉自己有了几分大学生个气质。一个小姑娘拿出带来个海鸥牌照相机，里向已经装好胶卷。接下来就是摆出各种姿势，把相机里个胶卷拍光。

　　胶卷冲印出来，已经是一个礼拜之后了。等到大家看到冲印出来个厚厚一摞照片，侪邪气开心，不过照片尺寸侪蛮小个，而且是黑白照。每个人侪会挑一二张感觉特别灵个照片去照相馆放大，伊个辰光照相馆还有着色服务，其实无非是在嘴唇、面孔涂上点红色，不过，的确比黑白照片好看许多。

　　老早子搿小姑娘现在侪做娘了，有个别还做外婆了。小人侪老大了，小人侪个个考进大学，有搿还是老有名个大学毕业。阿拉还会一道聚聚喝喝茶，不过，现在好像每个人侪是摄影师了，一坐下来就会拿出手机拍拍照。大家出门侪会化点妆，毕竟年龄不饶人了，不过侪蛮自信个。有的立刻发到微信朋友圈，一歇歇交关老同学侪看到了，真比小姑娘时代不晓得先进多少。不过，要回忆青春，有辰光还会拿出老照片，翻拍以后发朋友圈。结果被小辈看见了，笑煞了，讲阿拉老早子拗造型蛮滑稽个。