广播专辑 弄堂茄山胡393 混堂堂倌个看家本事

混堂堂倌个看家本事  
  
　　文 / 周钰栋
　　老底子交关上海人屋里向是呒没洗浴设备嗰，想要汏浴，只好到混堂里去。而到了混堂里，顶让阿拉搿些小人看得眼睛一愣一愣个就是混堂堂倌手浪向两桩看家本事。一桩是用丫叉头叉衣裳，另一桩就是手指浪向飞毛巾。


　　侬看，当浴客辣账台浪买好筹子进到更衣室，立刻就有一个堂倌来招呼引位，伊手里拿一根2米长木柄铜头丫叉头。客人跟堂倌走到空位，就可以开始脱衣裳，每脱一件就交一件给堂倌，堂倌接过一件件衣裳套辣丫叉头浪，最后再用丫叉头拿衣裳挂到天花板下头个挂钩浪。


　　勿要认为搿桩事体简单，其实相当吃功夫。堂倌挂衣裳个辰光正好是罩衫挂辣外头，可以拿水蒸汽挡辣外面，勿让套辣里向个汗衫短裤受潮。为了勿让衣裳辣挂起来个过程当中滑下来，伊会倷丫叉头从袖子管、裤脚管里穿过去，衣领搭子裤腰正好钩牢丫叉头，就算衣裳滑下来也绝对勿会落地。因为挂衣裳个钩子离地足有3米，其他客人肯定是碰不到嗰，衣袋里个物事也就勿会拨别人偷脱，客人就可以放心到浴池里向去汏浴了。


　　等到汏好浴出来，就会有眼明手快个堂倌伸手从蒸桶里摸出一块热毛巾搭到另一只手个手指浪向，只看见伊一面朝侬喊：“先生，揩一把！”一面已经拿搿块热毛巾“飞”到侬手里。迭个动作也是邪气吃功夫嗰。伊只要倷五只手指头顶牢毛巾，再像运动员倷一根手指头转篮球一样，手腕一转，手臂膀一甩，搿块热毛巾就会从老远个地方飘到侬手里向，用个力道和方向准得勿得了。


　　假使侬一块毛巾勿够用，只要朝堂倌招招手，伊马上就会再“飞”一块毛巾过来，浴客多个辰光，只看见更衣室里毛巾飞来飞起，看得眼花六花，邪起扎劲。


　　现在卫浴设备已经普及到家家户户，曾经遍布大街小巷个混堂看勿见了，少量仍旧开业个公共浴场也普遍采用可以上锁个衣物寄存柜，搿两样混堂堂倌个看家本事也就呒没用武之地了。