记忆里个十六铺码头
文 / 裴天蓉
讲到十六铺码头,大多数上眼年纪个上海人侪是晓得嗰,毕竟辣辣相当长个一段辰光里,进出上海个主要交通工具除脱火车就是轮船。大大小小个轮船辣辣黄浦江进进出出,侪要停靠十六铺码头,每天上船下船个人交交关关,所以十六铺是老闹猛个地方。
小辰光有几年过年,爷娘侪要带我回宁波老家,就是到十六铺乘轮船。对我来讲,乘船去宁波就是出远门白相,每次听爷娘讲船票买好了,心里侪老开心了。到了出发搿天,一到十六铺只看到人山人海,爷娘就会一左一右牵牢我个两只手,一边紧紧捏牢,一边告诉我要跟紧,假使被人群挤开,就可能再也寻勿到了。吓得我心里别别跳,一点野眼也勿敢看,一门心思跟牢爷娘。一直到上船以后寻到铺位,放好行李,我才会松一口气,辣辣船舱里兜兜转转白相相,但是也勿敢走远。
记得当时个船票分为好几个等级,爷娘一般买三等舱或者四等舱个票子,上船以后有指定舱房和床铺,但是还有几次据说船票特别紧张,买勿到三等、四等个船票,就只好买五等舱。所谓五等舱其实就是每个人一条单人席子打地铺,地方自家寻。虽然环境比较乱,但是对阿拉搿种小人来讲,乱也有乱个好处,因为爷娘兄弟姐妹几家人家一道出行,所以几家人家侪拿席子铺辣一道,大人搭大人一道谈三海经,小人搭小人一道白相,比住辣舱房里向更加无拘无束。到了吃饭辰光,每家人家侪拿带来个小菜、零食拿出来,摆了一道,看起来邪气丰盛。等吃得差勿多了,阿拉几个小人还要跑到甲板浪去看看,结果除脱一片漆黑,啥也看勿见。最后回到铺位浪向,大家勿脱衣裳就睏觉了,等到眼睛再张开来,天已经蒙蒙亮,就听到有人喊:宁波到了!宁波到了!
上世纪八十年代初,我长大了工作了,平时即便呒没辰光乘船远行,也会辣辣休息日到十六铺走走。十六铺码头除脱去往各地个轮船,还有往返浦东浦西个摆渡船。当时浦东还有大批农田,十六铺勿仅有水果批发市场,还可以买到各种新鲜农副产品,价钿也比屋里附近个商店便宜勿少,我经常会帮爷娘去买一点,能够搨点便宜,还是蛮捂心嗰。
上世纪八十年代后期,阿拉屋里有个亲眷因为房子太小呒没办法结婚,就辣浦东买了一间私房,位置离十六铺对面个摆渡口勿远。房子重新布置一番以后,伊叫我去新房白相,我问伊要地址,伊拉讲就辣辣烂泥渡路。埃个辰光我笑煞了,哪能有搿能个路名啦。
又过了几年,浦东开发了,亲眷也动迁了,东方明珠、金茂大厦……一幢幢高楼拔地而起,陆家嘴成了新上海个金融中心。浦西个十六铺也勿输拔浦东,外滩金融街一直发展到十六铺。上世纪九十年代末,我到十六铺附近一幢金融楼上班,抬头就可以看到黄浦江对面个浦东,隔几天就能发觉对面有了新变化,真是日新月异。
现在十六铺搭外滩连成了一体,码头浪只有摆渡船,再也看勿到小辰光人山人海个景象,但是我还是欢喜经常乘渡轮到浦东去白相,特别是夜里到浦东个黄浦江边去看外滩,看十六铺,有灯光个夜景更加经典,更加辉煌。
![](http://imagev2.xmcdn.com/group10/M0B/C7/F3/wKgDZ1Zw_d7QfuCVAAFzHTtnbmM707.jpg!strip=1&quality=7&magick=jpg&op_type=5&upload_type=cover&name=web_large&device_type=ios)
声音简介
音频列表
- 2022-10
- 2022-10
- 2022-10
- 2022-10
- 2022-10
- 2023-02
- 2022-10
- 2022-10
- 2022-10
- 2022-10
查看更多
声音主播
用户评论