老底子哪能过立夏
文 / 周钰栋
一讲到立夏节气，交关老上海就会劲头十足个讲起老底子是哪能过立夏嗰。记得搿歇辰光，每到立夏前后，有人会辣弄堂里吊起一杆大秤，叫大家来称体重。为啥要称体重呢，因为有一部分人一到热天就会胃口勿好，整天睏痴懵懂，人也会瘦下来，搿就叫“疰夏”，据说称过体重就勿容易疰夏。其实，搿当然不可能真个有用，只勿过是一种蛮有仪式感个风俗习惯而已。一边称体重，一边还有人辣旁边讨口彩，比如：称老人个辰光要讲“秤花八十七，活到九十一”；称大姑娘个辰光要讲“一百零五斤，员外人家寻上门”；称小囡个辰光要讲“秤花一打二十三，小官人长大会出山”。每一句闲话里向侪是满满个祝福，听得每一个称过体重个人心里侪邪气捂心。
还有到了立夏搿天阿拉侪要吃只白煮蛋。为啥呢？因为大热天人身浪向容易生痱子，据说吃了白煮蛋，皮肤就会像白白嫩嫩个鸡蛋，变得生光的滑，勿会生痱子。
对阿拉小朋友来讲呢还有两样花头，一样是大人会拿一只熟个青壳咸鸭蛋装辣用红绿丝线结成个网袋里，吊辣小囡个头颈里，第二样是用红绿丝线轧辣小囡个手腕浪向。搿两样花头个目的是祝愿阿拉辣热天里平平安安，百毒勿侵。
当时我有一个同学是住辣上海市郊农村里嗰，伊拉还有三种特色食品：一种是用蚕豆来烧咸酸饭；一种是拿草头拌辣面粉里做成面饼；一种是用面粉搓成像蚕宝宝个样子后放辣油里氽一氽，做成一种叫“麦蚕”个食品。据说一家人吃了搿几样物事后，就勿会疰夏，整个热天平平安安、健健康康。
辣老底子，虽然大家日脚过得勿富裕，但是碰到重要个农历节气还是蛮讲究嗰，像过立夏节气就有勿少讲究，搿里向个味道勿光辣嘴巴里向，还寄托了大家对平安、幸福、健康个向往。
用户评论