两个馋痨坯
陶文进
讲起馋痨坯,大家侪勿会陌生,家家人家或多或少侪会有个把馋痨坯,当然主要是小囡。老底子住个是石库门,门对门,窗靠窗,张家烧红烧肉,香味道会飘满整条弄堂,害得小囡馋唾水哒哒滴。
阿三头脑筋活络,就会走进张家,立辣桌边,看着碗里个红烧肉一眼勿眨:“大姆妈,迭是啥物事?”“迭是啥物事,侬勿晓得?”张家姆妈一边抿嘴笑,一边用筷子夹起一块勿大个红烧肉,问:“想勿想吃?”阿三头马上点头。“如果侬承认自己是馋痨坯,迭块红烧肉就是侬个。侬是勿是馋痨坯啊?”阿三头犹豫一下,最终还是点点头,用承认馋痨坯换来一块红烧肉。
当然埃个辰光石库门隔着板壁算几家,拆了板壁是一家,邻里关系侪老好个。张家姆妈是个乐天派,欢喜开玩笑,大家侪晓得嗰。
小囡嘴巴馋勿稀奇,每个人侪是从小囡长大嗰,侪会留着馋痨好物事个记忆。勿过我听人家讲,老人也会嘴巴馋,而且越老越馋。
东厢房住着一对老夫妻,老头老太侪姓黄,年纪七十五六岁,结婚近五十年,恩爱如初。但是十年前有一段辰光,老两口闹得老结棍。为啥?馋痨。黄伯伯欢喜买甜食,芝麻汤团绿豆糕,鲜奶蛋糕奶黄包,水果也拣甜个买,西瓜桂圆加香蕉。黄阿婆想阻止伊,但是做勿到,因为伊拉从结婚开始就实行AA制,黄伯伯有伊个自主权,钞票勿辣黄阿婆个管辖范围里,黄阿婆急得勿得了。因为黄伯伯有糖尿病,医生规定勿能吃甜食,伊偏偏熬勿牢,宁可一面吃药,一面吃甜个物事。黄阿婆真是拿屋里迭个馋痨坯呒没办法!
黄阿婆到处讨救兵,请邻居帮忙想办法。我灵机一动,讲:“伊吃侬也吃,大家一道吃。”试了两个礼拜,黄阿婆摇头了,因为迭段辰光她胖了靠十斤,胖一点倒也算了,问题是黄阿婆个血糖指标也高上去了。
黄阿婆告诉阿拉,黄伯伯老大方了,看见老婆吃伊买个物事从来勿发声音,侬要多少尽管拿。我听了又生一计。
搿天黄伯伯又买了一马甲袋甜食,刚刚放进冰箱就接到电话,是我请伊来下棋。我与黄伯伯是棋友,伊一听就高高兴兴来应战了。五局三胜以后黄伯伯凯旋而归。呒没想到冰箱里个甜食已经全部失踪。黄伯伯刚想发脾气,卧室门突然打开,女儿女婿和外孙女走了出来。外孙女嘴巴边浪还有奶油个痕迹,伊一边笑一边讲:“太好吃了,超好吃!谢谢外公!”
女儿指指马甲袋,讲:“阿爸,侬买个物事质量蛮好,被搿两个馋痨坯吃光了,勿好意思啊!”黄伯伯看看女儿和宝贝外孙女,啥脾气侪呒没了。
迭样个事情后来又发生了几次,黄伯伯终于晓得了背后个真相,看辣宝贝女儿和外孙女个面子浪,终于不再乱吃甜食,老老实实控制饮食和吃药。
搿天,我又与黄伯伯一道下棋、茄山河,我问伊:“听黄家姆妈讲侬现在勿欢喜吃甜食啦?”黄伯伯叹了口气,讲:“欢喜吃甜食是小辰光养成个习惯,后来伊拉侪不让我吃,现在倒也习惯了,馋痨坯迭顶帽子总算是摘脱了。”
用户评论