买条河鲫鱼汆汆汤
沈一珠
我有个住辣苏州个阿姨，贤惠，聪明。
讲阿姨贤惠，是因为伊用心对家人。一日三餐，荤素调匀，伊总归可以拿一家门个胃弄得适适宜宜。讲阿姨聪明，是因为伊欢喜学习。虽然伊现在主要角色是外婆，但伊从来呒没停下学习个脚步。朋友圈里点个赞、私聊对话框里发只表情，迭种小事体，难勿倒伊。
伊辣网浪向，看到点啥好白相物事，或者是一种小菜新烧法，总会发拨我看看。比方讲，前一枪，伊就发了一只链接拨我：是一张吃鱼个时间表。搿也再一次表明了苏州人有“勿令勿食”个严谨饮食态度。
学习勿但能让人进步，更能让人变得聪明，所以，我也就跟辣聪明一记，去小菜场买鱼之前，先看一看迭张表：九月鲫鱼，十月草鱼。当然，也呒没介“候分掐数”（意为：准确，精确），差勿多讲起来，搿歇辰光个河鲫鱼是比较肥嗰。
至于吃法，顶顶简单嗰，要算是买条河鲫鱼汆汆汤了。汆汤个鱼倒是可以小一眼，碰辣巧，鱼摊头浪会有野生嗰。当然，到底是勿是野生，也是要眼见为实；不过，窍门是，可以拣长得细细长长、瘦瘦黑黑个鱼，总归是，野辣外头呒没人喂嗰，勿大会长得白白胖胖。
鱼汏清爽沥沥干，两面煎到焦黄，葱、姜也煸一煸，淋点黄酒，踏踏滚开水冲下去，开大火烧到汤水变成奶白色。然后，简单点，就稍许撒点胡椒粉，提提香气，就可以盛出来吃了；再丰富点，可以切点萝卜丝放进去，再稍许笃笃酥，萝卜丝吃口清甜，也好解脱点油镬气。
河鲫鱼吃法里向顶复杂嗰，就是先拿鱼汏清爽，再拿肉糜朝鱼肚皮里塞足塞满。传统来讲，迭只菜应该是红烧嗰。先拿鱼两面煎黄，葱姜煸香，放黄酒、生抽、老抽，稍许肉汤，大火烧开以后，再小火煨到鱼肚里个肉糜全部熟透，最后放点糖，大火收汁就可以了。
当然，烧菜迭种事体本来就呒没一定之规，假使欢喜清淡、原汁原味，就拿塞好仔肉个河鲫鱼，合好作料，隔水蒸一蒸。只要鱼、肉侪是新鲜嗰，味道也邪气好。
用户评论