那年到自贸区买海鲜
王志良
记得2014年个辰光，到自贸区买海鲜还是一个勿大勿小个新闻。记得当时正好外甥女从合肥到上海来白相，我考虑合肥属于内陆城市，外甥女平常吃海鲜个机会勿多，就同家主婆商量，准备到军工路水产品市场多买点海鲜来招待伊。女儿听到我个讲法，就辣辣旁边讲：上海外高桥自贸区里向有一家进口商品直销中心，里向进口海鲜又多又便宜，可以到伊面去看看。其实我之前听几个老朋友讲起过搿家直销中心，听女儿一讲，我决定阿拉一家门一道去兜兜看看。
隔脱几天，阿拉一家三口正好侪有空，就决定一道到外高桥保税区跑一趟，我负责开车。出门辰光太阳刮辣辣，车子开到一半，天浪就开始落雨了。看到落雨，我心里其实还是蛮开心嗰，因为按照我逛超市个经验，落雨天店里顾客往往比较少，所以我以为直销中心里向人勿会多，正好方便阿拉购物。呒没想到，等车子开到直销中心，雨仍旧呒没停，从车窗看出去，发现直销中心门口有交关人辣辣排队。停好车子，阿拉三家头走过去一打听才晓得，直销中心生意太好人太多，为了避免发生事故，采取了限流措施，每次只放30-50位顾客进去。葛末，阿拉也只好排队嗰。
还好，排了一歇队就轮到阿拉了，辰光勿算太长。一进商场，阿拉就直奔生鲜柜台，只见波士顿龙虾、智利帝王蟹、也门大木鱼等各式海鲜依次摆放，品种邪气多。柜台前人头攒动，大家挑选海鲜个速度相当快，10点钟勿到，越南皇家黑虎虾仁卖光了。迭个辰光，我看见工作人员勿停向一只空货柜里放海鲜，凑近一看是按箱卖个波士顿龙虾。一只龙虾同小人手臂差勿多长。一箱8只，卖572元，折算下来一只龙虾71元左右，比生鲜网站便宜一至两成，我马上“抢”了一箱。之后，又拿了一箱帝王蟹。
因为阿拉出门之前做过功课，晓得搿搭除脱进口海鲜价廉物美，进口水果也邪气勿错，所以阿拉三家头又转到水果卖场，柜台里水果品种邪气多，祖母绿智利车厘子、黑加仑、爱文芒果、越南红心火龙果、墨西哥红提……应有尽有。其中，宝岛台湾凤梨每只18元，个大，脆甜，水分多，比生鲜网站便宜5-10元，购者踊跃。智利车厘子卖得同样好，一般品质每斤33元，顶级品质每斤45元。打开一箱上下稍微翻一翻，车厘子只只饱满，一只勿坏。
迭个辰光旁边有人征得工作人员同意，品尝了一只，马上点头称赞，甜味十足，一点勿酸。其他顾客侪讲：搿搭水果品种多，价钱也勿算贵，综合算起来，比到超市或农贸市场买水果更加合算。葛末，凤梨、车厘子侪来一箱。
到自贸区买进口海鲜、进口水果，要是辣辣老底仔是痴人讲梦话。到了现在，进口海鲜、进口水果，交关超市里侪有，再也勿需要专门跑到自贸区去买了。
用户评论