广播专辑 弄堂茄山胡449 老早撑过个油布伞

老早撑过个油布伞


钱红春


 整理壁橱，翻出雨伞靠廿把，有长柄伞，有折叠伞，有用过个旧伞，也有连包装也呒没拆开个新伞。有自家买嗰，有单位发嗰，还有比赛个奖品。看到介许多伞，我又想起小辰光撑过个油布伞。


 油布伞个伞骨是用竹头做嗰，像筷子一样粗。伞竿长约1米，笛子粗细，连接伞骨个铰链座搭仔伞帽侪是木头做嗰。伞竿把手后方有孔，穿根绳子可以挂起来。布伞面用桐油刷过好几遍，油光光，蜡蜡黄。


 油布伞份量勿轻，一把起码有两三斤重，撑伞走路邪气吃力。假使只是重一眼也就算了，关键是撑伞个过程更加麻烦。像现在两只手悬空开伞或者一只手就可以开个自动伞，当时想也勿要想。


 油布伞新个辰光还好，只要用伞顶牢墙壁，手与腰一道用力，就可以撑开了。旧伞经过风吹雨打，油布伞面缩水变硬，再被雨水浸湿以后，伞布互相吸附粘了一道，需要拿出吃奶个力道，整个身体扑上去，才能勉勉强强撑开。有辰光实在撑勿开，要末向同学讨救兵一道撑，要末就喊几声“阿姨爷叔”，请走过路过个大人帮忙。所以小辰光读书碰着落雨天，除非爷娘硬劲逼牢，我宁可淋湿脱也勿愿意撑伞。


 油布伞用过以后，一定要撑开晾干，天晴以后再辣太阳下头暴晒，等干透才可以收起来。否则伞面勿但会相互粘结，还会发霉，变得龌里龌龊，灰不溜秋，撑开个辰光还有一股难闻个味道。


 当时油布伞个大小，颜色侪差勿多，为了防止借来借去弄错脱，交关人家用油漆辣自家个油布伞浪作记号或者写上自家个姓。至于大尺寸个油布伞，平常是看勿见嗰，记得小辰光辣屋里附近只看见过有个拔牙齿摊头有把落地个遮阳伞，撑开来个伞面直径差勿多有4米。据说搿种油布伞侪是要定做嗰。


 埃歇辰光虽然也有比较轻巧个钢骨伞，但价钿要比油布伞贵交关，一般人家勿舍得买。假使辣路浪看到有人撑一把钢骨伞，大家就晓得伊拉屋里肯定有钞票。


 上个世纪六十年代末我进厂工作，领取工作证搭仔各种劳防用品个辰光，还领到了一张借伞证，落雨天呒没带伞个职工可以凭证借伞。搿点伞侪是油布伞，每把伞浪侪用红漆写好编号搭仔厂名。厂里有专门放伞个房间，平常借伞还伞侪由门卫负责。我当时是踏脚踏车上下班，一方面是自家觉着车技勿大灵光，落雨天撑把介重个伞怕路浪出事体，据说厂里曾经有人因为撑油布伞踏脚踏车掼得勿轻；另外一方面也实在是小辰光被油布伞撑怕了，所以我从进厂到离厂个十多年里，借伞证一趟也呒没派过用场。