广播专辑 弄堂茄山胡462 牵记老房子老邻居

牵记老房子老邻居


钱红春


 搬到现在住个小区已经好几年了，新房子比老房子面积大交关，住得宽舒了，生活方便了，但是平常空下来，还是会常常牵记老房子和老邻居。


 四十多年前，我辣面积只有七平方米个亭子间里结婚成家，当时有句笑话形容搿种房子：“进门就上床，下床就出门”。因为房间朝北，屋顶浪又是几家人家合用个晒台，房间里向“夏天像烘箱，冬天像冰箱”。


 勿过，小也有小个好处，平常要寻点物事邪气便当，勿辣五斗橱里，就辣床底下个纸箱里，因为屋里呒没其他地方好囥物事。当时屋里要添置点占地方个物事，哪怕是一张小矮凳也要动足脑筋，用皮尺横量竖量，假使呒没测算好，就会东碰西碰。有趟我穿衣裳，一只手勿当心碰倒五斗橱浪个玻璃杯，滚到地浪掼得粉粉碎。房间小，容易打扫，摆点物事也邪气用心，勿光位置要适当，勿好影响人辣房间里走动，看上去又要适意。现在房子大了，但大也有大个难处，花钞票勿仅手脚要比老早大，想买啥就买啥，而且物事随便放，一个勿当心就寻勿着了。有趟为寻一把指甲钳，只只房间翻箱倒柜，弄得一身汗也呒没寻着。只好重新再买一把。


 现在年纪越来越大，记性也越来越推板，搿种事体也越来越多。前几年冬天，老伴经勿起广告诱惑，买了一只电动足浴盆，用了几趟就觉得麻烦，厾到角落头，占地方勿讲，还碍手碍脚。


 我还常常牵记过去一眼老邻居。上个世纪八十年代初，单位里分畀我一间六楼顶层个新房，虽然讲每天爬楼梯比较吃力，但一路侪有邻居朝侬点头问好，有个还会拉牢侬聊几句。假使屋里碰着点勿开心个事体，左邻右舍还会像自家事体一样，安慰或者劝导侬。我现在住个大楼里有电梯，揿下按钮就直达自家个楼层，虽然也有楼梯，但是属于消防通道，平常是勿走嗰。所以勿要讲其他楼层个邻居面熟陌生，就是住辣阿拉隔壁个一对小夫妻，一年当中难得碰着几趟，更加呒没几句闲话好讲。当年老房子里啥人家有人过生日，一碗热气腾腾个“长寿面”会得端到侬手浪，让侬一道分享伊拉个生日快乐。要是啥人有点难处，邻居们侪会出手帮忙。有一趟我买了台电视机，店家送货到一楼门口就勿管了。我一家头想搬搬勿动，正辣愁眉苦脸个辰光，四楼个王阿婆买菜回来，伊一看，就对我讲：“侬等好，我马上喊人来帮侬一道搬。”一歇歇工夫，喊来几个身强力壮个邻居，一口气帮我搬到六楼个屋里。


 现在房子比老早大了，环境也越来越好，日脚就更加勿谈了。牵记老房子、老邻居，当然勿是要回到老早。牵记老房子，是想像房子小个辰光那样精心布置房间，为现在个日脚增加点情趣；是想像老早买点物事要考虑周全，保持勤俭持家、理性消费个精神。牵记老邻居，是想随着居住环境个改变，社会风气个改善，建立更好个邻里关系，同时让自家多一眼来之勿易个获得感和幸福感。