广播专辑 弄堂茄山胡478 老底子有草头摊鲜

老底子有草头摊鲜


史美龙


 蔬菜里向个草头嫩、鲜，深受市民喜爱，饭桌端上酒香草头、草头圈子、草头鱼圆汤，“吃起来打耳光也勿肯放”。用草头、糯米粉做个草头塌饼，也是农家乐招牌点心。勿晓得侬有印象口伐，老底子乡下头还有一种用草头、面粉摊成个面饼叫草头摊鲜，味道香得来引得馋吐水溚溚渧。


 小辰光，姆妈做草头摊鲜大多选辣立夏节气，因为本地老前辈传下来一句闲话：“立夏吃草头摊鲜，六月里向防疰夏”，意思是有预防夏天病个作用。做爷娘个侪晓得，六月里，小囡一旦得疰夏，要好几日胃口勿好，吃饭勿香，精神像煞窠鸡一样混淘淘，严重个身浪还有寒热。爷娘手忙脚乱痧、买酸药水应急，弄勿好还要上医院。吃药勿如食补，姆妈怕小囡生病，就坚定个去做草头摊鲜。


 做草头摊鲜基本材料有两种：一个是新鲜草头，另一个是面粉。面粉出眼钞票粮票就可以买到，而选草头是蛮吃力嗰。啥个道理呢？因为春夏之交新鲜草头断档，田里向剩下来个侪是筋筋拉拉草板筋，身浪开满小黄花，准备结籽传种接代。姆妈爱子心切，走到田里佝腰屈背“众里寻伊千百度”，挑选出一根根有嫩芽个草头，凑满一把才罢休。


 有了草头，姆妈趁着“鲜犹未尽”，马上拿出面粉进行速配，敲只鸡蛋，加点水，加点盐，用筷子反复搅拌出一大碗绿莹莹厚笃笃个面糊。然后启动油煎模式，先辣灶肚里用稻柴引火，再添火力旺盛个豆萁压阵，一歇歇烤得圆底铁镬子滚烫滚烫。火候到了，淋好菜油，用铜铲刀“叮叮当当”刮几遍，等到青烟四起油香扑鼻个辰光，搅拌好个草头面糊浇到镬底。辣辣油星火爆声中，面糊从下往上摊开摊薄，里向新鲜草头也是随波逐流均匀移动，铺满半只镬子。


 迭个辰光，面糊水分慢慢收干板结，正面半生勿熟，反面已经香气四溢，到了烤焦个边缘。姆妈袖子管一撸，模仿羌饼师傅个动作，用铜铲刀贴牢滚烫个镬子“嚓嚓嚓”抄底，八九分熟个草头摊鲜来个“鹞子大翻身”，正面合扑成反面，刺啦刺啦享受镬子浪个油星按摩。


 我眼睛盯牢镬子，一眨不眨。姆妈看到我个样子心领神会，拎起铜铲刀对草头摊鲜切片装盘。我迫不及待抓起一块，烫得左右换手，赶紧鼓起腮帮使劲吹风降温，随即趁势咬上一口。呵，两面脆黄中间软糯，咸咪咪，油滋滋，香喷喷，草头摊鲜特有个味道吃辣嘴里钻到心里。


 草头摊鲜是姆妈精心烹制个农家小吃，小儿郎吃个是传统，吃个是希望，更是长辈个舐犊之情。