赏花、腌花搭仔品花
文并图/沈一珠
樱花开个辰光，心情总是欣喜嗰，雀跃嗰，小鹿乱撞嗰。就像日本诗人小林一茶写嗰：迭个乱哄哄个人世，迟开个樱花是良药。
只勿过，樱花一开一谢，也就六七天辰光，假使当中碰着落雨刮风，更加短。所以，樱花落个辰光也会有点小伤感：花落花飞飞满天，红消香断有谁怜？所以，就有人欢喜拿樱花腌制好，想吃个辰光，取一两朵，汏一汏，摆辣透明玻璃杯里，开水冲进去，层层叠叠个花，辣水里展开，漂亮得像重生一样。
其实，也可以拿樱花做成各种漂亮个食物。
樱花小饭团，就是做好饭团了，表面放一朵盐渍樱花；吃个辰光花拿脱，只留淡淡个味道，完全就是摆个POSE。樱花饼，面粉糯米粉加樱花汁做成个薄饼，卷一笃豆沙，再用盐渍樱花叶子包起来，吃个辰光叶子掼脱。或者做蛋糕、饼干和果冻辰光，摆一朵樱花进去，一记头就让人回到早春三月辰光。
葛末，腌一小罐樱花就是一桩愉快又邪气必要个事体了。
盐渍樱花个食材包括八重樱、盐、梅醋各适量。
第一天，要寻开六七分个八重樱。因为花开太足了，香味道淡脱了；呒没开足个花苞，浸辣水里也勿会再开。老清老早，夜里有花落地，趁还呒没被急匆匆个行人踏坏脱，选带柄花朵拾起，包辣手绢里。现在老少有人用手绢了，其实常备几条男式大手绢辣身浪，老派用场嗰，尴尬头里，手绢可以揩揩弄弄；勿冷勿热天气里，又可以当伊小围巾。
樱花汏一汏，浸一浸，再拿水分吸干；广口大瓶里，一层盐，一层花，一层层铺好，盖保鲜膜，用一只陶罐或者一块石头压实，阴凉角落头里摆两天。
第三天，拿花轻轻捏干，瓶里个水倒脱；花整理好排整齐再摆进去，淋稍许梅醋，盖保鲜膜，继续用陶罐和石头压实，摆回到阴凉角落头继续腌三五天。
三五天以后拿醋倒脱，花一朵朵摆辣竹帘子浪，放辣通风阴凉个地方晾干。注意勿好晒太阳，否则香气会走脱。
再过三五天，花完全干燥，花瓣浪呒没湿气了，拿花密封到透明玻璃罐头里，撒细盐，摇匀，摆冰箱里冷藏。想用个辰光，拿出来，浸辣清水里拿盐味道泡淡就可以了。
用户评论