相亲楼台阁
沈一珠
小村故事多，充满喜和乐；小姐勿出门，相亲楼台阁。
有趟仔去参加一个读书活动，齐巧，同一只门堂子还有一场相亲活动。结果，人轧辣一作堆，一时头里搞勿清爽啥人来做啥。
辣末生头听到一个男声，蛮响：侬是来相亲嗰，还是来读书嗰？回答是一个女声，稍许轻一眼：相亲。
屏勿牢差点笑出来，想想时代勿同了，相亲搿种事体用勿着暗黜黜了。摆辣老早仔，相亲活动还是要迓迓交嗰。
记得有一趟去安徽宏村旅游，参观当地旧时民居。搿是一家大户人家，造房子相当用心，不仅房间多，功能也相当齐全。
书房外头是一扇防盗门，意思是，万一屋里碰着强盗抢，先要保护嗰是老师跟小朋友。
屋里有麻将室，里向麻将台个摆放也有讲究——勿能跟墙平行，必须抵角摆放。据说是因为搓麻将属于偏财，假使台子摆正了，主人是要输钞票嗰。
客堂靠前两侧有两间老小个房间，叫做耳房，据说当年房屋主人请人来屋里唱戏就要用到搿两间房间，一间拨乐队，一间拨演员。搿能看来，从前唱戏人像煞见勿得人，叫到屋里来，也要叫伊拉孵辣耳房门里，关好仔门唱，只闻其声，不见其人。
顶顶好白相嗰还是小姐绣房个墙壁浪向有两只小洞，导游讲搿叫“相亲孔”。据说，当年屋主女儿到了出嫁年龄，屋主就寻机会请十里八乡看得上眼个小伙子到底楼小客厅里作客，上头就是绣楼，小姐可以居高临下从相亲孔里细细交看，寻找满意个郎君。
听导游讲得扎劲，心里实在是有交关事体搞勿清爽：当年坐辣下头个小伙子阿晓得上头有人辣辣偷看？假使晓得了，阿会觉着委屈——拨人家拣来拣去算啥名堂？
还有，勿晓得迭能介个相亲能看几趟？毕竟关系到小姐一辈子个幸福，好像一趟定终身勿大够哦。就算是唐伯虎搿能个风流才子，也是看到秋香对伊笑仔三笑，伊才觉得心里放勿落嗰。
【沪语解释】
轧辣一作堆：挤作一堆。
辣末生头：突然。
暗黜黜：暗地里。
迓迓交：悄悄地。
细细交：仔仔细细地。
放勿落：放不下。
用户评论