广播专辑 弄堂茄山胡560 两座城隍庙

两座城隍庙

杨保飞

 有种讲法：到上海勿去老城隍庙，就勿算来上海白相过。虽然讲得有眼夸张，倒也有眼道理。侬想呀，老城隍庙里个上海特产、上海小吃、上海风情、上海地域文化特色，真个是其他场所少有嗰。

 葛么，城隍庙为啥前头要加一个老字，叫老城隍庙呢？搿是因为上海曾经还有一座新城隍庙。相对于新城隍庙，豫园个城隍庙历史更加悠久，年代更加长远，拿伊称为老城隍庙就是迭个道理。搿座新城隍庙建辣一条小马路浪，叫连云路，搿条马路邪气短，只有百把米长，伊个南面是金陵西路，北面是延安中路。新城隍庙个庙门坐西朝东，格局当然比勿得老城隍庙，规模也要小得多，勿过，麻雀虽小五脏俱全，除脱各式各样个商店，伊也有庙宇大殿，供奉城隍老爷。我小辰光辣金陵西路第一小学读书，学堂就辣新城隍庙旁边，连云路搭仔金陵西路个转角浪向。平常放学，假使辰光还早，我常常会到新城隍庙兜一圈白相相。

 有一个同学屋里向就辣新城隍庙开仔一爿文具店，伊经常请我到伊拉店堂间白相。还有一个同学，伊拉一家门就住辣新城隍庙里头个一条小夹弄里，阿拉经常拿伊拉屋里个门板拆下来，搭起乒乓台，几个小朋友一道噼噼啪啪打兵乓。

 出仔新城隍庙个大门，左手转弯，走几步就是上海滩有名个洪长兴清真菜馆，据说是京剧马派创始人马连良先生个伯父斥资创办嗰，伊拉个涮羊肉名气邪气大。新城隍庙大门斜对过，是石派伤科创始人石筱山先生个寓所兼诊所，记忆里每天侪有勿少从全国各地来求诊个病人。再往远眼去，转只弯，就是一代武术宗师王子平老先生个寓所，我曾经看到鹤发童颜个王子平大师辣庭院里打拳……

新城隍庙周围个人文景观真个勿少，后来因为旧区改造，新城隍庙拆脱了。勿过，因为伊确确实实存在过，为了区分两座城隍庙，豫园里个城隍庙就被称为老城隍庙，成了上海地标性个旅游胜地。