广播专辑 弄堂茄山胡605 一块蛋糕个似水柔情

一块蛋糕个似水柔情


 晓得阿拉隔日要去白相，小姑娘夜里就开始准备了。每块蛋糕侪有自家独特个配方，迭趟是枣泥、焦糖，小姑娘讲，侪要亲自动手。


 其实，玛德琳蛋糕顶顶早，就是一块长得像贝壳个小蛋糕。用料、做法侪蛮简单，无非是低筋粉泡打粉，白糖黄油鸡蛋，拌匀处理过之后，摆到模子里，辣烤箱烤熟，再从模子里拍出来，就好了。只不过，味道也会与时俱进，比方小姑娘做个就是焦糖味。


 辣1730年之前，迭块小蛋糕，只不过是法国梅尔西城里，一般性人家屋里个家常小点心。说勿定跟阿拉小辰光常常喫个点心一样接地气：食堂里买只淡馒头，切片，铁镬子里倒一眼豆油，两面煎透，撒点盐，又便宜又便当又好吃。


 迭块梅尔西城小蛋糕，高大上起来纯粹是一次意外，当时，美食家波兰王雷古斯基流亡到此地。有天仔，一顿正餐有条不紊进行中。啥人想到，伊个私人厨师居然半当中拍拍屁股走脱了，连餐后甜点也呒没做。辣厨房间帮忙个一个叫玛德琳个女佣，只好硬仔头皮，烤两只自家还算拿得出手个贝壳小蛋糕，端上去撑撑台面。呒没想到，美食家老欢喜，一激动，女佣个名字，就变成了蛋糕个名字。


 眼门前，当小姑娘拿热烘烘蛋糕端上来辰光，阿拉也是有点激动个：温暖个焦糖色，咬上去弹性十足，有肥笃笃个黄油香味道。看见阿拉像陈奂生进城一样个笑容，小姑娘努力端着矜持，顺便扫了一下盲——


玛德琳之所以成为闻名全球个玛德琳，是因为法国大文豪普鲁斯特，伊一直记得小辰光，姆妈拨过伊一块又矮又胖，名叫玛德琳个小点心，掰一块辣茶里浸一浸：“那第一口有浮屑个温暖茶水，在碰着味蕾个一瞬间，一阵舒适个快感传遍全身……”正因为迭份念念不忘，普鲁斯特最终写出了文学巨著《追忆似水年华》。


 哦哟，辣小姑娘有点勿大舍得个眼神里，阿拉横竖横，决定带一块回去。总有交关事体，值得明朝去追忆。