姚慕双 周柏春-我在连队的生活

甲：一个革命文艺工作者必须要全心全意为工农兵服务，要不断深入工农兵，要熟悉工农兵。

乙：哦，要熟悉工农兵，讲到熟悉工农兵，我顶熟悉了，我阿姐是工人，我妹妹是农民，我兄弟是解放军，搿咯我对工农兵是顶顶熟悉。

甲：哦，侬交关熟悉工农兵。

乙：唉。

甲：搿么请侬介绍介绍。

乙：介绍点啥？

甲：介绍点工农兵个思想、感情、生活、语言，请侬介绍介绍。

乙：迭个叫我从何讲起呢？

甲：阿是侬讲勿出，搿咯没介简单个，勿是认得两个工农兵就熟悉工农兵，只有接近工农兵，脱工农兵打成一片，侪能够熟悉工农兵，迭个我深有体会。

乙：搿侬倒谈谈看。

甲：像我能介我演伲工人，我勿像工人，演农民，勿像农民。

乙：搿么哪能会得勿像个。

甲：勿像没生活。

乙：没生活。

甲：没工农兵思想生活。像去年我伲剧团里上演一本戏叫《我是一个兵》，我扮演一个班长。

乙：做个班长。

甲：头一日我戏演好，观众向我提出意见，伊讲我迭个班长演得交关像。

乙：像解放军。

甲：像周柏春。

乙：就是侬自己啊。

甲：但是我并勿灰心，第二日一早，我就到外头去荡马路。

乙：侬还有心思荡马路了？

甲：勿是单单荡马路，我有目的个。

乙：啥个目的呢？

甲：我看见解放军，就跟牢解放军学习。

乙：搿到好个。

甲：解放军走，我也走，解放军勿走，我也勿走，解放军买报纸，我也买报纸。

乙：好个。

甲：后来解放军搀仔一个小朋友过马路。

乙：搿么侬也搀一个小朋友过马路。

甲：迭个辰光旁边没小朋友啊。

乙：搿么侬寻寻看呢？

甲：边浪向有个老伯伯，我就跑过去搀牢老伯伯，我搀伊，侬阿是要过马路，我来搀侬过去。

乙：好事体。

甲：哦落老伯伯勿肯过去，那么我定坚要伊过去，伊定坚勿肯过去。

乙：搿么伊为啥勿肯过去？

甲：伊勿要过马路呀，伊是立辣辣等公共汽车呀。

乙：当然勿好过去了。

甲：后来解放军回部队，搿么我也回部队。

乙：啥侬也回部队？

甲：我等辣门口兜一圈，当日夜头我伲剧团又演出，迭个一场戏我演下来，我就征求观众意见，观众讲今朝迭个一场演下来，演得非常像。

乙：像解放军。

甲：像周柏春。

乙：仍旧像周柏春啊。

甲：讲我表面像，内在勿像。

乙：哦，内在勿像。

甲：我想到，只有到部队里去当兵。

乙：老老实实。

甲：去当兵，单单学表面是没用场个。

乙：对，要深入生活。

甲：领导浪向非常支持我，我心里向交关高兴。

乙：好个。

甲：我就向领导提出三点保证。

乙：阿里三点保证？

甲：头一点，我要加强思想改造，我要大学解放军三八作风，四个第一。

乙：好个，搿么第二点呢？

甲：第二点，我要当好普通一兵，我伲个生命是有限个。

乙：对个。

甲：为人民服务是无限个。

乙：对个。

甲：我要用有限个生命投入到无限个为人民服务中去。

乙：对个。

甲：我要做一颗用不生锈的螺丝钉。

乙：啊呀，迭个是雷锋同志讲个闲话吗。

甲：我现在向雷锋同志学习侬有意见，是�？

乙：当然有，没，没意见。

甲：第三点。

乙：第三点呢？

甲：勤俭节约。

乙：好个。

甲：艰苦朴素。

乙：好个。

甲：专门利人，毫不利己，身居闹市一尘不染，就是要我调到别地方去，我要站好最后一班岗。

乙：啊呀，迭个是南京路浪好八连啊。

甲：我向好八连学习侬也有意见？

乙：侬哪能又来了。

甲：侬有意见�？

乙：没意见。

甲：青年们应当有得雄心壮志，我第二日一早我就到部队里去。

乙：好个。

甲：走到门口只看见部队两边解放军同志排得整整齐齐，门口头上头还有横幅。

乙：写啥物事？

甲：欢迎新同志入伍，部队首长还等辣门口。我就跑过去我就脱首长讲，报告，我来了。首长㑚今朝介许多人欢迎我，还敲锣打鼓，我交关过意勿去。

乙：的确过意勿去。

甲：我交关难为情。首长讲侬朝后头看一看，我后头一看，后头还有一百几个新兵。

乙：勿管侬啥体吗？

甲：我也有份个。

乙：哪能侬也有份个？

甲：我也是新兵呀。

乙：哦，侬也是新兵。

甲：连下来就分配到一团一营一连一排一班。

乙：哪能侪是一了，记到好记个，侪是一。

甲：班长马上开欢迎会，介绍班里个同志脱我认得。

乙：熟悉熟悉。

甲：再介绍英雄事迹，再介绍光荣传统。迭个辰光我一头辣辣听，一头辣辣想。

乙：侬辣想点啥？

甲：我想我到部队勿是一日两日。

乙：日脚一定蛮长个。

甲：我应当找一个对象。

乙：啊，侬到部队里来找对象来个。

甲：啥对象了？

乙：问侬了。

甲：我找学习对象啊。

乙：哦，学习对象，搿么侬对象寻找�？

甲：寻找个。

乙：啥人？

甲：是班长。

乙：搿么㑚迭个班长哪能样子啊？

甲：班长是廿几岁个小伙子，身材勿高，但是交关结实，面孔是黑里透红，红里发亮。

乙：健康个。

甲：伲班长光荣啊。

乙：哪能光荣？

甲：有一趟蒋匪帮串犯大陆个辰光，伊一个人捉牢十八名武装特务啊。

乙：喔唷，伟大。

甲：光荣立一等功。

乙：了勿起，了勿起。

甲：班长对敌人是毫不留情，对自己同志热情，体贴，关怀。

乙：好个，真是个好班长。

甲：我当日夜头睏到床浪，等着我睏着以后，我觉着冷了，一歇歇热来。

乙：侬辣发花痴啊。

甲：勿是发花痴。

乙：哪能一歇歇冷，一歇歇热呢？

甲：一歇歇热后事来班长脱我盖条被头呀。

乙：喔唷，班长哪能介关心侬了？

甲：我等到明朝一早，我就去向班长提出问题。

乙：啥个问题？

甲：我说班长，侬哪能会得晓得我会得冷个？

乙：对个，搿是要问个，哪能会得看得出侬冷个。

甲：我半夜里看见侬�笼来，人缩成一团。

乙：看侬冷了。

甲：我想侬一定怕冷，搿咯我脱侬盖好。

乙：好个。

甲：我迭个辰光心里向真正激动。

乙：的确激动。

甲：班长对我介好。

乙：搿侬好叫向伊学习了。

甲：是个，我要向伊学习。我等到第二日半夜里向，半夜里我起来。

乙：啥体起来？

甲：盖被头呀。

乙：侬预备脱人家盖被头。

甲：说学就学。

乙：好个。

甲：我拿仔一条被头辣看，看么看大勿出，我一只只床浪看过来，看过来侪没缩笼来。

乙：侪勿冷个，搿侪勿冷个，侬被头勿要盖了。

甲：迭个板要盖个。

乙：啥体板要盖？

甲：迭个好事体我板要做好，我无论如何要盖脱个。后事来我一个一个看过来，看到最后一只床浪向是缩笼来个。

乙：哦，是辣辣发冷。

甲：我豪�跑上去脱伊盖好，勿畀了班长看见。

乙：对对对。

甲：盖好仔下来我笃定睏觉，等到明朝天亮我起来，迭个同志仍旧缩辣辣辣，我讲侬好起来了。

乙：好起来了。

甲：伊睬也勿睬我了，我被头掀开来一看里向还是一条被头。

乙：侬是被头浪盖被头啊，搿个同志人呢。

甲：迭个同志去站岗去了。

乙：喔唷。

甲：侬勿讲，班长还表扬我，讲我精神交关好，班长讲勿过下趟侬勿要做，侬自己身体要当心。

乙：喔唷，班长真关心侬啊。

甲：班长几化关心我啊。

乙：好个。

甲：有一趟突然来一个紧急集合。

乙：来个紧急集合？

甲：我半夜里向墨赤黑个呀，我就听见啥个声音啊，我就仔细听了，有种打背包声音，有种着鞋子个声音，有种背枪个声音。边浪向个同志还喊我了，周柏春，快，紧急集合。

乙：对对对，动作呀快。

甲：我搿能样子畀伊拉一紧急还要紧急了。

乙：哦，侬更加快了。

甲：勿是，我急煞了呀。

乙：迭个用勿着急得个，头脑要冷静，快。

甲：迭个我热情啊，我想我是先打背包还是先着衣裳呢，还是先着衣裳先打背包，还是着仔鞋子着袜子呢，还是勿着鞋子着袜子呢。

乙：喂，侬勿要考虑迭些问题了，快点去集合。

甲：集合，勿是集合，外头已经吹哨子了。

乙：搿么侬快点奔出去呀。

甲：我侪勿管了，背包一拿啊，我背仔枪就奔出去。

乙：好个。

甲：奔出去我就站好，站队立好。

乙：侬已经晏了，侬总归压末一名。

甲：对，压末一名，乃么站好。只听见，立正，报数，向右转，跑步走，切嚓切嚓切嚓切嚓，我跟辣后头跑。我辣想，解放军动作哪能如此神速，勿到一分半钟，侪部武装立即投入战斗。

乙：对。

甲：要是没有高度组织性纪律性，绝对办勿到。

乙：当然办勿到。

甲：搿么我跑跑跑跑，我抬起头来一看啊。

乙：啥体？

甲：前头人没了。

乙：哦，侬掉队了。

甲：勿是掉队呀。

乙：啥体呀？

甲：跟勿上呀。

乙：跟勿上就是掉队。

甲：我看见班长来了。

乙：班长也掉队了？

甲：勿是掉队，少脱一个人，伊来寻我来个。

乙：马上寻侬来了。

甲：看见我马上拿背包接得去。

乙：班长倒好个。

甲；走仔几步路了，后来我乘电梯了。

乙：地阳里向啥地方来电梯呢？

甲：我跌辣小河浜里了，滑下去呀。

乙：滑下去叫乘电梯。

甲：班长一看看见马上拿我拉起来，班长还搀仔我送我转去，后事来我想想我为部队里向增加几化麻烦。

乙：当然了。

甲：明朝一早我就去寻班长检讨，班长，我交关慢，紧急集合我迟到，我勿好，而且我掉队，我还乘电梯。

乙：喂，乘电梯勿要讲了。

甲：我检讨好仔连下来班长检讨。

乙：啊，班长也检讨？

甲：班长讲，周柏春同志，我也勿好，我以前没很好脱侬讲明，我本领没教到家，但是我伲要晓得，迭个紧急集合就是打仗，勿能推板一分一秒。

乙：对。

甲：假使我伲晏一分两分了，敌人就会跑到我伲前面。

乙：搿勿好。

甲：争取时间就是胜利。

乙：对。

甲：我以前没拿道理讲清楚，迭个是我勿好。

乙：班长哪能介谦虚了。

甲：是个呀，明明是我错，班长自己检讨。我通过迭桩事体下来，我就辣辣想，我一定要辣下趟紧急集合当中，我要得到第一名。后事来畀我想出一个办法来。

乙：啥个办法？

甲：请侬勿要讲出来。

乙：好个，我准定勿讲出来，啥个办法？

甲：啥办法，夜头勿睏觉。

乙：吃勿消个，夜头勿睏觉，还叫我勿讲出来。

甲：侬讲出来作兴慢慢叫要推广出去。

乙：没人向侬学习个。

甲：迭个办法勿好，后事来有畀我讲出一个办法，既能夜头很好睏觉，而且我紧急集合能够得到第一名。

乙：哦，啥个办法呢？

甲：我夜到睏觉睏到床浪衣裳勿脱。

乙：衣裳勿脱赞个呀。

甲：身浪向子弹手榴弹，水壶粮袋侪轧辣身浪。

乙：好个。

甲：手里拿仔枪睏。

乙：搿能睏觉衰瘏邪气衰瘏。

甲：我一向朝天睏个，搿能等到紧急集合我总归第一个了。

乙：对对。

甲：来得个巧，当日夜头就紧急集合呀。

乙：哦，好个。

甲：等到我立起来鞋子一着，我头一个就跑出去。跑到外头班长看见我，周柏春，你第一名。我马上报告，我还勿够，以后我还要快一眼了。

乙：喂，侬嘴巴里讲闲话还谦虚，侬迭个态度邪气骄傲，侬到底是谦虚还是骄傲，我也勿懂啊。

甲：迭个侬勿晓得个，等到我立好，班长对我仔细一看，周柏春，侬到此地来做啥事体？我里当兵。侬当兵为点啥事体？保卫祖国，消灭敌人。侬用啥物事消灭敌人？枪。侬枪呢？忘记带了。

乙：侬睏辣床浪枪捏辣手里个呀。

甲：我起来着鞋子个辰光我拿枪搁辣床边我没拿呀。

乙：啊呀，枪忘记带了。

甲：抢是战士第二生命，哪能可以忘记带呢，回去拿。我豪�回转去，回转去拿仔枪再跑出来立辣队伍里。

乙：压末一名。

甲：对个。等到下半日班长找我谈话，周柏春，迭一趟面孔勿大好看。

乙：比较严肃了。

甲：周柏春，侬迭个时间观念是加强了，但是侬对紧急集合意义还勿晓得，我伲是辣任何情况下头能够战胜敌人，而勿是为了个人第一第二，个人荣誉，侬连得枪都忘记带，侬对勿对？我勿对。我自己想想交关惭愧。

乙：侬要向班长好好学习了。

甲：我是搿能，我以往一经搿能样子，个人脱集体常桩摆勿准。

乙：是呀。

甲：我通过迭桩事体下来，我要下定决心，老老实实向班长学习，学习伊个硬功夫。班长学习毛主席著作。

乙：搿么侬呢？

甲：我就脱班长一道学习毛主席著作。

乙：好个。

甲：我一有空就顶牢班长，我就跟牢班长学习投弹、刺杀、打靶、单兵训练，班长还叫我游泳、跳高、跳远、长跑、短跑、铁饼、铅球。班长跳水我也跳水，班长跳沟我也跳沟，班长爬竹竿我也爬竹竿，后事来爬竹竿嚓嚓嚓，我爬竹竿也嚓嚓嚓，班长爬上去滑下来，我爬上去勿下来。

乙：侬预备乘风凉。

甲：勿是乘风凉。

乙：啥体勿下来？

甲：竹头断脱了。

乙：搿哪能会得断脱个呢？

甲：我人分量重呀。

乙：竹头压断脱了。

甲：我越练越高兴，我越练越开心，后来我参加战斗。

乙：啊，㑚还参加战斗啊？

甲：侬迭个还糊里糊涂啊？

乙：哪能呢？

甲：帝国主义侵略个本性伊会得改变�？

乙：勿会改变个。

甲：帝国主义靠啥起家个？

乙：靠侵略起家。

甲：帝国主义侵略㑚个辰光预先关照㑚�？

乙：伊专门突然袭击个。

甲：侬哪能好有丝毫麻痹思想呢？

乙：对对对。

甲：迭个辰光我就跟仔班长，我伲迭个部队全副武装，翻过几个山头，发现敌情，看见敌人一步一步辣辣迓过来。迭个辰光我要预备掼手榴弹，班长马上叫我沉着气，慢慢叫等到敌人接近我伲火力点，班长大喊一声脱我打。迭个辰光我伲手榴弹掼出去，像大雨倾盆一样。

乙：结棍个。

甲：在敌人当中开火，敌人开始溃退，迭个辰光我伲吹响仔冲锋号，班长冲了前头拿仔冲锋枪。

乙：英雄啊，受人致敬。

甲：迭个辰光我也跟上去，忽然班长叫我，周柏春，向左侧卧倒，我马上对左面扑下去。

乙：啥体了？

甲：只听见一粒子弹辣辣我右面啤飞过。

乙：班长哪能晓得子弹从右面打过来？

甲：迭个就叫硬功夫啊，伲班长听得出个。

乙：喔唷，本事大个。

甲：伲立起来继续再冲锋，忽然发现敌人一个火力点，碉堡里向迭个火力交关凶猛，我问班长怎么办？

乙：怎么办？

甲：班长讲连长命令我伲一班要炸脱敌人碉堡，班长捧仔炸药包扑上去，我也跟上去打掩护。

乙：好个。

甲：等到走近敌人碉堡，班长拿炸药包预备要想用个，忽然班长讲一句，炸药包雷火失效。

乙：啊呀。

甲：搿么我讲。

乙：哪能讲？

甲：怎么办？

乙：怎么办？

甲：只看见班长拿出手榴弹对准敌人碉堡眼里预备塞进去。

乙：好个。

甲；勿晓得赛勿进。

乙：啥体？

甲：敌人碉堡外头有得铁丝网。我讲，怎么办？

乙：又是怎么办。

甲：只看见班长朝右面一滚，绕到敌人个后门。

乙：碉堡后门。

甲：预备手榴弹掼进去。

乙：好办法。

甲：勿晓得勿好掼进去。

乙：为点啥？

甲：敌人后门关上了。

乙：搿么侬讲。

甲&乙：怎么办？

乙：侬专门讲怎么办，侬自己没办法了？

甲：我是没办法了，迭个辰光我看见班长拿起铁铲来铲起一抄沙泥对准碉堡眼里呛进去。

乙：沙泥有是用场，沙泥勿会爆炸啊。

甲：沙泥呛进去敌人眼睛看勿出了。

乙：哦，眼睛张勿出了。

甲：眼睛吃着沙泥看勿出了，我伲部队乘胜追击，拿碉堡全部包围，拿敌人侪部捉牢，拿敌人侪部押转来。

乙：好个。

甲：回到部队侪部放脱。

乙：啊，哪能好侪部放脱呢？

甲：迭个伲辣辣演习呀。

乙：哦，辣辣演习，㑚迭个演习哪能像真个打仗了？

甲：迭个就叫从实践出发，我通过迭一个一趟演习，我看到班长英雄、顽强、机制、灵活，勿怕牺牲个革命精神。

乙：啊呀，真是值得表扬，值得敬佩。

甲：我好好叫向伊学习，要向班长学习，我连下来班长就叫我一个人单独去炸一个碉堡，我就拿仔炸药包扑上去，我奋勿顾身，我巧妙避开敌人火力点，我一口气拿炸药包塞进敌人个碉堡眼。

乙：好个。

甲：只听见“哄”一声，我伲部队乘胜前进，拿红旗插到敌人个山头浪向。迭个辰光只听见观众是热烈个鼓掌。

乙：喂喂，打仗有得观众啊？

甲：迭个是我回到剧团了。

乙：侬回到剧团做戏了。

甲：连下来我装好炮弹，瞄准敌人，“吭，吭”两炮，敌人攻势侪部畀我摧毁。

乙：做戏。

甲：迭趟真个。

乙：哪能又真个了？

甲：我又回到部队里去了。

乙：哦，侬又回到部队里去了，侬部队去过一趟，学习过了。

甲：一趟哪能够啊，要勿断学习呀。

乙：对。

甲&乙：要经常学习，勿断学习。