湘黔自助游
2017年7月25号，下昼，日头辣辣较晒著塱。六介头集中著启良中学门口头，请著位老朋友开我伲一脚头送到上海南站，开启湘黔之旅。
绿皮车“壳落拓，壳落拓”一埭里慢趤趤开，我横正用得着，看风景正好。佢垯么横哬儿哬儿山河斗斗牌，也不厌气。
我风景看到半夜把12点钟户荡，火车已经到江西鹰潭快啧。再不睏也呒能啧，叛恁明朝别相不动亇。佢垯话我“只棺材日不见夜出现亇”。
26号上昼，抵达长沙火车站。就就近寻著爿旅馆，行李放脱，楼下头吃著眼早饭，拦著两部差头到闻名遐迩亇岳麓书院。火车站昰滩塱东横头，岳麓书院塱西横头，打条五一路一拔直朝西就可以。五一路笔笔直，一眼就有能望着西郊亇岳麓山。差头开过去也不消几许辰光，感觉上乡长沙城像煞介仔大大不大透。
到著岳麓书院，老实讲，对我来话也朆觉着有啥来得个深亇感触，也就像只江南园林恁，不管哪恁来过歇啧，就像只蟹恁阳澄湖里浸著浸一样。书院里出来朝上爬一段，就是爱晚亭。轧实也就是山腰上只亭子，也不觉着有啥特别。喉，不晓得阿是自家文化品位还不高。
看罢，又是两部差头回转。来去全要跨越湘江，看见著久闻大名亇橘子洲。昰个就是下一只景点——不过不是昰歇儿——叛介晒杀脱亇。先到旅馆边头吃饭，下昼先伏旅馆休息。横暂时呒啥安排么佢垯吃得快，我就叫佢垯先跑，覅等我，我一个子搭势码架笃笃定定吃，拿老总买亇六只无花果一事吃干净，倒是蛮饱亇喂！擂饱著边头散散步，大商场里兜兜。轧真大商场好像全国各地全错差不多。
下昼休息好，终5点多钟，动身到橘子洲。昰回乘亇是地铁。橘子洲么就是湘江里亇江心洲，狭哝哝，长遥遥亇。南北里长透长透，故嘞要乘里乡亇观光车，到著某只站点么下来走走。整个橘子洲么轧者就是只大公园，绿化自不必说，湘江水倒保护得好亇！青亨亨亇，看上去蛮适意亇。塱夕阳亇辉映下一埭边朝南趤过去，写意得不得了！跑到南横头毛主席像塰墪么7点钟宽点，正好太阳落山——日头正正好好从岳麓山上落下去，一片晚霞映照著湘江上空，颇有一番诗情画意。毛主席像巍峨雄伟，气势恢宏。虽然电视里乡看见歇几趟，但身临其境亇感受毕竟不是坐著屏幕前头有能替代亇。橘子洲南横头是一块广场，像只船头一样对牢上游，仿佛著湘江里乡劈波斩浪，立著垯遥望远方不禁觉着豪情万丈，真亇有眼像背后头石头上刻亇“指点江山”亇感觉。
7:30介仔开始回转，到城里闹市区吃著顿夜饭。别亇不记得，独记得点虫是好吃透好吃透，啥蚱蝉嘞，蝎子嘞，还有不晓得啥个物事亇蛹，真亇绝对不输海鲜亇，只是叫蛮多人心理上乡过不去。
7月27号，上昼，地铁乘到长沙南站，9点钟亇高铁。下一站，邵阳北。一路上乡亇风景是真美不胜收！一直想乘车巡游南方，昰趟出来终于实现啧！不消几时就到啧。不过听说讲邵阳北站只位置蛮落乡亇，离开邵阳城蛮多路著嘞！我伲亇目的地是南塰湖南、广西夹界头里亇崀山风景区，路远透，也呒得车子直达，交通是只大问题。车站门口头一帮黑车司机哄上来，撘我伲亇老司机俦谈生意。领头亇伊只棺材看副腔山有眼黑搭搭亇，但昰种人容易成为领袖，一看气场就是佢垯亇头头。我伲意思里人多，阿有车子坐得落亇？佢垯话有呃，里乡一个驾驶员就要去开来。乃么价钱话两日天1200，老总就话合算亇。我是横呒曼经济头脑亇嘞，几钱合算共总呒不概念亇。出来跟老司机学习亇。乃么还有点讲好亇——驾驶员，吃，跟我伲一俦，但住，自家来亇。
讲定当，上车。一个驾驶员开来一部七座头亇车子，不晓得阿是伊种叫商务车亇。我是横车子不认得亇嘞看见轿车全是桑塔纳，不是轿车么就是面包车。六介头钻进去，加上驾驶员，虽然紧绷绷么不管哪恁坐得落。我横胎本小么蜷著后头只角落头里。结果有点朆限着呃——部车子只空调不着呃！扛棺材热透热透呃！昰支恁亇大热天色开窗也热，关窗也不瀴，短寿觉着人也要晕脱快啧！乃么得出结论：下趟车子要先看一看嘞再上。
难惇屏到路边头爿饭店塰墪，终于好下来敨敨啧！爿饭店也就是人家自家屋里开亇。当地人支房子造得大嘞个高，我伲乡下头哪恁全只有能造小哝哝亇两层头房子？下头客堂里点好菜，垨到二楼上只包间里伏空调。也呒没其他人客，就我伲昰両个。不过佷倒覅小看昰恁亇小饭店，菜势蛮好亇，价钱也彊，大合算著塰！吃好横坐脱歇儿，哬儿脱歇儿，横也不急，毕竟晾饭时里也热宛亇，驾驶员也要待佢啌啌。
歇著歇儿，继续差路。终半下昼把头儿到著崀山景区。景区外头大路口寻著爿栈房，像也是啥个星级亇，条件倒灵亇呀！但价钱也彊亇，像就一百块一个人。合算亇！房头朝东隔过大路就好望着青山绿水，适意呃！
歇著歇，动身，朝南深入景区。钻进群山一看，噢，昰支景象是真赞得不得了呃！丹霞地貌亇美着实令人震撼！独看见一只只山头岩壁毕巉，顶上一撮绿毛，对牢蓝天白云。岩壁脚跟缓坡上乡竹林环抱，坡脚跟头白墙黑瓦红门——一个个村宅坐落于此。宅头朝外一片稻田，阵阵稻香扑鼻而来。昰个简直就是世外桃源亇真实写照！
不过，任务在身，先呒能驻足欣赏，要傍早跑景点。穿过世外桃源直扑骆驼峰。话叫骆驼峰么佷一想也想得出哪恁副样子啧——两只驼峰一只头，真亇像只骆驼巨无霸兀立于群山之中，惟妙惟肖！上！不过両个老司机爬到半作里爬不动啧，乃么终极任务就交畀我啧。
打栈道上一路前进，昰趟亇栈道斥短寿撘老早跑歇亇像煞介仔全不一样，边头亇岩壁巉透巉透嘞！朝上望像恨不得当头压上来亇恁，朝下望像氽著半空中亇恁，支栈道完全就是著峭壁上挑出来亇嘞！简直难以想象哪恁造出来亇！両个工人真大胆、大本事！佩服！
爬到山脊上啧，一脚过跑到尽头观景平台。哪恁形容嗫？喉，我也只会群山巍峨、层峦叠嶂昰排词语啧。横照片拍好，侦察任务完成，退转。结果撘両个老法师俦碰头，刚刚发现，原来我只骆驼身上朆爬着亇！啊？话著刚儿山脊上有只擘脚子朝下亇倒是好爬到骆驼身上亇条路？我望望骆驼头上条通天路上别亇游客，晓得自家做著桩戆事体——一根筋独识货打山脊上跑，结果一跑跑著条断头路上，不识货朝下弯亇弯，倒是条活路！乃横算啧，跑，回转。大圣一直话亇：“错脱亇物事多嘞！”昰句闲话相当有哲理！是昰恁，想想穿，覅加二不舍得。
离开骆驼峰，再去领略其他奇峰异石。有亇么像只萝卜，有亇么像只雄癞团爬著只雌癞团身上，还有亇么——也难以形容。辰光不早啧，回到来亇辰光经过亇伊片世外桃源，下车好好较拍拍照，欣赏欣赏。我留心著一记具体位置——岔路口正好有块碑，上头刻亇是“新宁县崀山镇基本农田保护区”；碑上头亇路牌显示左前方300米是辣椒峰/骆驼峰、林家寨/刘氏宗祠。
回到旅馆吃罢夜饭，一俦出来轧闹猛。边头远不多广场上像塱搞演唱会嗫啥个活动，毕竟旅游景区，人气蛮旺。不过待我伲过去正好散场。乃横随便兜兜。不过我倒头颚朝天著塱望星。远离大城市，光污染毕竟少，星看得清爽。就是可惜，昰歇儿望得着亇両只我也就只认得北斗星嘞北极星。
一寣觉转，大天白亮啧。出发！到八角寨景区。索道朝上，一览众山小。独看见両只奶头山厡是昰恁四面毕巉，顶上一撮毛，昰个丹霞地貌滑稽是惊惊滑稽亇！到著顶上顺著山路跑著一个来回，不过看来看去，发现还是索道站头塰墪只角度望出去顶顶赞！条索道后晚来查资料要两里宽，横头是一块山间平地，环抱亇群山再远点，像是一条塌塌恁亇大山谷，一片白迷迷。再过去，天地之间亇群山明显要高出一档。昰支气势，雄伟壮阔！呒得闲话讲！
昰个塱乡，一面是湖南界，一面是广西界，正好全是我语言所同门亇地盘。想当年语言所里一直不缺西南寄来亇美味。支场许是灵！
离开八角寨，进军天一巷。所谓天一巷，就是号称天下第一巷亇丹霞地貌一线天，据说算崀山第一绝。按照百度百科亇数据：天一巷全长238.8公尺，两面石壁高80-120外公尺，最阔塰墪0.8公尺，最狭塰墪0.33公尺。可惜，両位老法师爬到半作里又衰瘏透啧，乃么光荣使命又交到著我昰个侦察尖兵手里啧。约定辰光：11点钟，不管到朆到，必须回到集合地。上！还好，额角头，10:50户荡，正好摸到天一巷口！噢，立著口口头已经一阵阴风吹得冷透冷透啧！朝上爬著両级踏埠是愈加瀴得恨不得鸡肉痱子凛得！正好辰光也呒曼啧，嗰么豪髞退转去㕹！不管哪恁代表团队来过歇啧。
回到旅馆物事投好，又要转移阵地啧。先大概是塱新宁县城寻著爿饭店，肚皮擂饱，一路朝北，回到邵阳北站。付车钱辰光，驾驶员道著住宿钱也是伲来亇，但伲一讲清爽就好啧，就是讲因为【上夜】底头住宿钱100块是伲垫付亇，故咾昰歇儿头儿实付是1100，因为上日子谈生意亇辰光讲好亇，吃跟我伲，住宿钱是驾驶员自家来亇。但是昰个里乡可能有眼缠隔戗——就是讲上日子谈好亇是佢垯头头，但驾驶员本人可能正好去开车子著嘞朆晓得亇。乃亏著昰位驾驶员好讲闲话，叛介场时要有矛盾亇。不过昰位姓颜亇师父畀伲感觉确实蛮好亇，服务相当周到，人也老实，态度也好，相处亇两日天非常亇愉快，虽然车子性能有眼推扳，但良好亇服务【老早】全弥补亇啧。
好，进站候车。下一站，贵州省会——贵阳。到著月台上，正好先有一列高铁风驰电掣飞驰而过，“共”势嚷一记，拿両个等车人吓得一骤呃！我是幸亏著望着佢来亇咾有心理准备，别人家冷陌生头一记是想想是吓亇。不过昰个倒也是难得亇对高铁威力亇领略。
17:51，发车！梦寐以求亇云贵高原之旅！就是可惜啊，一埭边竟然常埭埭塱钻山洞呃！风景也看大不着，实在是失望啊！不过想想国家力量真了不起，昰恁长亇线路打著昰个些儿些儿隧道！行我伲有能塱巨大亇山体里乡钻进钻出，游走自如。伟大！伟大！
不过待夜头到著贵阳北站，最尴尬亇事体来啧——突然之间发现原来定亇宾馆塱贵阳火车站附近，不是贵阳北站，远透。乃么根据景点嘞、路程嘞厛间综合因素考虑，决定退脱就近再寻。乃么昰个辰光佷晓得亇呀，【老早】全畀人家定脱、住脱亇啧！乃是両个老司机立著站厅里手机上搜畅搜畅，觅不着。嗰么朝外【目沙】，结果昰个站头哪恁跑出去还摸大不着嘞，朝上朝下昰塱拦脱，伊塱碰鼻头转弯，恨不得九曲十八弯，难惇兜到外头广场上望着昰座大都市，又跑著个反方向再退转来，到著一只大路口，望望边头高楼大厦倒秃是宾馆，搜搜全已经呒没房间啧，乃么老法师立著路口头继续搜。我是年纪么最轻，电子设备恨不得最不会弄，一样也帮不着。不过昰个辰光両个老法师倒还立得动，我倒瘥脱啧，边头草地上一坐，立不动啧呀！故嘞逐个人体质真不一样，真要一本正经跑倒我跑得动，但要立倒佢垯立得动。不过瘥么瘥，看亇气力还是有亇，正好观察观察昰座城市。从夜景看来，城市面貌不输上海，也高楼大厦，车水马龙，灯火辉煌。路口头有排像黑车驾驶员，警察正好来么要紧掩脱眼。
终于！両个老法师寻着著一爿栈房，著城中偏北亇宅吉路上。乃么也只好拦差头。不过我忘记脱啧，为啥両部差头不大肯去。乃么撘黑车俦也谈谈。不过还好，正规差头倒也叫着亇，但是服务模式是黑车式亇，驾驶员话几钱就几钱。开著路上听驾驶员话话，像煞佢垯昰个里差头嘞黑车嘞也有复杂亇利益关系。昰点看来还是有眼乱亇。
终于到著旅馆！又是一大深黄昏啧。衰瘏啊！结果还呒曼电梯，行李箱要拎到四楼，作孽啊！乃呒办法，毕竟昰个辰光栈房呒拣选啧，有处住下来也蛮好啧。我是横彻底瘥脱啧，佢垯叫著吃夜点心也吃不动啧——确切亇讲应该是夜饭。直接，睏！若假朆记错是真亇搭着枕头就睏着亇。
第二日，7月29号，一早，大厅集合，准备出发。凑人还朆来齐，沙发上先眠下来眯脱歇儿，实在朆睏足，自然也朆睏醒。佢垯话我像只骆驼，吃起来么“白搭白搭”猛吃，吃饱著么不吃也可以。乃么猛吃，猛跑，猛睏。我听得“哈哈哈哈”睏梦头里笑出来。
外头宅吉路上吃罢早饭，两部差头到黔灵山公园。只公园叫大嘞个闹猛呃！终正好礼拜六嘞人也加二多点亇——散步亇，跑步亇，爬山亇，跳舞亇，打球亇，游泳亇……横青山绿水场许大么大家全高兴拥过来别相亇呀！不过昰幅场景说明现在生活确实好，社会稳定，民众安居乐业，生活幸福，要知足，惜福，学会珍惜。
公园里亇山看看低宛亇，也就像佘山恁，但一查海拔要千三四著嘞！呒办法，底脚高，毕竟著高原上啧。轧实某种程度上来讲公园也全错差不多，到昰个塱也就是看看新鲜。不过黔灵山公园里両只猢狲的确是一个亮点——有滩山上全是散放亇猢狲，树上荡荡，地下爬爬，撘游客俦近距离接触，惊惊滑稽亇。有点倒老底也不晓得，昰趟看见著嘞晓得——原来猢狲不会撚瓶盖亇，拿着瓶头水是底下啀开著嘞吃亇。有只猢狲盯牢定我塱望，一头望一头朝我跑过来。我一看晓得铆牢我包上隘亇瓶饮料啧，连忙立起来，只猢狲正好伸手要来搲瓶饮料，还好朆够着。看看両只猢狲点毛倒赞亇呀，毛势齐得！恨不得一把搿牢著撸脱両记。不过侺背后头看佢佢要呴亇，㧙转来“唏”一记像拿佷喝牢定亇恁。算啧，覅去撘佢垯俦多缠头，慢慢攋着记、咬着记过着著“狂猴病”么死啧。
离开猴山，到黔灵山公园南门外头大路口塰墪爿租车店租车子。阿有六个人亇车子？头起先话呒曼，乃横店里许好著帮伲联系看阿调得着。乃么我伲先回转。正好电话打来话有车子，巧啧，乃么几个老司机去提车。宅吉路上吃好饭，房间退脱，车子上安顿好，差路！下一站——贵州省西南角亇兴义。出城前头为啥事体先要到提车塰墪去一埭，正好话起车子上有一滩是本生就坏脱亇佢垯晓得亇噢！结果昰歇儿亇工作人员话不认啧话，乃么打电话著原经手，还好原经手承认亇，乃么我伲叫著合同上昰点要写清爽亇。看来下趟租车辰光最好突突圞圞全替佢拍下来，防止有排问题讲不清爽闹矛盾。
好，妥善解决，开启黔西之旅。沿途风光无限，路也好开。支高速公路像煞介仔是筑著山顶上亇，因为望出去是一览众山小亇感觉嘞，像传说中亇天路！巷巷尽尽亇山头全塱撘自家差不多亇位置，壮观得不得了！轧实我一直觉着乘车旅游又是尽兴嘞又是省力。
一个下昼全塱饱览壮丽山河。到达兴义不相六点钟阿差不多？座城市是也弄得灵透灵透，城市面貌好得邪去！不愧为旅游城市。住亇宾馆也赞得，称称心心！安顿好，开著车子朝南到闹市区觅食，寻著爿少数民族风情亇饭店，菜势也好嘞叫服务也有特色。结果吃罢出来一兜啊，别相得㧙向脱啧呀！伊个塱乡是像只八卦阵恁亇，从一只广场朝四面八方辐射出去亇，我伲兜是从外围兜进去亇，几个突圞一转，方向【老早】摸不着亇啧。几经周折，难惇摸回停车场。结果车子开出去，昰个路也像八卦阵一样，好像也要转両个突圞嘞！不过正好也看看夜景。兴义亇街路闹热非凡，着实也是好地方。全国各地均衡发展，跑到何塱全有能享受着便捷舒畅亇生活。
又是一寣觉转，7月30号，上景点。乃横自家有著车子便当啧，部别克商务车傍嗰日子部车子明显性能好，乃么毕竟用不着外头人来驾驶，六介头坐得也宽舒点。一埭边风景无限好，点云像低得，觉着神奇得来！
头一站，南塰最远亇万峰湖。轧实也就是乘著船开出去欣赏湖光山色。湖光山色，轧者看来看去也差不多，但当然不同亇户荡总贯也有不同亇景象。乘著船上笃笃定定欣赏，真亇蛮放松，蛮享受亇。
万峰湖回转，路边头就是万峰林。一到就是个惊喜！原来佢垯昰个门票对我伲上海市嘞些儿对口支援地区亇民众有相当大亇优惠。进去景区也大宛亇，有眼像只开阔亇峡谷。观光车顺著山腰上开，正好一路欣赏谷底世外桃源恁亇村宅撘田野，还有对过密密猛猛亇山头——鼎鼎大名亇喀斯特地貌。乃么每开一段嗫，就有只观光平台，高兴嗫就可以下来立定著看，但是车子不等亇，要跑著必须等后头班车子。但后头班车上亇人不一定高兴著伲昰只景点下来，嗰么我伲昰坒人就跑不连，乃么就谑佢垯下来：“讴！昰个塱风景赞啊！下来拍照啊！不下来戆亇！”也嘲得来！
不过还好，班头还算猛，总贯搭得着亇。顺著山腰一站一站朝前观光。有一滩来得个经典——山谷下头昰块盆地当中亇稻田里有一只大透大透亇潭潭，像只聚水潭。远亇塱，青翠亇喀斯特群峰脚下稀零敞冷点缀著几只白墙黑瓦亇宅头；近亇塱，一条小河蜿蜒流淌，河上一条坝，坝下有瀑布，两部水车缓缓盘转。昰幅景象真亇是妙不可言！
出来亇路线是下山打平荡亇山谷里跑亇。换只角度，看群山环抱，也是美不胜收！
回到景区门口终一点钟快，简简单单吃饱饭，直扑马岭河景区。昰只景区轧实就是只又深又狭亇河流峡谷，两带面山体蛮巉亇，底下就是水流湍急亇马岭河，山崖上挂著両条细哝哝、长遥遥亇瀑布，蛮有美感亇。仔细看，山崖上交关区域有明显亇流水冲刷亇印踪，可以想象水量充沛亇辰光是昰滩亇陡崖上瀑布大得吓煞人呃！
顺著两岸亇峭壁兜著圈准备出来，乃么叫下去容易上来难，爬是爬不动亇啧，亏著有电梯好直接上来，【情愿】使出点铜钱省气力亇。
马岭河出来，朝贵阳方向回程。但是，今夜亇目的地是——黄果树。到旅店里安顿好出来寻夜饭吃是已经7点半户荡啧，但爿天倒厡蛮亮著塰，毕竟虽然同样合用北京辰光，但贵州撘上海俦东西里推扳巷尽路著嘞，硬碰硬有时差著塰。
第二日，7月31号，礼拜一，朝景区出发！景区门口是人海海万万。大圣去排队买票。但不是话有著票就好顺利进去亇，好像是车子要等畅嗫还是啥道理，独看见大圣领著个小混混恁亇黑车驾驶员来一俦谈生意。记得是话好景区里全部兜罢出来送到我伲歇车子塰墪是300块。好，嗰么跑，效率总贯要亇。说走说走。
黄果树景区也分成功若干只小景区亇。山路上乡七曲八绕钻进去，先么是到只叫天星桥景区。到著之后嗫，昰个黑驾驶直接去接别亇人客亇，叫我伲出来之后打佢电话，佢会安排别人来接我伲到下一只景点亇。乃么我伲朝里。结果话刚进去就落雨亇。我横像野战军恁书包里一家一当全著塰亇，直接抽出阳伞继续跑。佢垯有亇伞朆拿么就不朝里啧。结果我伲朝里继续跑亇也不多歇儿就畀人群冲散脱啧。外加路小透小透只有能一眼一眼朝里磨亇，急也急不出亇，追也追不着亇。实际上么也就是看看青山绿水，不算哪恁有特色。天星桥出来之后就直扑核心景点——黄果树瀑布。
黄果树瀑布，名声绝对砰砰响，今朝终于身临其境，一睹真容。远远里已经有能听见飞流直下亇巨大声响，跑到近边，愈加见得宏伟壮观，气势磅礴。的确，外出旅游，瀑布也看见不少，但是昰恁大亇瀑布的确从来朆看见歇，怪不得昰恁出名法子！不过老实讲，比大，黄果树绝对呒得闲话讲，但是要话比赞嗫，别亇无名小瀑布倒也不输佢。轧真刚前头看见亇马岭河峡谷亇両条瀑布就灵透！为啥嗫？因为黄果树瀑布虽然大，但是横阔竖短亇；马岭河峡谷里亇瀑布，细长条子，美感十足。昰个就像人恁，一边是相扑运动员，大大亇，壮壮亇，看么也有看头，但大好看是也不好看透；一边是时装模特儿，长哝哝，瘦刮刮，不像相扑运动员昰恁结棍么身材赞亇呀，看是惊惊好看亇。但是要讲气势，黄果树瀑布肯定是更胜一筹亇，昰只名声不是虚亇。
离开瀑布，又一个新安排亇驾驶员送我伲一直到景区外头亇停车场塰墪。收300块洋钱亇辰光我伲有人问著声哪恁要300块，个驾驶员话：“放心，不会乱收尔垯铜钱亇！”我心里笑笑，发现佢垯像煞介仔也形成著一种民间自发亇规范化服务——一帮子人一俦做，头一个人价钱讲好，乃么像接力一样一只景点一个人负责，阿末一个人负责收铜钱。
黄果树景区出来，正好日中厢里，但顿饭话我哪恁像呒得印象啧话！看看费用记录么昰日亇午餐昰格是一只大鐾交。话著我伲真亇是车上随便吃著眼亇？横半下昼头儿我伲又回到著贵阳城里。三点半把兜著兜只花溪国家城市湿地公园，虽然看上去也蛮普通，但是真亇是山清水秀，环境要傍我伲昰塱赞。四点半把到著甲秀楼。昰个甲秀楼，应该讲也是一个蛮有档次亇文化景点，就是可惜我朆大看懂啥亇，横就是一埭三层头亇又像亭子又像塔亇建筑。印象最深亇竟然是里乡伊块像乌龟恁亇石头，还替佢做著只红木亇带乌龟脚爪亇底座，滑稽透滑稽透！喉，一只高档景点只看得来昰只老不打，想想自家昰个文化素养轧实真不哪恁。
好啧，住宿，吃夜饭！结果啊，昰夜住宿亇户荡叫吓煞人呃！斥短寿密密猛猛、巷巷尽尽二三十层亇高楼大厦，无论是远望上去还是身临其境，全觉着真亇是经典亇诠释著啥个叫钢筋混凝土森林，外加还差不多是同一高度亇高大乔木丛林。昰副排场，别个城市从来朆看见歇。
我伲住亇场许好像叫财富广场，横几幢高层全是亇。里乡有吃有住，外头招牌巷尽，繁华是繁华亇。吃罢夜饭一俦下来兜著歇，乃么伏著楼下头啀著両块西瓜，也不早啧，8点三刻啧。佢垯不兜啧，但我还意犹未尽嘞呀！本来就日不见夜出现亇，难得来趟把贵阳，大好时光哪恁肯白白里浪费？乃么又开始一个子亇探险活动啧。先到外头大路口有眼古色古香亇廊桥塰墪趤著趤，乃么看著看辰光，地图上估著估距离，下定决心，朝阿哈湖国家湿地公园进发！从地图上看，西南方向有昰恁一只公园，里乡有一片大透大透亇水域，就叫阿哈水库。乃么我昰个人啊，有强烈亇向水性，从小相信著浏河、长江滩上别相亇，大面积亇水域是对我吸引力大透。阿哈水库在此，自然不容错过！
保险起见，问声过路人哪恁跑。因为方向不等于路，就算地图上有路，也可能有无法即时反映出来亇阻碍通行亇未知情况。结果啊，问著几个人，全指向财富广场朝东南亇伊条路，我想斥短寿方向不对亇喂！但想想当地人肯定傍我熟悉咾！乃么就抄东南跑。一埭边厡是高楼大厦，闹热非凡，跳舞亇，兜街路亇，吃夜点心亇……社会安定真亇实在是好！问着両个路人也全蛮热情、友善亇。
到著公园乃么晓得，只门口是朝东㪬得比较出亇，故嘞从财富广场是要抄东南跑亇。但昰个也就意味著，从门口跑到西塰只水库要长宛一段著嘞！到门口大概已经9:40啧，阿要朝水库跑？上！里乡夜锻炼亇人厡蛮多著塰，不单是门口塰墪亇大广场，朝西通往水库亇路上也有不少亇人走路、跑步、踏车子。我拦著个人问著声，佢话公园廿四小时开亇，只要佷敢墫著塰。乃么我一拔直朝西，一埭里全是沿塘浒亇路，右带边就是条河，一直有能听见哗啦哗啦亇流水声气，但是天夜，隔著绿化带望不着，到接近水库亇廊桥塰墪刚看见条河。部廊桥撘边头座塔打著灯光，夜景赞宛！但到著昰段里，人已经少宛啧，毕竟又是晏嘞又是远。昰个辰光差不多10:05。有能感受着水库亇气息啧——朝西远望过去，高亇塱像是大堤嗫还是山体岩石。但不是望得着就跑得到亇。条路开始朝南弯，撘水库俦开始平行啧，一直到只转弯角子上又来著只180读大转弯，朝北弯啧——原来开始爬坡啧。光线暗宛，难得有部把车子开过。爬到顶上快啧，一只三岔路口，一路像沿塘浒亇，一路像通到坝顶上亇，有只门口，上头写著“阿哈水库”“禁止重车过坝”。昰个辰光已经10:17啧。通到坝上亇路已经彻底呒曼路灯啧。摸上去！
终于，摸到著坝顶上，看见水库啧！塱右手边边。虽然乌星墨夜暗，但是借助微光，厡旧有能看见昰片水域。水库里好像有両盏幽宛亇红灯，不晓得阿是养亇啥个物事。对岸远亇塱有両只山头，山头上撘山头夹厢头里有城市灯光。左手边边像是水库管理亇房子，房头里像火亮著塰。还有像听见狗謷。突然倒有种幻觉，像塱执行特种作战任务——夜袭敌人营地。
昰个辰光已经10:30啧。豪髞跑。跑到大门口贵阳阿哈湖国家湿地公园牌子塰墪已经11:10啧，跑到财富广场外头大路口终11:30快啧。昰恁看来昰段路不相五公里有亇。一个来去么跑著十公里。有眼饿嘞瘥啧，楼下头超市里买著眼吃头，到房间里吃著眼嘞睏。第二日横呒啥安排，一寣睏到自然觉。楼下头简简单单吃著顿饭，叫著两部车子到贵阳火车站，下昼2:40发车，打道回府。
话么话打道回府，轧者啊，叫新亇旅程刚刚开始。一路上乡城市乡村、高山峡谷，厡旧是看不尽亇风景！一直看到第二日，也就是8月2号，下昼五点钟介仔，乃么只好依依不舍亇从车厢里乡钻出来。
7月25号，上海出发。
7月26号，抵达长沙。
7月27号，抵达崀山。
7月28号，抵达贵阳。
7月29号，抵达兴义。
7月30号，抵达黄果树。
7月31号，回到贵阳。
8月1号，贵阳出发。
8月2号，回到上海。
九日天亇旅程，两个字——适意！
疁·浏河长江
2017年10月-12月
嘉定建县799周年
用户评论