菜篮头里忆旧事
许德华
俗话讲“开门七桩事”，柴、米、油、盐、酱、醋、茶。我从小做家务，经常去小菜场，搿歇想起来埃歇辰光买菜老吃力嗰。
一是豆制品搭仔肉蛋侪要凭票供应，屋里人多勿够吃；二是附近小菜场只有一家，去得晚了，连青菜也卖光了。阿拉欢喜吃个海鱼是紧俏货，我常常天勿亮去排队。夏天还好，冬天就辛苦了，菜场就是露天搭起来个棚棚，四面通风，西北风刮起来，冷得我眼泪水溚溚渧。埃歇辰光中学生课业负担勿算重，做家务买菜个学生也不止我一个，早浪买菜碰得到同学，有同班嗰，也有同年级其他班级嗰，碰着成绩好个同学一道排队，我会抽空讨教一番。有一个同学，父母是双职工，还有一个弟弟，屋里平常也是伊来买菜。我好几次看见卖菜个人刚刚报出斤两，伊就拿价钿算出来了。伊拉班级叫伊数学脑袋，后来高考辰光，伊考进了交大船舶设计专业。
辣菜场里，我还认得了几个帮人家买菜赚贴补个阿姨。伊拉先一早到菜场买菜，回头再去里弄生产组上班。因为伊拉人头熟，脚头快，有辰光需要排几只队，人手不够，就辣地浪摆几块砖头，表示伊是正常排队嗰。我同年级个一位男同学，伊姆妈就是帮别人买菜嗰，伊读书邪气认真，得到过区物理竞赛第三名。有辰光伊还会得帮姆妈买菜送菜。搿位男同学后来考上大学，伊姆妈发喜糖感谢小菜场营业员。
小菜场是公家办嗰，早浪5点半打铃开秤，搿辰光买菜队伍最容易乱，我前后用过两只新竹篮，侪是辣打铃开秤个辰光弄坏脱嗰，一只被拥挤个人群踏扁脱，还有一只被人家顺手拿脱了。
记得当年我对帮人家刮鱼鳞特别感兴趣，因为剔下来个鱼鳞、鱼肚肠归刮鱼个人，伊转手卖脱，可以赚钞票。当然，也有人对刮鱼鳞嗰多剪了带鱼尾巴勿开心……我会剥乌贼鱼、橡皮鱼个皮就是当年看别人刮鱼鳞学会嗰。
小菜场像校外课堂，各种当令蔬菜、各种待人接物，辣有心人眼里侪蛮有意思，我印象中会买菜个同学侪蛮聪敏。当时中学毕业到菜场工作也是不错个出路，毕竟近水楼台先得月，买点荤菜素菜侪便当。有一位同学“顶替”伊姆妈个岗位，当了菜场营业员，是同学里向最早领到工资嗰。
虹口浙兴里菜场有个全国劳动模范叫安根娣。我特地多走路从伊手里买菜，看伊笑嘻嘻搭顾客打招呼，卖菜分量准足，还会教顾客荤素搭配，为人民服务特别好。我中学作文就写伊做一行爱一行是学习榜样。
1979年国家实行改革开放。之后上海市政府狠抓“菜篮子”工程，小菜场货源充沛，再勿需要大清早去排队买菜了，当时有一句流行语就叫“菜篮子里看形势”。
现在情况就更好了，还可以网上买菜，比如“叮咚”买菜、盒马鲜生等等。我经常用手机下单买菜，云南大理个紫红胡萝卜、香格里拉个新鲜松茸、福建个炮弹芋头、阳澄湖个大闸蟹……各种时鲜菜品应有尽有，手机付款，快递到家，方便得勿得了，搿是当年轧来轧去排队买菜想不到嗰！
用户评论