广播专辑 弄堂茄山胡669 春末夏初 芍药花开

春末夏初 芍药花开


文并图/沈一珠


 眼睛一眨，天气已经越来越热了，现在到外头走走，经常能看到开得邪气闹猛个芍药花。


 古人拿牡丹称为花王，又拿芍药比作花相。交关人欢喜牡丹，因为伊富贵；只勿过，富贵难求，所以，更加多个人情愿放平心态，定定心心欢喜芍药，安安静静，却遮勿牢芳华宛转。


 牡丹跟芍药有点像，勿过，有质个区别。


 牡丹是木本，长得高大一眼，花朵也更加大一眼，大部分侪是单株；芍药是草本，矮一眼，成群开，叫人想起花团锦簇迭个词；牡丹叶子是三爿生，颜色偏深绿；芍药上部个叶片是单爿嗰，偏鲜绿；牡丹谷雨前后开，也叫伊谷雨花；芍药总要挨到立夏再开。所以，两种花应该是前前后后上市。


 有种花店里个人，做生意会看山水，碰着勿懂嗰，就拿芍药卖成牡丹价钿。其实，侬可以讲，我勿欢喜牡丹，就欢喜芍药。看伊哪能收场。


 外国人有情人节，送玫瑰。其实，中国人也有自家个情人节，每年三月初三上巳节，男女朋友之间送个就是芍药。


 《诗经》里有只故事，讲个就是三月初三，小河流水，春心荡漾。男小人搭仔女小人碰着了；好像女小人胆子大一眼，约男小人到河边去看花；男小人实话实讲：刚刚去看好回来。


 哦哟，戆是真戆，人家寻只借口勿懂啊！女小人生气煞：再去看一趟勿可以啊？！


 总算开窍了。两家头终于辣河旁边，讲讲笑笑，手里捏个就是芍药花。


 再啰嗦一句，花前月下之后就是柴米油盐，花是情调，也是药呀，据说初夏个芍药泡茶，能活血淤，颐养容颜。


 我倒以为，主要功效还是治疗勿开窍啦。