弄堂里的烟杂店
文/钱红春
上世纪五十年代，我住辣一条七转八弯的弄堂里。弄堂里几条支弄转弯角浪有一家烟杂店。
其实出弄堂勿远，马路边浪也有商店，商品搭仔价钿差勿多，勿过客人侪是过路客，一手钞票一手货。弄堂里的烟杂店就勿一样，侪是邻居熟人。假使是小囡来买物事，老板会问问伊屋里情况，要是大人勿辣屋里或者是生毛病了，会关照小囡“当心点”或者是带个口信问候一声，比起马路边的要多几分人情味。
搿爿烟杂店的店面是一间矮平房，门面开间3米左右，门外头摆只煤球炉。老板姓戴，五十几岁，矮矮胖胖，和声细语，交关和善。进门就是两只装有大块玻璃的木质柜台，柜台里有铅笔、橡皮、信封、信纸、发夹、针线，还有一些仁丹、十滴水之类的常用口服药，虽然品类很杂，但摆放得整整齐齐。柜台的台面上，显眼位置摆了一组玻璃瓶，瓶里装着五颜六色的散装糖果。靠墙位置的台面上另有一个三层玻璃柜，里向是各种牌子的香烟。柜台后面摆着一排货架，上面分门别类地摆放着草纸、肥皂、蒲扇、毛巾、石碱、蜡烛、火柴、灯泡，货架顶上则是一卷卷白纸、红纸、牛皮纸。货架侧面还挂仔一把鸡毛掸子，老板歇勿歇就要拿下来掸掸灰。
烟杂店天一亮就开门，一直到夜里九十点钟才打烊。就算打烊了，只要辣门板浪一扇书本大小的小木门浪敲一敲，告诉老板需要啥物事，老板就会打开小木门，帮客人拿出来。我当时读小学，有辰光吃过夜饭，会辣烟杂店门口立脱一歇，勿是想买点啥，只是因为店里货架浪有一台收音机，说书、唱戏、滑稽，播啥听啥，一直要听到大人哇啦哇啦喊才回屋里。记得当时弄堂里只有搿爿店有收音机。
有一天，我做好功课，准备到弄堂里白相。刚出门，隔壁老木匠就喊我，叫我帮伊买几支香烟，当时香烟是可以拆零卖的。我一看，老木匠正同伙计一上一下拉锯子，要拿一根电线杆粗的木头锯成木板，一时走勿开。我拿仔钞票直奔烟杂店，老板听我讲要买香烟，马上面孔一板，问：“小鬼头，侬屋里呒没人吃香烟，买香烟做啥？”我讲明情况，老板才收过钞票，拿几支香烟塞到一只空烟盒里拨我。老板是怕我小小年纪勿学好，有意搿能问的。
还有一趟，我坐辣店门口听收音机，一个大概四五岁的女小囡来买火柴，老早弄堂里因为小囡白相火曾经发生过火灾，葛牢老板特别当心，就问买火柴做啥。女小囡讲是乡下头有人来，大人摸出香烟才发觉火柴盒子空脱了，就叫伊来买，老板才“喔”仔一声。因为有找零，老板怕小朋友路浪勿当心落脱，就拿找零的钞票包牢自来火，看伊塞进袋袋里，才挥手让伊离开。
搿是六十几年前的事体了，弄堂老早就拆迁了，但戴老板搭仔伊的烟杂店，还有收音机，我还是记得清清爽爽。
用户评论