海上风情—公用电话撑市面个日脚

公用电话撑市面个日脚
作者：郑自华改写：周红缨

勒廿几年前头，上海大大小小个弄堂口，侪可以看到“公用电话”个牌子。公用电话，曾经是上海滩浪向个一道独特个风景。

电话间一般只有两三个平方大小，里向有得好几只电话，配置是两打两接。两只拨打电话，两只专门接听，专门接听个电话是没拨盘个。打一次电话三分钟四分洋钿，传呼三分洋钿一趟，传呼费可以分一半拨个人，一半归电话站。站里拿分到个钞票买套鞋、雨伞。公用电话传呼是划地段个，就好比铁路警察各管一段一样。屋里有得私人电话个是勿传呼个。电话间里向一般坐两个老阿姨，难板也有老爷叔个。电话来了，勿会得马上就去喊，要等着好儿张单子了，再会得去走一趟。老阿姨拿仔个铁皮喇叭，后首来是电喇叭，一路浪喊过来：“15号亭子间小张，22号客堂间老王，31号三层阁蒋老师。”

因为是老式房子，邻舍隔壁听到有电话，就会得接龙传呼，勒灶披间一喊，亭子间转到前楼，再到晒台，迭个叫接龙。邻舍关系勿大好个，就当没听见。所以，公用电话是考核人际关系个试金石。搭传呼站关系搭得够个，电话可以勿挂，直接去接听就可以了，但是勒付铜钿个辰光要拎得清，除了付传呼费，还要拿电话费付脱，否则个闲话，以后个电话就永远是挂断个。因为挂电话是电话局规定个。电话挂断，等于要排队，等到依拨电话了，有辰光对方占线，有辰光对方已经离开了，迭个辰光双脚跳也没用，只好怪自家拎勿清了。为了搞好关系，让阿姨传呼及时，天热个辰光买点冷饮，天冷呢，就买点糖果，请伊拉多关照。传呼个辰光，由于地方口音搭仔文化个因素，经常会得有勿少有趣个故事。

朋友老张个老婆到医院看毛病，拿看病结果通过电话间传闲话拨老张：“让老张到医院去，带张报纸。”老张随便哪能也想勿通，做啥要带报纸到医院里去？等伊急冲冲赶到医院再弄清爽，原来是老婆拨查出“带状疱疹”，到了传话阿姨伊面就变成功“带张报纸”，闹了误会。伊个辰光电话线紧张，单位电话申请勿出，申请公用电活便当眼。所以，掰也是勿少烟纸店有公用电话个原因。伊个辰光我勒烟纸店上班，看见电话比较新鲜，私人有事体是勿好打电话个。夜到，负责人下班了，一把小锁拿拨盘锁牢，同时挂一块“电话已坏”个牌子。我老想晓得一道进单位个同事个情况，但是呢，门市部之间除脱开会平常是碰勿着个，就想打电话聊聊，但是电话锁脱了哪能办呢？有高手指点，只要敲打按簧，1击打1记，2击打2记，0击打10记，一试，哎，蛮灵光个，迭能样子电话就接通了，搭同事就可以通过迭种方式聊了。啥人晓得公用电话是单独记账个，收到个钞票专门摆勒只小盒子里，后首来发觉收到个钞票比打出去个少，乃末打电话个事体就穿绷了。

勒电话资源稀缺个年代，公用电话为市民带来了交关方便。随勒私人电话以及手机个普及，公用电话就退出历史舞台了，但是，有关公用电话个记忆却是深深个刻勒几代人个心浪向个。