苏沪规整汉语（两市全境汉语语音古今对应关系规整）
苏沪古典汉语（两市局地古汉语平仄、舒促、清浊、尖团格局完整保留）
嘉定菊园老茶坊《嘉定闲话》栏目
嘉定古建与民俗文化研究会 · 陈夏青嘉定语言研究工作室 出品
汉藏语系·汉语言·吴方言·太湖片·苏沪嘉小片·
太仓方言大区·嘉定方言区·华亭方言点
入乡随俗看势力
场时听见有人话：“佷垯既然到著我伲昰个塱，就应该入乡随俗，学著讲我伲昰塱亇闲话。”
昰个闲话讲得阿对嗫？某种程度上来讲也呒得原则性亇错误，“入乡随俗”应该讲是值得提倡亇。但是，千万覅拿“入乡随俗”看得忒个单纯，呒得绝对亇无条件亇入乡随俗，佢实际上也是势力亇角逐。当迁入者觉着必须改变自家么有能生存，嗰么入乡随俗；当迁入者觉着无需改变自家就有处生存，嗰就不会入乡随俗。现实就是残酷亇，大家要客观亇分析，理性亇看待。
挨下来我伲就通过现实状况来理解哪恁叫“入乡随俗看势力”。昰塱亇“随俗”，就以使用当地闲话为核心标志。
剖析自家，容易理解世界。先以我自家为例。我是嘉定县华亭乡人，但长期居住著嘉定城里。两个地点，虽然声母、声调完全一样，但是四十几组韵母里有少数几组是有差异亇，实际上已经是两套具体亇汉语语音啧。但我到著嘉定城里【阿曾】讲嘉定街上闲话亇？朆亇。照样厡是杯子、胚胎、培养、霉块，而不像嘉定镇嘞厛中部地区话杯子、胚胎、培养、霉块。为啥？嗰我亇闲话佷也听得懂亇嘞，共总只有几组韵母不一样呀！嗰自然就呒得必要学著佷亇闲话讲啧。昰种想法肯定是相当普遍亇，故嘞佷看，现在嘉定城里到块全可以听见发“杯胚培霉、归亏葵回”亇人，但嘉定中心地区亇汉语语音根本就呒曼ɘ昰只音。嗰么昰排人何塱来亇？全是像我伲华亭人一样来自嘉定外圈亇呀，不是嘉定城里亇原住民，但全朆入乡随俗亇。为啥？呒没必要就不学，昰个应该就是人亇普遍想法。
挨下来就放大一圈看看看昰只原理阿是普遍适用。著塱 上海郊区，有交交关关从上海中心城区搬出来亇人，但昰排上海城区人【阿曾】学著讲上海郊区闲话亇？普遍不会昰恁做亇。为啥？同样也是呒得必要呀！因为上海城区闲话辐射力广，讲上海城区闲话，郊区人也听得懂亇呀，嗰还学著讲郊区闲话咋干？话著要撘郊区民众俦拉近距离？拆穿著讲，大份上海城区人全不大肯昰恁做亇，全【情愿】可讲不同于郊区人亇闲话来有意保持一种身份上亇差别。甚至不少上海城区人就是认为上海城区闲话就是上海全市亇标准闲话、正宗闲话，郊区乡下头亇昰排闲话全是乱七八糟、呒曼标准亇。嗰自然是不会得入乡随俗亇。故嘞一直有能碰着长期生活著郊区，甚至分散著众多郊区人当中亇少数上海城区人厡旧使用一口上海城区闲话撘郊区人俦沟通亇。越加覅话像江桥、桃浦、长征昰排上海城区人大量迁入亇地区，虽然是入著别人亇乡，但佷话阿会出现上海城区人大面积使用当地闲话亇情况？只有要么当地乡民大量改用上海城区闲话作为身份语。佷话阿正常嗫？正常亇。语言兴亡，本来就是势力亇角逐，呒得纯洁亇入乡随俗。
故所以，我伲也就可以想明白，为啥现在外省人到著上海不肯入乡随俗啧。因为佢讲亇闲话侺也听得来亇呀！外加侺也会用昰套闲话表达亇，甚至佷用昰套闲话亇能力已经超过，甚至极大超过著侺使用本地闲话亇能力，嗰佷叫佢还有啥个动力板要学会佷亇乡音嗫？而昰套大家全会亇语音是啥？就是近几十年推广全国，大家已经普遍掌握，外加绝对不肯放弃亇北京语音。
乃么塱交关人心目当中嗫，又认为北京音就是全国亇标准闲话，正宗闲话，其他各地亇闲话，特别是撘占主导亇北方闲话差别较大亇南方汉语全是乱七八糟、呒曼标准亇。嗰自然是不会得入乡随俗亇。而近代嗫？大家普遍不会北京音亇，本地闲话是最擅长亇交流表达工具，外地人来著不适应本地闲话就难以生存。
倒转来想，侺若假是现在跑到上海亇外省人，面对一个已经普遍掌握北京语音亇群体，甚至上海本地汉语已经讲不连牵亇群体，侺阿有动力学上海本地汉语啧？但塱近代嗫？来著不会上海闲话哪恁混？
某种程度上讲，甚至可以认为，现在外省人来著不讲上海闲话也算入乡随俗啧——因为中青年以下还活跃著社会生活领域亇上海人普遍会北京音撘上海音两套语音，外加使用北京音“听说读写唱想”样样来姗，而用上海音连当基本亇“说”也已经难以完整表达啧，外省人用北京音，也是上海人顶顶牢固掌握亇语音啧，佷话佢【阿曾】入乡随俗？上海人亇“俗”已经是北京音顶顶内啧呀！昰个不得不话是有眼讽刺亇。
翻转来想，现在本地人到外省去，是否还有动力板要学会当地闲话？不也是直接切换到双方全已经掌握亇北京语音就可以啧？作兴有人要话：“我就是到何塱学何塱闲话撘当地人俦交流亇。”乃么佷【阿曾】想歇？佷昰恁亇人塱总人群里占几许比例？佷亇同乡跑出去几个人有昰恁亇好心想？个别性不可能取代普遍性亇。就像也有少数上海城区人会入乡随俗用郊区闲话，也有少数外地人会入乡随俗用上海闲话一样，但不改变现在人们不入乡随俗亇普遍状况。
范围再放大一圈，从世界范围来看，有亇国家虽然有专属于当地亇语言，但英语、俄语、西班牙语已经通用，佷是望著用昰排通用语言就好去沟通啧嗫还是板要吃力啌啌去学会当地亇土著语言？像美国、澳大利亚，大家全晓得有当地原住民亇，佷去著阿学土著语言？拆穿著讲眼上也不著眼上，照样撘来自世界各地亇外地人一俦用已经占据主导地位亇英语拿土著语言没脱，理由照样也充分——横现在土著居民也会英语亇嘞我凭啥还要去学土著语言？昰个辰光佷阿会话入乡随俗？作兴也会，但昰个入乡随俗学亇不是土著居民亇语言，而是外来亇已经占据主导亇语言，昰个撘现在外省人进入上海不用上海本地居民亇闲话，而用已经占据主导地位亇外地闲话，是一样亇。无非只是上海本地居民相对于美洲、澳洲土著居民来讲，塱总人群里亇比例还比较高，对于上海本地汉语亇呼声还算有眼。
横总数，所谓“入乡随俗”，也是有条件亇，实际上就是势力亇角逐。语言势力强，人家进来自会随俗；语言势力弱，人家进来就不随俗。
合转来看嗫，语言势力弱，跑出去只好随俗；语言势力强嗫，跑出去也不随俗！
疁·浏河长江
2018年4月10号 礼拜二
戊戌年 二月廿五
嘉定建县800周年
用户评论