广播专辑 弄堂茄山胡145 弄堂茄山胡 老建筑里听老歌

广播232 弄堂茄山胡 老建筑里听老歌

2012-04-17 15:26   来源：新民晚报   作者：徐鸣   新民网编辑：王玲
　

　　【新民晚报·推荐】跟今朝介许多琴童勿同，阿拉小辰光爷娘根本呒没条件让我学乐器，只是自家跟垃隔壁头几个年纪相仿个穿开裆裤朋友一道弄弄笛子吹吹，又呒没老师教，所以学了一歇歇就吹勿下去了。现在人长大了想腔调浓点，还像煞有介事去听听音乐。不过要是音乐会票价定了老高，我也勿大愿意去个，人家侪讲我老疙瘩个。

　　上海音乐厅个“星期广播音乐会（简称星广会）”倒配我胃口。星广会始终坚持高质量、低票价、普及型、服务性宗旨，另外聘请四眼哥哥王勇博士进行现场讲解，听得懂。再有上海音乐厅还是上海个老建筑，过去叫南京大戏院，其欧洲建筑风格垃拉上海滩浪邪气有味道，乃末老建筑眼眼叫碰着老歌曲。今年3月18号星广会特地为“怀旧金曲1000期”举办专场。《怀旧金曲》是上海电台经典音乐广播个名牌栏目。据该栏目第二任主持人方舟介绍，像搿能介每礼拜一播个栏目可以开到1000期是蛮稀奇个。

　　搿日我还呒没跑到音乐厅大门口，就围上来好几个黄牛问我票子有？我再朝四处一瞄，看到黄牛手浪也呒没戏票，伊拉侪像无头苍蝇乱穿八穿到处讨票子。实在是音乐厅售票处连立票也卖个精打光了。搿日整场节目绝对精彩，尤其是现场播放了该栏目个创办人之一、香港个查理林个讲话录音。老先生八十多岁了，本来想亲自来上海参加盛会，但是主办方考虑到查理林个年纪勿饶人，只能让伊遥控祝贺。还有《怀旧金曲》第一任主持人张培生前个讲话录音。张培字正腔圆个声音仿佛令辰光穿越，使得观众们唏嘘不已。4位主持人方舟、陆明、无方跟梁妮侪上台发言表达了心声。方舟跟陆明还合作演唱了另一位创办人老王伯伯（即王弈贤）生前最欢喜听个一只英文歌曲《YORAREMYSUNSHINE》。

　　二十年歌声依旧，一千期乐海回眸。当压末一只歌曲《友谊地久天长》响起来个辰光，全场（基本上是中老年观众）起立同声大合唱。坐垃拉我前头一排一个身穿大红开衫、戴副金丝边眼镜个老克拉激动个拿手指末头摆垃嘴巴里，吹出动听、响亮个口哨来。搿辰光我个眼眶湿叽叽，真个老感动！全场观众也一定会的拿搿个感动个一幕永远记垃脑子里向。