《怀念有点钱的日子》
作者：李大伟
改编：麦小姐
朗读：唐厂长
[上海话改编]
赅勿赅铜钿，是要看年代个。
80年代，辣路灯底下请朋友吃熟菜，搿对于做人家个上海人来讲，是桩交关扎台型个事体。因为熟菜啊，是老派上只角有条件人家再会享用个美食。难般掼记派头个，光吃菜哪能够啊，台底下头末板要竖几只空个啤酒瓶。吃小菜，渳老酒，赛过是“吃粽子还要蘸白糖”，忒奢侈唻，简直是拆人家呀！
不过，拣啥地方吃也是蛮有讲究个。比方，假使为了省电，阿拉会拿台子搁辣路灯底下；为了争面子个呢，就拿台子摆到十字路口，让上下班跑出跑进个隔壁邻舍侪看得着，翘起大拇指脱侬讲：“噢哟，朋友啊，侬大起来了嘛！”语气末，有点嘲叽叽，主要还是眼热。乃末侬一听，激动了；再一听，恨勿得投了汗也汤汤渧了。上身赤膊，肩胛浪向搭块毛巾，随时准备拿来揩汗，搿就是当时辰光刚刚开始有点钞票个上海人个素描画像，朴实，粗放，带有比较浓厚个劳动人民个标记。埃歇，只要侬吃得了苦，手脚勤健，是可以发财个：从乃葱姜到卖蔬菜；从卖水产到卖水果，一开始只是热天色卖卖西瓜，后来就发展到了品种繁多四季勿断；还有卖内衣个摊头，一开始卖卖袜子短裤，后来多了睏衣睏裤、衬衫衬裤，再后来连西装西裤也有了。一步一个脚印，然后再上一格台阶，好比是奥拓到奥迪，社会消费辣进步，做生意个方式也辣进步，搿些变化侪是清清爽爽发生辣辣眼门前个。
埃个辰光做生意个本钿，是勿行问银行贷款个，要末问爷娘亲眷借，要末就是问同学、朋友搿搭捅眼埃搭捅眼。碰着读书好个同学，侬是借大勿着个，因为伊拉门槛比较精，比侬还会得算唻。肯借钞票拨侬个，多数是两个读书勿哪能个同学，可能是因为伊拉对数字呒没啥个概念，人也比较爽气。不过，同学、朋友道里调头寸是勿讲利息个，全凭人品脱交情，还个辰光大家搓一顿，辣路灯底下吃吃熟小菜，欱欱小啤酒，也就当还了利息又加了浇头了。
埃歇辰光个钞票，是有人情味个，饱含了雪中送炭个兄弟义气。钞票，勿是数学家草稿纸浪向冷冰冰个一串数字，更勿是《威尼斯商人》里夏洛克索要个一磅血淋带渧个生肉，而是一镬子热腾腾个、香喷喷个红烧肉。辣弄堂口或者路灯下搁起台子，菜水肯定勿会推扳个，走过路过个熟人侪可以加只凳子坐下来，杯子咾啥也覅了，直接吹喇叭！搿种友谊勿仅明目张胆，而且正大光明，勿是夸张，而是嚣张。当时虹口杨浦一带，兴头浪向个标配动作就是一边拍台子，一边开“高音喇叭”：“谈啥谈？言话覅多，只要开心！哈哈哈！”熟面孔，熟小菜，小老酒，日脚乐惠，当然开心！埃些辰光个人情规矩是：“勿熟勿吃”，可惜搿句言话，现在已经沦为推销行业个暗语了。
我有个邻居，人长了邪气矮小，矮到啥程度啊？打只比方，伊立辣边头，就像拎了一只竹壳热水瓶，所以大家送了只绰号拨伊，叫“热水瓶盖头”，因为盖头比瓶子还要小样。九几年个辰光，我买了一只33寸个夏普彩电，就是“热水瓶盖头”相帮我一道杠到两楼个。上楼梯个辰光啊，伊走辣前头，等于是上手，正好脱我平衡。伊一边杠一边拍我马屁：“阿哥啊，乃侬搿记上去唻！”为啥搿能讲呢？因为当时多数人还是靠工资过日脚个，大家侪差勿多，万元户绝对算是大户了。有人开玩笑讲，一副大饼油条就可以让一个蛮漂亮个小姑娘跟侬哼了《一条小路》、跑进《一条小路》，四十年前头阿拉叫“敲定”，四十年以后伊拉叫“搞定”，少了一锤定音个承诺，倒是多了勿二勿三个轻浮。我埃歇做小生意赚着了几个辛苦铜钿，就横竖横豁一记，买了只七千块个日本原装电视机。搿是一个靠勤劳可以致富个年代，幸福感比较容易获得，外加，还价廉物美。
进入新世纪了。开始于97年个商品房买卖，辣04年个辰光出现了第一波高峰，随后一年一小涨，五年一大涨。因为房价上去了，有房子个人，夜里睏觉也有进账，搿就是租金；日里呢，就更加覅去讲伊了，基本就是辣坐等涨价个啦。老早开店、看店，睏着了还要付房租，醒过来就要付工钿，勿敢偷懒，就怕蚀本，苦进苦出，投得来汗汤汤渧，赚末赚两钿小钞票。还要当心好覅违规，弄了勿巧就要罚款，常庄心惊肉跳，做生意赛过做贼骨头啊。
现在好了，可以用勿着做了！所谓个“市场规律”变成功了：靠劳动只够温饱，有资产再能发财；投身经济致富，投身金融暴富。房子是金融产品，用30%个首付换来100%个产权，债头成了侬赚利息差价个本钿。拿自家个铜钿做本钿，搿叫“经济”，还是靠劳动赚钞票，拿人家个铜钿做本钿，搿就叫“金融”，是以钱生钱。作为一个上海人，侬可以勿学物理，但必须要晓得“杠杆原理”，懂了之后，就可以挢起人家袋袋里个“米”让伊滚到自家搿边，让侬从瘪三翻身做老板。养家糊口靠劳动，发家致富靠借贷，要借钞票末，直接去寻银行。朋友之间少了借贷，少了开口相求个难为情，清爽也是清爽，但人情味也淡化了，只剩酒肉关系了。患难与共个仗义开始消解，一诺千金个信任，成为了古董、传说，成为了天浪向个云，故事里个人。
现在啊，因为房子个地段，人也被划分成了三六九等。曾经个出窠兄弟，伊拉现在统称“闰土”，房子末侪越调越偏，哪能好意思再到㑚“常熟路”个屋里来白相呢？曾经个同学呢，朋友圈里点点赞也算是客气了。葛末碰碰头[口伐]啦？大家侪懂个，真正有点身价个，也呒没搿个工夫；混了勿哪能个，也勿想来当戆大。现在还高兴出来参加聚会个人，要末是“豁胖”，浪头甩到天浪去；要末是“真胖”，心宽体胖个“胖”。唉，还勿如相望于回忆。
我勿禁怀念起刚刚有点钞票个80年代。埃个辰光，钞票是润滑剂。朋友来白相，也勿分早晏，也勿打招呼，想来末就来了。拿㑚屋里当自家屋里一样，进门来，要勿要脱鞋子脱帽子，侪随便来死个，啥人也勿怕难为情。老早房子又勿大个咾，吃饭台子就攉辣过道个墙壁浪向，到吃饭辰光末翻下来，两只方凳，对面对一坐，搲一把花生米就可以过老酒了。酒呢，也勿管好了恘，哪怕是烹头酒，渳渳茄茄，一夜天辰光覅忒好过噢！来来来，干一杯，念两句郭小川来应应景：“三月个天，雷对雷；钢铁工人，锤对锤；今朝阿拉，杯对杯。”菜吃光了，人末也倦得睏着了。搿是一个有诗有梦个年代。
埃个辰光，稍为发了点财就欢喜请客，所谓“出血”。假使搿天日里，摊头浪有阿里款衬衫卖得来像发牌一样，葛夜到板是佮了一帮朋友，揦部差头，差头要拣夏利个噢，然后直接杀到乍浦路，搿辰光虹口个乍浦路美食街，还刚刚兴起。朋友道里侪是可以分享个，我个钞票就是侬个钞票，侬个朋友就是我个朋友，当时流行过一句言话，是模仿新疆话个调头讲个，叫：“酒嘛水嘛吃嘛，钱嘛纸嘛用嘛”，讲起来洋洋得意。一桌台子，正应了一句社会浪向个顺口溜：“寻眼勿三勿四个人，用眼勿明勿白个钱”。搿辰光，大家呒没房子，勿看地段，勿分阶层，只要是朋友，侪可以坐下来，吃侬个，欱侬个，端起杯子吃老酒，放下杯子骂山门。碰着啥人酒多了，开始寿头八牵翻侬老账，听过算数，侪勿会摆辣心浪。搿叫啥？搿叫酒后吐真言。埋单朋友呢，还要统统吃进，要有气量，有阿哥个腔调，搿叫啥？搿就叫模子！大家闹闹猛猛开心呀，玩笑末要开得起，否则下趟侬请客就呒没人来啦，挺侬一家头吃，有味道[口伐]啦？钞票再多，壳张当锡箔烧啊！
乃末到了今朝，有钞票个人多了，尤其是随着房价个飞涨，吃地段个来了，分档次个来了，要面子个呢，也就慢慢点勿来了。人与人就是搿能开始疏远个。现在大家难般碰趟头侪是约辣酒店里，三件套个西装，裤子烫了笔笔挺，领带背带煞煞齐，一帮装腔作势个老棺材像弄得来像两只企鹅一样，嗡辣辣水晶吊灯下头，㑚讲戆[口伐]？同样是“用眼勿明勿白个钱”，老早个酒后吐真言变成功了虚头八脑个假客气，少脱了“勿三勿四个人”，劲道也呒没了，热情也退脱了，只剩下来饭局三部曲：吃酒，吃菜，然后啊，服务员进来豁翎子催㑚快眼，草草收场，分头离开。
唉，埃个辣路灯底下吃熟小菜个时代，终究还是过去了啊！
用户评论